Read Paite Chin ISAI 35 Bible Online

ISAI 35 - Paite Chin bible

ISAI 35

¹Gamdai leh phaksap gam a kipak ding a; gamkeu in nuamsa in pawn pak bang in a pak ding.

²A pak lun ding a, kipaktak leh lasa in nuam a sa ding hi; Lebanon thupina a kiang ah piak ahi ding, Karmel leh Sharon kilawmna toh; TOUPA thupina a mu ding ua, i Pathian kilawmna toh.

³Khut hatloute hatsak unla, khuk zawte kipsak un.

⁴Lungtang dawilokte kiang ah, hattak in om unla, lau kei un; ngai un, na Pathian uh phulakna toh a hongpai ding a, a hon hondam ding, chi un.

⁵Huai hun chiang in mittawte mit hahsak in a om ding a, bengngongte bil hihvak in a om ding.

⁶Huai hun chiang in khebaite sakhi bang in a tawm ding ua, pautheiloute lei in nuamsatak in la a sa ding; gamdaite ah tuite a hong phulkhe ding ua, gam keute ah luita tui a hong phulkhe biabia ding uhi.

⁷Huchi in piaunel sa mahmah munte dil a hongsuak ding a, lei dangtak mahmah tuinak a hongsuak ding; sehalte tenna a, a lupna uah, loupa, maute leh sikhapat toh a om ding.

⁸Huan, huai ah lamlian a om ding, kongpi toh, huai siangthouna Lampi a chi ding uhi; mi thanghuai in lampi a tawn kei ding; himahleh huai mite ading in ahizaw ding; mi vialzinte, ahi, mihaite leng, huai ah a mang kei ding uhi.

⁹Humpinelkai himhim huai ah a omkei ding a, sa hing ne himhim huai ah a paitou sam kei ding uh, muhphak in leng a omkei ding; Tatsate bel huai ah a paitou ding ua;

¹⁰TOUPA tatsate a kiknawn ding ua, lasa kawm in Zion a tung ding uh, tangtawn a kipahna a lu tung uah a omta ding a; nuamsakna leh kipahna a ngah ding ua, lungkhamna leh thumna a mang ding hi.