Read Paite Chin ISAI 36 Bible Online

ISAI 36 - Paite Chin bible

ISAI 36

¹Kumpipa Hezekiah kum sawmlehli kum in hichi ahi a, Assuria gam kumpipa Sennakerib tuh Judah gam a kulhnei khua tengteng sim ding in a va hohtou a a lata hi.

²Assuria kumpipa’n Rabsakeh sepaihhon tampi piin Lakish khua a kipan Jerusalem khua a kumpipa Hezekiah kiang ah a sawl hi. Huan, dil saknung tuilakna kiang a puansawpmi pawn lamlian ah ading hi.

³Huchi in kumpipa inkuanpihte tung a heutu a om Hilkiah tapa Eliakim, Laigelhmi Shebna, tanchin gelhmi Asaph tapa Joah a kiang ah a hongsuk uhi.

⁴Huan Rabsakeh in a kiang uah, “Hezekiah kiang ah huchi in gen un: Kumpipa thupitak Assuria kumpipa in hichi in a chi, Na muanna kingakna bang ahi mai a?

⁵Kidouna ding a na lemtheihna leh na hatna zaw thu lel ahi, ka chi; Kua muang a, ka tung a hel na himai a?

⁶Ngai in, hiai sialluang chiang kitan Aiguptate muang neive; huai mi na muan leh, na khut ah a sun ding hi; Aigupta kumpipa Pharo ah zaw amah muangte tung ah huchibang ahi.

⁷Ahihkeileh, ka kiang ah, TOUPA i Pathian uh ahi ka muan uh, na chihleh, amah pen Hezekiah in Judahte kiang ah leh Jerusalem kiang ah, Hiai maitam ma ah kia na biak ding uh ahi, chi a, a munsangte leh a maitamte lakmangsakpa hilou hia?

⁸Huchi in, hehpih in, ka pu Assuria kumpipa kiang ah thu chiam in, huchi in ken sakol sang nih k’on pe ding, nang a tung ua tuangdingte na muh theihpeuh ding leh.

⁹Bangchi’n, kangtalaite leh sakol tungtuang mite thu ah Aiguptate tung a na muanna nga a, ka pu sikha neupente lak a heutu khat leng na nan zoh ding?

¹⁰Huan, hiai hihse ding a sim ding in TOUPA panglou a hong paitou ka hi ahia? TOUPA’N, ka kiang ah, Huai gam sim ding in hohtou inla, hihsia in, a honchi chi un” a chi hi.

¹¹Eliakim leh Shebna leh Joahte’n, Rabsakeh kiang ah, “Hehpih in na sikhate Suria pau in hon houpih in; huai ka theithei ngal ua; kulhbang tung a mite zak in Judah pau in hon houpih nawn ken” a chi uhi.

¹²Himahleh Rabsakeh in, “Ka pu in na pu kiang kia ah leh nang kiang ah hiai thu gen ding in honsawl ahia? Kulhbang tung a tute, noute toh amau ek ne ding leh amau zun dawn dingte kiang ah, a honsawl ahizaw kei maw?” a chi hi.

¹³Huchi in, Rabsakeh ading a, Judah pau in ngaihtak in a kikou a, “Kumpipa thupi Assuria kumpipa thute ngaikhia un.

¹⁴Kumpipa’n hichi in a chi: Hezekiah khem in om nuam dah un; aman lah a hon humbit theikei ding hi.

¹⁵‘Hezekiah in, TOUPA’N pellou in hon humbit ding; hiai khopi zaw Assuria kumpipa khut a piak in a omkei ding, chi in, thu gen mahleh, Hezekiah gen ziak in TOUPA muang nuam tuandah un’.

¹⁶Hezekiah thu ngaikhe kei un; Assuria kumpipa’n lah hichi in a chi ngal a, Thilpiak in hon kituahpih unla, ka kiang ah hong paikhia un; michih in a grepgui apan leh michih in a theipi kung apan ne chiat unla, michih in a tuikhuk apan tui dawn chiat un.

¹⁷Ka hongpai a, noumau gam bang a buh leh uain omna gam, tanghou leh grephuante omna gam a k’on paipih ma tan.

¹⁸TOUPA’N hon humbit ding, chi a, Hezekiah in a honkhem khak leh pilvang un. Namchih pathian lak a mi himhim in a gam uh Assuria kumpipa kiang ah a humbitta ua hia?

¹⁹Hamath leh Arpahte pathiante koi a om ahita ua? Sepharvaimte pathiante koi a om ahita ua? Huai Samaria khua kei a kipan in a humbitta ua hia?

²⁰Huai gam pathian tengteng lak a kuate’n ahi a gam uh kei a kipan a a humbit uh? TOUPA’N Jerusalem khua kei a kipan in a humbit mahmah ding maw? chi in” a chi hi.

²¹Amau bel a daidide ua, “Thu khat lel in leng a dawng kei uh; kumpipa thupiak, amau dawng kei un” chih ahi ngal a.

²²Huchi in kumpipa inkuanpihte tung a heutu a om Hilkiah tapa Eliakim, Laigelhmi Shebna, tanchin gelhmi Asaph tapa Joah ten a puansilh uh botkek in Hezekiah kiang ah a hongpai ua, Rabsakeh thugente a hilh uhi.