Read Paite Chin ISAI 37 Bible Online

ISAI 37 - Paite Chin bible

ISAI 37

¹Huan, hichi ahi a, kumpipa Hezekiah in huai a zaktak in a puansilhte a botkek a, saiip puan a silh a, TOUPA inn ah a lutta hi.

²A inkuanpihte tung a heutu a om Eliakim leh, Laigelhmi Shebna leh siampute upate saiip puan silh in Amoz tapa zawlnei Isai kiang ah a sawl hi.

³Amau a kiang ah, Hezekiah in hichi in a chi, “Tuni mangbatna leh muhsitna ni ahi; naupangte lah a pian hun uh ahita a, amau piangsak ding in hatna lah a om nawn kei hi.

⁴Rabsakeh a pu Assuria kumpipa’n Pathian hing gense ding a a sawl thugente, TOUPA na Pathian in a bil in a za lai ahi kha ding, huchi in a thugen, TOUPA na Pathian in a bil a a zakte ah, a honsal ding hi; huaiziak in a omsunte ading in na thumna lan in” a chi hi, a chi uhi.

⁵Huchi in kumpipa Hezekiah sikhate Isai kiang ah a hongpai uhi.

⁶Isai in a kiang uah, “Na pu kiang uah hichin na chi ding uh ahi, TOUPA’N hichi’n a chi, Na thu zak, Assuria kumpipa sikhate’n a hon gensiatnate uh, kihta ken.

⁷Ngai in, asung ah kha banghiam ka omsak ding a, huchi in thuthang a za ding a, amah gam ah a kiknawn ding; huchi in amah gam ngei ah namsau a puksak in ka omsak ding, a chi” chi in, a chi hi.

⁸Huchi in Rabsakeh a kiknawn a, Assuria kumpipa in Libnah khua a douna a kipan a paikheta chih a theikhinta hi.

⁹Assuria kumpipa Sennakerib in Tirhak Ethiopia kumpipa tungthu, “Nang honsim ding in a pawtta” chi in mi gen a za hi. Huchi in huai a zaktak in Hezekiah kiang ah palaite a sawl a.

¹⁰Hichi in Judahte kumpipa Hezekiah kiang ah na chi ding uh ahi, “Na muan Pathian in, Jerusalem khua Assuria kumpipa khut ah piak ahi kei ding, chi in, honkhem kei hen.

¹¹Ngai in, Assuria Kumpipate’n gam tengteng hihsevek in a tung ua a thilhihte uh na bil in na za hi, huchi in nang penpen humbit in na om tuam ding hiam?

¹²Namchih pathiante’n, Gozan, Haran, Reseph, Eden ta Telassar khua a omte, ka pipute sukmante, a humbit ua hia.

¹³Hamath kumpipate, Ivvah kumpipate koi a om ahita ua?” chi in, a chi a.

¹⁴Hezekiah in palaite khut a kipan in lai a mu a, a sim a, huchi in Hezekiah TOUPA inn ah a va lut a, TOUPA ma ah a phahta hi.

¹⁵Hezekiah TOUPA kiang ah a thum a.

¹⁶“Sepaihte TOUPA, Israelte Pathian aw, cherubte tung a tupa, nang, nang kia, leitung luah gam tengteng Pathian na hi; nangman leitung leh van na bawl hi.

¹⁷TOUPA aw na bildoh inla, ngai dih ve; TOUPA aw na mit hak inla, en dih ve; Pathian hing gense ding a mite sawlpa Sennakerib thu tengteng ngai in.

¹⁸TOUPA, Assuria Kumpipate’n gam tengteng leh a lei uh a hihse ngei ua, a pathiante uleng mei ah a pai uhi.

¹⁹Huaite zaw Pathian ahi kei him ua, mihing khut a bawl sing leh suang, ahizaw uh; huaiziak in a hihmang uhi.

²⁰Huaiziak in, TOUPA ka Pathian uh aw, nang, nang kia, TOUPA na hi chih leitung luah gam tengteng in a theihna ding un amah a kipan in hon humbit in” chi in.

²¹Huailai in Amoz tapa Isai in Hezekiah kiang ah mi a sawl a, hichi in a chi a, “TOUPA Israelte Pathian in hichi in a chi hi, Assuria kumpipa Sennakerib siatna ding nangawn a ka kiang a na thum ziak in hiai a tungtang thu TOUPA’N a gen ahi hi;

²²“Zion tanu nungak in a hon musit a, a hon nuihsan hi; Jerusalem tanu in a lu a hon sinkhum.

²³Kua ahimai a na minsiatsak a na gensiat? Kua tung ah ahia na aw na puamsak a, na mit na san sak? Israelte Mi Siangthou tung ah ahi kei maw.

²⁴Na sikhate zang in TOUPA na min sesak a, ka kangtalai tampi toh tangsang sanna, Lebanon gam kil ah k’ong tungtouta hi; a sidar sing sangtakte leh a meilah sing hoihte ka phuk ding; A mun sangpen, a lei hoihna gammang ah ka lut ding.

²⁵Tuileh ka let a, tui ka dawn zel a, ka khepek nuai in Aigupta lui tengteng ka kangsak vek ding” na chi hi.

²⁶Ken nidanglai apat in huai ka hih ahi a, tuma lam a kipan a ka suktuah ahi chih na za ka hia? Khua kulhneite inchim khawm banglel a hihsepa na hih theihna ding in tuin ka tungsak hi.

²⁷Huaiziak in asung a omte a hat law kei ua, a lau ua, a zahlak uhi; pawn loupa banglel leh, loupa hing banglel, intung loupa hing banglel, intung loupa bang leh, lou buh hoih mah bang lel ahi uhi.

²⁸Ken bel na tut, na pawt, na lut leh ka tung a na hehdan ka thei hi.

²⁹Ka tung a na heh ziak leh, na uangpau ka bil a a honglut touh tak ziak in ka nakbulh nang nak ah ka bulh ding a, ka sikkaihna leng na muk ah ka bulh ding hi, na hongpaina lampi mah ah k’on kiksak nawn ding, chih, chi in.

³⁰Huan, hiai pen nang ading a chiamtehna ding ahi ding; tukum in buh sang na sen ding ua; kum nawn in leng huai buhsang mah na sen ding uh; a kum thumna ah buh tuh unla, at unla, grephuante bawl unla, a gah ne un.

³¹Huan, Judah inkuanpihte lak a damsunte bel a suklam a zungkai a, a toulam a gah in a omnawn ding.

³²A omsunte Jerusalem a kipan in a pawt ding ua, damlai dingte Zion tang a kipan in a pawt ding uh; sepaihte TOUPA phatuamngaihna in huaite a hih ding hi.

³³“Huaiziak in TOUPA’N Assuria kumpipa tungtang thu ah hichi in a chi, Amah hiai khopi a hong tungkei ding a, hiailai ah a thal leng a kap sam kei ding a, lum toh a kiang ah leng a hongpai sam kei ding, a simna ding in lah leikulh a bawl sam kei ding.

³⁴A hongpaina lampi ah huai mah ah a kiknawn ding a, hiai khopi a hongtung kei ding, TOUPA’N a chi.

³⁵Kei ziak leh ka sikha David ziak in hiai khopi ka humbit ding hi” chi in, a chi a.

³⁶Huchi in TOUPA angel a vapawt a, Assuriate giahmun ah mi nuai khat leh sing giat leh sang nga a sisak a; huan, zing khang a mi a thoh uleh, ngai in, misi luang ngen a na hi.

³⁷Huchi in, Assuria kumpipa Sennakerib a pawt a, a paikik a, Ninevi khua ah a om nilouh hi.

³⁸Huchi in, hichi ahi a, a pathian Nisrok inn a pathian a biak lai in a tapa Adrammelek leh Sarezerte’n namsau in a satlum ua; huchi in a taimang ua, Ararat gam ah a lut uhi. Huchi in, a tapa Esarhaddon in a sik in vai a hawm hi.