Read Paite Chin ISAI 38 Bible Online

ISAI 38 - Paite Chin bible

ISAI 38

¹Huailai in Hezekiah muanmawh in a chi a na hi. Huchi in Amoz tapa zawlnei Isai a kiang ah a hong a, a kiang ah, “TOUPA’N hichi in a chi: Na inkuan omdan ding gelsak in; dam khelou in na si ding hi” chi in, a chi hi.

²Huchi in Hezekiah bang lam nga in a om a, TOUPA kiang ah a thum a,

³“TOUPA aw, na ma a thutak leh lungtang hoihkim pu a ka om zel dan leh na mitmuh a thil hoih ka hih zel dan, hehpih in theigige in” a chi hi. Huchi in, Hezekiah a kap huphup hi.

⁴Huchi in TOUPA thu Isai kiang ah a hongtung a,

⁵“Kuan inla, Hezekiah kiang ah gen in, Toupa, na pu David Pathian in hichi in a chi, Na thumna ka za a, na khituite leng ka mu a: ngai in, na damsung nite ah kum sawm le kum nga ka behlap ding.

⁶Huan, nang leh hiai khopi Assuria kumpipa a kipan ka humbit ding a: hiai khopi ka hum ding hi.

⁷TOUPA’N a thil gen a hih ngei ding chih, hiai nang ading in TOUPA a kipan chiamtehna ding ahi:

⁸En in, inlim chial a lim, Ahaz dakbi theihna a niamkiaksa, inlim chial sawm tan in ka kiksak nawn ding” a chi hi. Huchi in, ni a niamna dakbi theihna ah inlim chial sawm tan in a kiknawnta hi.

⁹Judah kumpipa Hezekiah china, a dam nawn nung a a laigelh:

¹⁰“Ka damsung nite sunlaitak in han kongpi ah lut ding in ka kisa a: ka damsung kum omlai dingte suh in ka omta, ka chi hi.

¹¹TOUPA, Toupa ngei, mihing gam ah ka mu nawnta kei ding a: khovel a omte lak ah mihing ka mu nawn kei ding hi.

¹²Ka omna suan in a om a, belamchingmi puan in bang in ka kiang a kipan a lakmang in a omta hi. Puan gan min a puan a zial bang in ka hinna ka zial a; aman siambu a kipan a hon teptan ding a; ni khat leh zan khat thil thu a hon hihtawp maimah ding nei ve ka chi hi.

¹³Zingsang tan ka dai teitei a; humpinelkai bang in ka guh tengteng a sutan vek a: nang ni khat leh zan khat thil thu a hon hihtawp mai ding neive.

¹⁴Lensiam hiam, vakang hiam bang in ka hamham a, vakhu bang in ka thum hi, tunglam etna in ka mit a vaita hi; TOUPA aw, nuaisiah a om ka hi, nang ka tang in ding in.

¹⁵Bang ka gen dia? Aman a hon houpih a, amahmah in a hihpah hi: ka hinna ningkitelna ziak in ka damsung kum teng awl khakha in ka paikhiankhianta ding.

¹⁶TOUPA aw, hichibang thil ziak in mihingte a hing zel uh, huaite kia ah ka kha hinna a om zel hi: huaiziak in hondam sak nawn in hon hingsak nawn in.

¹⁷Ngai in, ka lungmuanna ding in ahi, ningkitelna thupitak ka na neih: himahleh nang, ka hinna na it ziak in, siatna kawkhuk a kipan in na humbitta; ka khelhnate tengteng lah na nunglam ah na pai vekta hi.

¹⁸Han in lah honphat thei ngal kei a, sihna’n leng a hon pahtawi thei sam kei hi: kawkhuk a kumte’n na thutak a lamen theikei uhi.

¹⁹Mihing in, mihing in, amau ngei in tuni a ka hih bang in a honphat ding uh: pa’n a tate kiang ah na thutak a theisak ding.

²⁰TOUPA bel hon hondam ding in a mansa gige hi: huaiziak in i damsung tengteng in, TOUPA inn ah, ka late tumging guineite toh i sa ding.”

²¹Isai in, theipi gah lomkhat la henla, damdawi a tat a tatte ding in a meimatum ah tuamkhum hen, huchi in a dam ding, a na chi khinta hi.

²²Hezekiah in leng, TOUPA inn ah ka hohtou nawn ding chih theihna bang chiamtehna hongom ding ahia? a na chikhinta hi.