Read Paite Chin ISAI 39 Bible Online

ISAI 39 - Paite Chin bible

ISAI 39

¹Huailai in Baladan tapa Babulon kumpipa Merodakbaladan in laite leh kipahman Hezekiah kiang ah a khak a: a chi a na chih leh a damnawnta chih a zak ziak in.

²Huchi in Hezekiah a tung uah a kipak a, a kiang uah a thil manphate koihna inn dangkate, dangkaengte, gimlim bangbang hiamte, sathau manphate, a galvan koihna inn sung tengtengte, a gou hoih lak a om tengtengte a ensak hi: A inn leh a gamsung a om himhim Hezekiah in a kiang ua a etsaklouh a omkei hi.

³Huailai in zawlnei Isai bel kumpipa Hezekiah kiang ah a hong a, a kiang ah, “Den a mite’n bang ahia a gen uh? Koi a kipan in ahia na kiang a a hong uh?” a chi hi. Hezekiah in, “Gam gamlapi a kipan, Babulon a kipan in, ka kiang a hongpai ahi uh” a chi hi.

⁴Huchi in aman, “Na inn ah bangbang a en ua eita?” a chi a. Hezekiah in, “Ka insung a om tengteng a envek uh: ka gou hoihte ka etsak louh bangmah a omkei” chi in, a dawng hi.

⁵Huchi in Isai in Hezekiah kiang ah, “Sepaihte TOUPA thu thei in.

⁶Ngai in na insung a om tengteng leh tuni tan a na pipute’n a kholkhawmte uh Babulon khua a paipih in a omvek ding; bangmah nutsiat in a omkei ding; huchibang nite a hongtung ding, TOUPA’N a chi.

⁷Huan, na tapa, na gil a hong gah ding, na suan dingte ngei lak a mi, a paimang pih ding uh; amau Babulon kumpipa inn ah michilgeh ding in a om ding uh” a chi hi.

⁸Huchi in Hezekiah in, Isai kiang ah, “TOUPA thu na gen a hoih hi” a chi hi. Amahmah in, “Ka damsung in lemna leh thutak a om ding hi,” a chilai hi.