Read Paite Chin ISAI 40 Bible Online

ISAI 40 - Paite Chin bible

ISAI 40

¹Lungmuan un, ka mite lungmuan un, na Pathian un a chi.

²Jerusalem kiang ah lungmuan lamsang in thugen unla, a galdouna uh hih zoh ahita a, a khelhna uh ngaihdam ahi a, a thil hihkhelh teng gun ding in TOUPA khut a kipan a mun nih in a muta uh chih hilh un.

³Tua! Kikou aw in, “Gamdai ah TOUPA lampi bawl unla, gamkeu ah i Pathian ading in lamlian kilualsak un.

⁴Guam chih sansak ahivek ding a, tangchih mualchih niamsak ahi ding: lampi kawite tansak ahi ding a, a phokna lailai hihlual ahi ding hi:

⁵TOUPA thupina hihlat ahi ding a, mi tengteng in huai a mu chiat ding uh chih TOUPA kam in lah a genta ngal a” a chi hi.

⁶Tua aw in, Kikou in, a chi. Mi’n, bang gen in ka kikou dia? a chi hi. Mi tengteng loupa bang ahi ua, a thupina tengteng uleng pawn a pak bang ahi.

⁷TOUPA hu in a mut ziak in loupa a vuai a, a pak a tul nak: mite zaw loupa bang ahi mahmah uhi.

⁸Loupa a vuai a, a pak a tul zel: i Pathian thu bel tangtawn in a om gige ding, chi in, a chi a.

⁹Zion kiang a a tanchinhoih hilhmi aw, tangsang mahmahte ah vahohtou in; Jerusalem kiang a tanchinhoih hilhmi aw, ngaihtak in na aw suah in; suah in, lau ken; Judah khuate kiang ah, En un, na Pathian uh!

¹⁰En un, TOUPA Pathian mi hattak bang in a hongpai ding hi; a ban in vai a hawm ding: En un, a kipahman a kiang ah a om a, ditna leng a ma ah a om.

¹¹Aman belamchingpa bang in a belamhon a vak ding a, belamnoute a ban in a pomkhawm ding a, a ang sung a koih in a paipih ding a, nou kailaite bel awlawl in a pi hiathiat ding, chi in.

¹²Kuan ahia tuite a khutpek sunglel a teh a, tung a van khap lel a teh a, lei a leivui tehna khat lel a thunvek a, tangte lah khaina a khai a, mualpawngte bukna lel a buk?

¹³Kuan ahia TOUPA kha thilhih dan ding kawkmuh? Ahihkeileh kua ahia amah lemsehsak hi a amah chil?

¹⁴Aman kua a dong a, kuan ahia amah theisak a, vaihawm lampi ensak a, theihna hilh a, theihsiamna lampi ensak ngei?

¹⁵Ngai in, namchih baltin a tui tak khat banglel ahi ua, bukna a banghiam nen banglel a seh ahi ua, ngai in, aman tuikulh gamte thilneu neuchikte bang in a dom zel hi.

¹⁶Lebanon nangawn khul tham ahi kei a, a gam a gante leng haltum a kithoihna tham ahi sam kei hi.

¹⁷Namchihte lah a ma ah bangmahlou bang ahi ua, amah ngaihtuah in bangmahlou sang a tawm zaw, huihkhua lel ahi uhi.

¹⁸Pathian kua toh teh na hi ua? Ahihkeileh, bang lim ahia amah toh na teh ding uh?

¹⁹Milim bawltawm zaw, nasem mi in asung a, dangkaeng sek mi’n dangkaeng in a luan khum a, huai a ding in dangka khainiangte a sunsak zel hi.

²⁰Huchibang thilpiak pe zoulou a, genthei law mahmah in sing muat lou ding a telzel, milim bawl tawm, ling lou ding, amah adia bawlkhiak sak ding khutsiam mi a zongzel hi.

²¹Na lungsim un na thei kei ua hia? Na bil un na za kei ua hia? A tung a kipan in honhilh kei ua hia? Lei pianchil apan na theisiam kei ua hia?

²²Amah zaw lei kualkhumna tung a tupa ahi, amah mitmuh in leitung a omte khaupe banglel ahi uh, amah zaw tung a van puanin tung bang a kaipalh a, Puan in omna ding a zak a, miliante bangmahlou suaksakpa ahi.

²³Amah leitung a vaihawmmite bangmahlou a bawl nakpa ahi.

²⁴Ahi, a suan ahi kei ua; ahi, a tuh ahi kei uh; ahi, a kung un lei ah zung a kai kei: huailou in aman amau a mut a, a vuai ua, pingpei in buhsi a lakmang bang in a lamang hi.

²⁵Kua toh honteh a, kua kimpih a honsep na hi ua? Mi Siangthou in a chi.

²⁶Tunglam ah na mit uh hak unla, huai thilte kua siam hiam en un; aman sepaihte kizomzom in a pikhia a, a min chiat un a sam a; a hatna thupina ziak leh thilhihtheihna a a hat ziak in khat leng kimlou a om ngeikei uhi.

²⁷Jakobte aw, Bang achia hiai chi na hi ua, Israelte aw, bang achia hichibang a thugen na hi ua, Ka lampi zaw TOUPA lak a sel ahi a, A vaihawmsakna ka Pathian lak a lakmang ahi, chih?

²⁸Na lungsim un na thei kei ua hia? Na bil un na za ngeikei ua hia? Tangtawn Pathian, TOUPA kawlmong Siampa, a bah lou a, a gim ngeilouh dan; a theihsiamdan zonkhiak vual ahi kei hi.

²⁹Bahte kiang ah thilhitheihna a pia a, hatna himhim neiloute a hatsak hi.

³⁰Tuailaite nangawn bah in a gim ding ua, tangvalte leng a pukzou ding uh:

³¹TOUPA ngakte’n zaw a hatna uh a thaksak nawn ding ua; muvanlai bang in kha in a lengtou ding ua; gimlou in a tai ding ua; bah lou in khe in a pai ding uhi.