Read Paite Chin ISAI 41 Bible Online

ISAI 41 - Paite Chin bible

ISAI 41

¹Tuikulh gamte aw, ka ma ah dai sipsip unla; michih in a hatna uh thaksak nawn uhenla: hongpai nai chiat le uh; huaikhit chiang in gen uhen: vaihawm ding in paikhom ni.

²Suahlam a kipan mi khat, diktatna ziak a khe bul a a sap, kuan ahia kai halh? Aman namchih a ma ah a pia a, kumpipate tung ah vai a hawmsak a; leivui bang in a namsau kiang ah a pia a, buhsi huih mut leng bang in a thalpeu kiang ah leng a pia hi.

³Aman amaute a delh a, bittak in a pai a; a khe a a pai nailouhna lampi ah.

⁴A tung a kipan suan tengteng sam in, kuan ahia sem a, hih khin? Kei TOUPA, a masapen leh a nanungpen, a hihpa kei kia ka hi.

⁵Tuikulh gamte’n a mu ua; a lau ua; kawlmongte a ling ua: a honnaih a, a hongpai uhi.

⁶Michih in amau lawmte a panpih ua; michih in a unaute uh kiang ah, Khamuangtak in om un, a chi chiat uhi.

⁷Huchi in, a bulhkipna lam thu ah, A hoih hi, chi in, khutsiam mi in dangkaeng sekmi a hanthawn a, sek a sekmum mi in sekdou sekmi a hanthawna: a linlouhna ding in kilhnate in a kilh kipta hi.

⁸Himahleh nou Israelte ka sikha, Jakobte ka mitel, ka lawm, Abraham suante aw,

⁹Nou, lei tawpna a kipan a ka mipi, a nawl a kipan a ka misap, ka sikhate na hi ua, hon paikhe lou in k’on tel zaw ka honchihte aw,

¹⁰Lau kei un, kei lah na kiang uah ka om ngal a; mangbang kei un, kei lah na Pathian uh ka hi ngal a: k’on hatsak ding a; ahi, k’on panpih ding; ahi, ka diktatna khut taklam in ka honlen gige ding hi.

¹¹Ngai in, na tung ua lungkimlou tengteng zahlaktak leh zumtak in a om ding uh: nou honselte lah bangmahlou bang ahi ding ua, a mang ding uh.

¹²Nou honselte na zong ding ua, na mu tuankei ding uh: nou hon doute lah bangmahlou bang ahi ding ua, thil omlou banglel ahi ding uh.

¹³Kei TOUPA na Pathian un, Lau kei un, k’on panpih ding, chi in, na khut taklam uh ka len ding hi.

¹⁴Nou Jakob tangtel leh Israel mite aw, lau kei un, k’on panpih ding, TOUPA’N a chi, nou hon tanpa Israelte Mi Siangthou ahi

¹⁵Ngai in, buhsukna khawl thak mahmah, hiam mahmah, ha nei in k’on bawl ding; tangte chil in na khen zan ding ua, mualte buhsi bang in na bawl ding uh.

¹⁶Na zap ding ua, huih in a mut leng ding, pingpei in a hih dalh ding a, huan, noute TOUPA ah na kipak ding ua, Israelte Mi Siangthou n’on suang ding uh.

¹⁷Mi genthei leh tagahte’n tui a zong ua, a omkei a, a lei uh dangtak in a hulkhin hi; kei TOUPA’N amau ka dawng ding a, kei Israel Pathian in amau ka paisan kei ding.

¹⁸Tangsang giau ah luite ka luangsak ding a, guam laizangte ah tuinak ka suaksak ding: gamdai dil in ka bawl ding a, gamkeu leng tuinak in ka bawl ding hi.

¹⁹Gamdai ah sidar singte, singgite, muite, thausingte ka suan ding a, gamkeu ah meilah singte, phante, singgelh chite ka suan khawm vek ding:

²⁰TOUPA khut in huaite a hih ahi chih leh Israelte Mi Siangthou in a siam ahi chih a muh ua, a theih ua, a ngaihtuah ua, a theihsiam theihna ding un.

²¹Na thu uh hong gen un, TOUPA’N a chi; na paulam pen uh sulang un, Jakobte Kumpipa’n a chi.

²²Huaite sulang uhenla, thil hongtung dingte i kiang uah gen uhen; i ngaihtuah theihna ding leh a tawpna ding i theih theihna ding in, tuma thilte bang ahia gen un; ahihkeileh, thil hongtung dingte hon theisak un.

²³pathiante na hi uh chih ka theihna ding un tunung chiang a thiltung dingte gen un; ahi, i mangbat chiatna ding un leh i et chiat ding un thil hoih hiam thil hoihlou hiam hih dih ua le.

²⁴Ngai un, bangmah na hi kei ua, na thilhih uleng bangmah ahi kei; nou hontelpa mi kihhuai a hi.

²⁵Mallam a kipan mi khat ka dingsak a, amah a hongtung a; ni suahna a kipan ka min loupa; aman suang bulhkipna bawl bang in vaihawmmite a bawl ding a, belvelmi’n bellei a chil bang in a chil ding hi.

²⁶I theihtheihna ding un kuan ahia a tung a kipan gen ngei? Amah zaw a dik i chih theihna ding un kuan ahia gen khol ngei? Ahi gen himhim a om kei uh, ahi, theisak himhim a omkei uh, ahi, na thugente uh za a omkei uh.

²⁷Ken Zion kiang ah, En in, amau en dih, ka chi masa ding a, Jerusalem kiang ah tanchinhoih hon tunmi khat ka pe ding.

²⁸Ka et in leng mi himhim a omkei ua; amau ka dot in leng, a lak ua lemtheimi, thu khat leng dawng thei, kuamah himhim leng a omkei uh.

²⁹En un, a nasepte uh bangmahlou ahi a, thil omlou ahi: a milim sunte ulah huih leh huihkhua lel ahi hi.