Read Paite Chin ISAI 42 Bible Online

ISAI 42 - Paite Chin bible

ISAI 42

¹Ka sikha, ka let gige, ka tel, ka lung in a pahtak mahmah en dih ua: a tung ah ka kha ka koihta: Jentelte kiang a piak ding in vaihawmna thu a hongpawt ding.

²A kikou kei ding a, a aw a suaksak sam kei ding, kongzing ah a aw a kiza sak sam kei ding.

³Sialluang gawpsa a kuaitan kei ding a, Meikuang liakliak a mitsak kei ding: thudik in vai a hawm zaw ding hi.

⁴Leitung a vaihawmna a omsak masiah, amah a bah kei ding a, a lungdong sam kei ding; tuikulh gamte’n a dan thu a ngak nilouh ding uhi.

⁵Pathian, TOUPA, van siampa leh phalhpa, lei leh asung a kipan a pawt tengteng hihlianpa, a tung a mite kiang a hatna pepa leh a tung a paite kiang a kha pepan hichi in a chi:

⁶Kei TOUPA in diktatna in ka honsam a, na khut ka len ding a, k’on humbit ding, mite thukhun ding leh Jentelte hihvakpa ding in k’onsep ding a:

⁷Mitdelte mit hihvak ding leh mitangte suangkulh a kipan pikhe ding leh, mial lak a tute suangkulh a pan a pikhe ding in.

⁸TOUPA ka hi; huai ka min ahi: ka thupina midang kiang ah ka pe kei ding a, phat ka lohna leng milim bawltawmte kiang ah ka pe sam kei ding.

⁹Ngai un, tuma thilte a hongtungta, thil thakte gen ka hi: a pou ma in nang k’on hilh hi.

¹⁰Tuipi a hohsukte leh, asung a om tengteng leh, tuikulh gamte leh, a tung a om tengteng aw, TOUPA pahtawi in la thak sa unla, kawlmong a kipan in leng amah phatna la sa un.

¹¹Gamdai leh a khote’n a aw uh suaksak uhen, Kedarte omna khuate’n; Suangpi khua a omte’n nuamsa in la sa uhenla, mual dawn a kipan kikou uhen.

¹²TOUPA hih thupi uhenla, tuikulh gamte’n a phatna thu gen uhen.

¹³TOUPA lah mihat mahmah bang in a pawt ding a, galdoumi bang in mullitna a tokthou ding: a kikou ding a, ahi, ngaihtak in a kikou ding; amah doute tung ah hattak in a gamtang ding.

¹⁴Sawtpi ka daita a; ka om kinken in ka kidek teitei; tun zaw numei nauvei bang in ka kikou tuaituai ding a; ka nak honhon in ka nak huhu ding.

¹⁵Tang leh mualpawngte ka hihse ding a, a niam tengteng ka keusak vek ding; luite tuikulh gam in ka bawl ding a, dilte ka kangsak ding.

¹⁶Mittawte a theih ngeilouh lam ah ka honpi ding a, a theih ngeilouh uh lampi ah ka pi ding: a ma uah mial vak in ka bawl ding a, lam kawinate leng ka tangsak ding. Huai thilte ka hih ding a, amau leng ka nuse kei ding.

¹⁷Milim bawl tawmte muang a, milim sunte kiang a, Ka pathian uh na hi uh, chite kiheisak in a om ding ua, nakpitak in a zahlak ding uhi.

¹⁸Bengngongte aw, bil in za unla; mittawte aw, na muh theihna ding un en un.

¹⁹Ka sikha loungal kua mit a taw a? Ahihkeileh, ka sawltak sawl bang in kua beng a ngong a? Hon kithuahpih mi bang in kua mit a taw a? TOUPA sikha bang in kua mit a taw a?

²⁰Thil tampi na mu a, himahleh na lungsim in na vom gige kei; a bilte a kihong a, himahleh a zakei hi.

²¹Dan lah a diktatna ziak a letsak a pahtawisaka om TOUPA’N hoih a sa hi.

²²Himahleh hiaite zaw guta guksak leh lohtuak mite ahi ua; guam a ahivek ua, suangkulh a khum mangte ahi ua; sal ding ahi ua, kuamah in lah a humbit ngal kei ua, gallak a lak ding ahi ua, kuamah in, penawn in, a chi kei uhi.

²³Na lak uah huaite bildoh ding kua na om ua? Hun hongtung ding adia ngaikhia a za ding kua na om ua?

²⁴Kua in ahia Jakobte gallak a lak ding a pia a, Israelte gutate kiang a pia? TOUPA, a tung a i khelhnapa un, a piak hilou hia? Amah lampi ah a pai nuam ngal kei ua. A danthu a mang sam kei uhi.

²⁵Huaiziak in a heh mahmahna leh kibawlna tha amau tung ah a sungbua a, huai in amaute a kang a himahleh a thei sam kei uh; huai in amaute a hul a, himahleh a lungsim un a ngaihtuah tuankei uhi.