Read Paite Chin ISAI 43 Bible Online

ISAI 43 - Paite Chin bible

ISAI 43

¹Tuin zaw, Jakobte aw, TOUPA nou honsiampa leh, Israelte aw, nou hon bawlpa’n, hichi in a chi; Lau kei un, k’on tanta hi; na min un k’on sam a, kei a na hi uhi.

²Tuite na ngah tan lai un na kiang uah ka om ding a; luite na ngah tan lai un leng a hontum kei ding hi: mei a na pai tan lai un leng a honhul kei ding a; meikuang in a honliau kei ding hi.

³Kei, TOUPA na Pathian uh, Israelte Mi Siangthou, nou hon humbitpa ka hi ngal a; noute tatna ding in Aigupta gam ka pia a, Ethiopia leh Sheba gam na sik un ka pia hi.

⁴Ka ngaih in manpha mahmah na hi ua, mizahtakhuai mahmah leng na hi uhi, it leng ka hon it ziak in, na sik un mite ka pe ding a, na hinna sik ding un michih ka pe ding hi.

⁵Lau kei un, na kiang uah ka om ngal a: na suante uh suahlam a kipan ka honpi ding a, tumlam a kipan ka honpi khawm ding hi;

⁶Mallam kiang ah, khah un, ka chi ding a; simlam kiang ah, len kei un, ka chi ding; ka tapate gamlapi a kipan honpi unla, ka tanute kawlmong a kipan honpi un;

⁷Ka min paw peuhmahte leh ka thupina ding a ka siam peuhmahte; amau ka bawl a, ahi, amau ka suktuah ahi uh hi.

⁸Mit nei ngal a mittawte leh, bil nei ngal a bengngongte, pi khia un.

⁹Namchih kikhawm uhenla, michih omkhawm uhen: a lak ua kua ahia hiai gen thei a, tuma lam in thilte hon theisak thei? Siamtansaka a om theihna ding un a palaite uh honpi uhen: ahihkeileh bil in za uhenla, thutak ahi, chi uhen.

¹⁰Mi theih a, mi upa, amah ka hi chih na theih theihna ding un, noute ka palaite na hi uh, ka tel ka sikha leng, TOUPA’N a chi: ka om ma in Pathian bawl a omkei a, ka om nung in leng a omsam kei uh.

¹¹Kei, keimahmah, TOUPA ka hi; keimah loungal hondampa a omkei hi.

¹²Ken ka gen a, ka hondam a, ka theisak a, na lak uah gamdang Pathian a omkei hi: huaiziak in noute ka palaite na hi uh, TOUPA’N a chi, kei Pathian ka hi.

¹³Ahi, ni om nungsang kei amah ka hi; huchi in ka khut a kipan honkhe thei kuamah a omkei uh; nna ka sem a, kuan ahia huai hei ding?

¹⁴Toupa, nou hon tanpa, Israelte Mi Siangthou in hichi in a chi: Nou ziak in Babulon khua ah sepaihte ka sawl a, huchi in, avek un, Kaldaite, a kipahna longpi uah taimangmi pi in ka pi suk ding.

¹⁵Kei TOUPA, na Mi Siangthou uh, Israelte Siampa, Na Kumpipa uh ka hi, chi in.

¹⁶Tuipi a lampi bawlpa leh, tui thupi mahmahte a paina ding bawlpa, TOUPA’N hichi in a chi;

¹⁷Kangtalai leh sakol, sepaihte leh thilhihtheihna a pikhepa’n, huaite a lumkhawm zengzung ua, a thou nawnta kei ding uh; a chimit khin ua, khawnvak puan mihsak bang in mihsak in a omta uh, chi in.

¹⁸Tuma lam thilte zaw theigige kei unla, nidanglai thilte ngaihtuah sam kei un.

¹⁹Ngai un, thilthak ka hih ding; tua kipan in a dawnkhe ding; huai na theikei ding ua hia? Gamdai nangawn ah lampi ka bawl ding a, gamkeu ah leng luite ka bawl ding.

²⁰Gamsate’n leng hon pahtawi ding ua, sehalte, vasangawngsaute tan in: gamdai a tuite ka omsak ziak leh, gamkeu a luite ka omsak ziak in, ka mi, ka telte kiang a dawn ding a piak ding.

²¹Hiai mite kei ading in ka bawl a; kei phatna a hihlang ding uhi.

²²Himahleh Jakobte aw, nou zaw n’on sam kei ua, Israelte aw, nou zaw nawn chimtak zawta uhi.

²³Haltum thillat gannoute n’on lak ngeikei ua; na kithoihnate un n’on pahtawi sam kei uhi. Thillat in na k’on semsak ngeikei a, begaw in k’on hihgim ngeikei hi.

²⁴Kawltu dangka in n’on leisak ngeikei ua, na kithoihna thaute un n’on taisak ngeikei uh: na khelhnate uh puak nasepte n’on semsak ua, na tatleknate un n’on hihgim zawta uhi.

²⁵Kei, kei mahmah, keimah leh keimah ziak lel a, na tatlekna uh nulmangpa ka hi; na khelhnate uleng ka theigige nawnta kei ding.

²⁶Hon theihpih un; ngaihtuah chiat ni: siamtansak a na om theihna ding un na thu uh gen un.

²⁷Na pu masapen uh a khial a, na thugen mite uh leng ka tung ah a talek uhi.

²⁸Huaiziak in Mun Siangthou a miliante ka hihbuah ding a, huchi in Jakobte hamsethuak ding in ka bawl ding a; Israelte muhdah din ka bawl ding hi.