Read Paite Chin ISAI 44 Bible Online

ISAI 44 - Paite Chin bible

ISAI 44

¹Tuin zaw, Jakobte, ka sikhate aw, ka tel Israelte aw, ngaikhia unla:

²TOUPA nou hon siampa, sul apan nou hon bawlpa, nou hon panpih dingpa’n hichi in a chi: Ka sikha Jakobte aw, ka tel nou Jeshurunte aw, lau kei un.

³Dangka tung ah tui ka sung ding a, lei keu ah tuiluangte ka sung ding; na suante uh tung ah ka kha ka sung ding a, na tate uh tung ah ka vualzawlna ka sung ding hi:

⁴Huchi in amau, tui luanna kiang a singhiang kaite a pou bang in, loupa lak ah a pou ding uh.

⁵Mi khat in, TOUPA a ka hi, a chi ding a; midang Jakob min in a kilou ding a; midang in a khut a, TOUPA, chi a gelh in, Israel min a beh min in a zang ding chi in, a chi hi.

⁶TOUPA, Israelte Kumpipa, amau tanpa sepaihte TOUPA’N hichi in a chi: Kei a masapenpa ka hi a, nanungpenpa ka hi; keimah loungal Pathian a omkei uhi.

⁷Nidanglai a mite ka seh nungsang kei hih bang in kuan a sam dia, huaite kuan a gen dia, kuan ahia kei sik a kizom zel a hihlang ding? Thil hongtung dingte leh hongom dingte gen hen.

⁸Lau kei unla, kihta sam kei un; tuma lam in na kiang uah ka genkhin in k’on theihsak khin hilou hia? Noute ka palaite na hi uhi. Keimah lou Pathian a om hiam? Ahi, Suangpi himhim a omkei; khat lel leng a om ka theikei.

⁹Milim bawltawm bawlmite avek un huihkhua lel ahi ua; a thil deihlam uh a phatuam kei ding; a zahlakna ding un amau palaite un leng a mu theikei ua, a theithei kei uhi.

¹⁰Kuan ahia Pathian bawl? Ahihkeileh, kuan ahia bangmah ding a phatuam loupi milim bawltawm sung?

¹¹Ngai in, a pawlpi tengteng a zahlak ding ua; na semmite leng mihingte lak a mi ahi uh: Avek un kikhawm vek uhenla, ding uhen; a lau ding ua, a zahlak khawm ding uhi.

¹²Siksek in heipi a sek zel a, meihol ah a tholh a sek ding bang in a sek a, a ban hattak in a sek zel; ahi, a gil a hong kial a, tha a hong zoizel; tui a dawn kei a, a bah nak hi.

¹³Singlem bawlmi in khau a kai gak a, pensil in a hi ding a bawl a, nawt mamna in a hih dingdan a bawl a, bem bawlna in a hi ding a bawl a, mihing lim bang in a bawl a, inn a om ding in mihing kilawmna bang in a bawl zel hi.

¹⁴Sidarsingte a kiphuk a, sesing leh tosaw a la a, gammang sing lak a khat amah tuam a om ding in a hihkip a; meilahsing a suan a, vuahtui in a vak hi.

¹⁵Huainung in mi ading a mei a khul ding ahita ding; huai a kipan in a la a, a kihihlum zel; ahi, a kuangsak a, tanghou a haizel hi: ahi, pathian a bawl a, a be zel hi; huai sing pen milim bawltawm ding in a bawl a, huai khupboh in a bia hi.

¹⁶Huai sing khenkhat mei ah a khul a; a khenkhat sa nekna ding in a zang a; sa a em a, a tai hi; ahi, mei lum a awi a, Nuam e, ka lumta, mei mel ka muta e, a chi hi.

¹⁷A val pathian ding in a bawl a, a bawltawm milim mah: huai khupboh a bia a, a kiang ah a thum a, Hon hondam in, ka pathian lah na hi ngal a, a chi zel hi.

¹⁸A theikei ua, a ngaihtuah sam kei uh; aman lah a mit uh a mitsisakta ngal a; a theihsiam louhna ding un a lungtang uh leng a khaksakta hi.

¹⁹Huchi in kuamah in a theikhe nawn kei ua, Khenkhat lah mei ah ka khul a; ahi, a am ah tanghou bang in ka hai a; sa leng ka em a, lah ka ne ngal a: a val thil kihhuai ding in ka bawl ding hia? Sing a suak khupboh in ka be ding hia? Hih ding in amau ah theihna leh theihsiamna a om tuankei hi.

²⁰Vut kia a ne zel a: a lungtang khem a om in, a hinna a kihumbit theihlouhna ding leh, Ka khut taklam ah zuau a om ka hia? a chih theihlouhna ding in, amah a kalsuan sakta hi.

²¹Jakobte aw, huai thilte theihgige un, Israelte aw, nou leng theigige un ka sikhate lah na hi ngal ua; kei bawl na hi ua; ka sikhate na hi uh: Israelte aw, ka mangngilh in na omkei ding uhi. TOUPA, bangkim siamtu leh hondampa

²²Na tatleknate uh meipi hihmang bang in ka hihmang ta a, na khelhnate uh mei hihmang bang in ka hihmang na lai hi; ka kiang ah hongkik nawn un, nou lah k’on tanta ngal a, chi in.

²³Vante aw, nuamsatak in lasa un, TOUPA’N lah huaite a hihta ngal a; lei nuailamte aw, kikou un, tangte aw, gamnuai leh asung a sing om chiteng aw, la sakhe guih un: TOUPA’N Jakobte a tanta a, Israelte ah a kipahtawi ding hi.

²⁴TOUPA, noumau hontanpa, sul a kipan nou hon bawlpan hichi in a chi: Kei zaw TOUPA, thil tengteng siampa, keimah kia a van kaipalhpa, liansakpa ka hi; kua ahia ka kiang a om?

²⁵Kei lah zuautheite chiamtehnate bangmahlou a bawl a, aisansiamte mihai a bawlpa, mipilte nunglam ngasak a, a theihna uh haihuai a bawlpa.

²⁶A sikha thu hihkip a, a palaite lemtheih tangtungsakpa, Jerusalem tungthu a, Huai ah mi a om nawn ding uh, chipa leh Judah gam khaw tungthu a, Bawl in a om nawn chiat ding uh, a siatna lailai ka bawl nawn ding, chipa.

²⁷Tui thuk mahmah kiang a, Kangtat in, na luite leng ka kangtat sak ding, chipa.

²⁸Kura tungthu a, amah zaw ka belamchingpa ahi a, Jerusalem tungthu a, Bawl in a om nawn ding, chih leh, Pathian biakin kiang a, Na suangphum lep in a om nawn ding, chi khop hial in ka deihlam tengteng a hih ding, chipa ka hi, chi in.