Read Paite Chin ISAI 45 Bible Online

ISAI 45 - Paite Chin bible

ISAI 45

¹TOUPA’N a thaunilh, Kura, namte a ma a phukpai ding leh, kumpipate kawnggakte phelsak ding a, a ma a kongkhakte honsak ding leh, kulh kongkhakte khak louh a omsak dingpa, a khut taklam ka letpa kiang ah, hichi in a chi:

²Kei na ma ah ka pai ding a, a phok lailai ka kibang sak ding: dal kongkhak ka hihse vek ding a, a kalhna siktawnte ka tansak ding:

³TOUPA, na min a hon sampa, Israelte Pathian ka hi chih na theihtheihna ding in mial lak a goute ka honpe ding a, mun dai a sum selte leng ka honpe ding.

⁴Jakobte ka sikhate leh Israelte ka telte ziak in na min in k’on sam a; honthei ngeikei mahle chin na min k’on phuahsak hi.

⁵Keimah TOUPA ka hi, a dang himhim a omkei; keimah loungal Pathian a omkei: hon thei ngeikei mahle chin na tai k’on gaksak ding hi:

⁶Keimah loungal a dang a omkei chih ni suahna lam a kipan leh tumlam a kipan a theihtheihna ding un: kei Toupa ka hi, a dang himhim a omkei.

⁷Vak ka bawl a, mial leng ka bawl hi; kituahna ka bawl a, gilou leng ka bawl hi; kei zaw TOUPA, huchibang thilte hih zelpa ka hi, chi in.

⁸Vante aw, tunglam apan takkhe sak un, van dumte’n diktatna sung suk uhen: hotdamna a dotkhiak theihna ding un lei kihong henla, diktatna toh poukhawm hen; kei, TOUPA’N huaite ka bawl ahi.

⁹Amah Bawlpa kinakpih mi tung a gik hi! Bellei in a velmi kiang ah, Bangdia hon bawlna hia? A chi dia hia? Ahihkeileh, nna nasep in, A khut in siam a neikei? A chi dia hia?

¹⁰A pa kiang a, Bang suang na hia? chi mi tung hiam, a nu kiang a, bang ahia na suan ding? chi mi tung hiam a gik hi!

¹¹TOUPA, Israelte Mi Siangthou, amau Bawlpa’n hichi in a chi: Thil hong tung ding thu hon dong unla; ka tapate leh ka khut nasepte ah thu honpia un.

¹²Lei ka bawl a, a tung a mihing omte leng ka bawl a: keimah in ka khut ngei in, van ka kai palh a, a sepaihte thu ka pia hi.

¹³Kura diktatna nei in ka dingsak a, a lampite teng ka tangsak ding: aman ka khopi a bawl nawn ding a, a tatna man uh deih ziak in hilou in, kipahman deih ziak leng hilou in, ka salte a pawtsak ding, sepaihte TOUPA’N a chi, chi in.

¹⁴TOUPA’N hichi in a chi, Aigupta semgimte leh Ethiopia sumsinmi leh Saviate mi sang pipite na kiang uah a hongpai ding ua, nou adin a om ding ua; nou a honzui ding ua; khainiang bun in ahi a hongpai ding uh: huchi in khupboh in, Pathian noumau ah a om hi; a dang himhim a omkei, pathian dang himhim a omkei, chi in, a hong thum ding uhi.

¹⁵Israelte Pathian aw, Hondampa, Pathian kisel nakpa na hi ngut hi.

¹⁶Zahlaktak in a om ding ua, ahi, avek un zumtak in a om ding uh: milim bawlmite zumna ah a lut ding uh.

¹⁷Israelte bel tangtawn hotdamna a TOUPA hotdam in a om ding uh: tangtawn in na zahlak kei ding ua, na zumsak kei ding uhi.

¹⁸TOUPA van siampa’n, amah Pathian, lei bawl a siampa ahi; aman lei a kipsak a, bangmahlou din a bawl kei a, mihing omna ding in a bawl a, hichi in a chi ngal a: Kei TOUPA ka hi; a dang a omkei.

¹⁹A guk in, mun mial ah, thu ka gen ngeikei a; Jakob suante kiang ah bangmahlou ding in honzong un, ka chi ngeikei: kei TOUPA’N diktatna thu ka gen zel a, thudik mahmahte ka gen zel hi.

²⁰Kikhawm unla hongpai un; namchih lak a gawtna pelte aw, hongpai nai chiat un: a sing milim bawltawm tawi a, mi hondam theiloupi pathian kiang a thum zelte’n theihna himhim a neikei uh.

²¹Gen unla, hon pawtkhe sak un; ahi, kidong uhenla: tuma siah a kipan kuan ahia theisak? Nidanglai a kipan kuan ahia gen? Kei TOUPA’N ka hih ahi kei maw? Keimah loungal Pathian dang a omkei; Pathian diktat leh hondampa ka hi; keimah loungal a dang a omkei.

²²Kawlmong a mi tengteng aw, kei lam hong nga unla, hotdam in om un: kei lah Pathian ka hi ngal a, a dang himhim a omkei.

²³Khuk chih ka ma ah a khukdin ding a, lei chih in leng ka kiang ah kichiam in thu a chiam ding chi in kei leh kei kilou in ka kichiamta, thu lah diktatna in ka kam a kipan in a pawtta a, a hongkik nawnta kei ding.

²⁴Min, TOUPA kia ah diktatna leh hatna a om, chi in, ka tanchin a gen ding uh: amah kiang ah mi a hongpai ding ua, a tung a lungkimlou tengteng zahlaktak in a omta ding uh, chi in.

²⁵Israel suan tengteng TOUPA ah ahi, siamtansak a a om ua, TOUPA a suan ding uh, chi in.