Read Paite Chin ISAI 47 Bible Online

ISAI 47 - Paite Chin bible

ISAI 47

¹Babulon tanu nungak aw, hongsuk inla, leivui ah tu in; Kaldai tanu aw, mangtutphah lou ah lei ah tu in: awm nou leh nuamsa honchi nawn lou ding uhi.

²Buhgawizanna suangte la inla, tangbuang bawl in: na kikhuhna puan koih inla, na tentual lem inla, na khe hong inla, luite ngap galkah in.

³Na vuaktanna khuhlouh in a om ding a, ahi, na zahmoh a dawk ding: phu ka la ding a, mi kuamah ka kithuahpih kei ding.

⁴A hontanpa, a min sepaihte Toupa ahi, Israelte Mi Siangthou.

⁵Kaldai tanu aw, daidide in tu inla, mial nuai ah lut in, Gamchih lalnu hon chita kei ding uh TOUPA’N a chi.

⁶Ka mite tung ah ka heh a, ka goutan ka hih thanghuai a, na khut ah k’on pia hi: nang a tung uah hehpihna na langsak kei a; teklamte tung ah nangawn ah na hakkol giktak na nga ahi.

⁷Kei tangtawn in lalnu ding in ka om ding, na chi a: huchi in huai thilte na lungsim in na ngaihtuah kei a, a tawpna ding na theigige sam kei hi.

⁸Huchi in nang nuamtat a om, awlmoh neilou a om, lungsim a, Keimah ka hi, keimah lou midang a omkei uh, meithai in ka tu kei ding a, tate tan thu ka thei sam kei ding, chinu, hiai thei in:

⁹Hiai thil nih, tate tanna leh meithaina in, ni khat thu in mitphiatkal lou in a honpha ding a: na bumna zatna tamngial in, na kivenna tamkuam mahleh, huaite nakpitak in na tung ah a hongtung ding hi.

¹⁰Na gitlouhna muang a; Kuamah in hon muse kei uh, na chi vial ngal a; na pilna leh na theihna in hon hihsia hi: Keimah ka hi, kei lou midang a omkei, na lungsim in na chibehlap hi.

¹¹Huaiziak in thil hoihlou na tung ah a hongtung dia; na veng siamkei ding: vangtahna in a hon buak ding a; huai na hihmang theikei ding: siatna leng thakhat in na tung ah hongtung guih ding a; huai na theikhol kei ding.

¹²Na kikauna leh bumna na zatna, naupang nou na hih a kipan a na kisukgimnate, dinpih inla; na phattuampih theih ding phot a, na zohpih theih ding phot leh.

¹³Na lemtheihna a tam mahmah ziak in na gimta hi: tuin van thutheite, aksi enmite, kha teng a thugenkholmite ding uhenla, na tung a thil hongtung dingte lak a kipan in hon hong uhen.

¹⁴Ngai in, buhpawl banglel ahi ding ua; mei in a kang ding; meikuang thilhihtheihna lak a kipan a kihumbit kei ding uh: hihlumna ding meihol bang ahi kei ding a, awi ding mei bang ahi sam kei ding.

¹⁵Huchibang in na kihihgim nakna thilte nang ading in a om ding uhi: na naupan nou a kipan a na lak a sumsinmite amau lampi chiat ah a vak mang ding ua; hon humbit ding kuamah himhim a omkei ding uh.