Read Paite Chin ISAI 48 Bible Online

ISAI 48 - Paite Chin bible

ISAI 48

¹Aw Jakob inkuan, Aw Israel min kikoppih, Judah tuite apan a pawt, thutak hilou, diktatna ah hi sam lou, TOUPA minlou a kichiam a, Israelte Pathian min lou zelte aw, hiai ngaikhia un.

²Khopi siangthou a mi a kichi ngal ua, Israel Pathian tung ah ginna a nga ua; A min sepaihte TOUPA ahi.

³A tung a kipan in thil masate ka gen a; ahi, ka kam a kipan in a pawt a, ka theisak a; thakhat in ka tangtung sak guih a, a hongtung hi.

⁴Mi genhak na hi uh, na ngawng uh sik tha ahi, na tal uh dal ahi chih ka theih ziak in,

⁵Nidanglai a kipan na kiang uah ka genta; a hongtun ma in na kiang uah k’on theisakta hi: huchilou in zaw, Ka milim in a hih ahi, ka milim bawltawm leh ka milim sun in thu a piak ahi, na chi kha ding uh.

⁶Na zata uh; hiaite tengteng en un; noumau na genta kei ding ua hia? Tua kipan in thil thak k’on theisak ding a, thil kisel na theih ngeilouhte uh.

⁷Huaite nidanglai a siam hilou in, tu a siam ahi; tuni ma in na bil un na za ngeikei uh; huchilou in zaw, Ngai in, huaite i theihsa ahi, na chi kha ding uh.

⁸Ahi, na bil un na za ngeikei ua; ahi, na lungsim un na thei ngeikei uh, ahi, nidanglai a kipan in na bil uh hon in a om ngeikei him hi: lepchiahtak in na hihzel uh chih leh, sul a kipan in talekmi a honchi him uh chih lah ka thei ngal a.

⁹K’on hihman louhna ding in ka min ziak in ka hehna ka hawi lai ding a, phat ka lohna ding in na tung uah ka kidek ding.

¹⁰Ngai un, k’on hihsiang ahi, himahleh dangka hihsiang bang in ahi kei; haksatna haltuina mei ah k’on chian hi.

¹¹Kei leh kei ziak in, ahi, kei leh kei ziak lel in ahi ka hih ding; bang ding in ka min suksiat in a om dia? Ka thupina midang kiang ah ka pe kei ding.

¹²Jakobte leh ka sap Israel aw, ka thu ngaikhia un: kei amah ka hi; a masapen ka hi, a nanungpen leng ka hi.

¹³Ahi, ka khut in lei kingakna a phum a, ka khut taklam in a vante a kaipalh a: ka sap tak in a ding khawm zel uh.

¹⁴Noute aw, kikhawm unla, ngaikhia un; a lak uah kuan hiai thil a gen dia? TOUPA’N amah a it a: aman Babulon tung ah a deihlam a hih ding a, a ban Kaldaite tung ah lik in a om ding.

¹⁵Kei, keimah ngei in, thu ka genta; ahi, amah ka sam a, ka pi a, a lampi zangsak ding.

¹⁶Noute’n honnaih unla, hiai ngaikhia un; a tung a kipan in a sim in thu ka gen ngeikei; a om tung lai a kipan in huai ah ka om: tuin TOUPA Pathian in kei leh a Kha a honsawlta hi.

¹⁷TOUPA, nou hontanpa, Israelte Mi Siangthou in hichi in a chi: Kei, TOUPA na Pathian uh, na hoihna ding ua honchilpa, na paina ding lampi ua honpipa ka hi.

¹⁸Aw noute’n ka thupiakte na ngaikheta hi le uchin, na tung ua lemna lui bang mai a om ding a, na diktatna uh tuipi kihawtte bang mai a om ding hi ven maw:

¹⁹Na suante uh piaunel zah pha ding ua, na gil ua gahte leng piaunel mal neu chikchik zah a pha ding ua; a min uh ka ma a kipan thaimang in a omkei ding, hihman in leng a omsam kei ding, chi in.

²⁰Babulon a kipan pawt unla, Kaldaite taimang san un; hiai lasak husa in genzak in, hilh unla, kawlmong pha in gingsak un, TOUPA’N a sikha Jakobte a tanta, chi un.

²¹Gamdai a a pi lai in a dangtak kei ua: suangpi apan in amau ading in tuite a luangkhe sak a: suangpi a phelkhap a, huchi in tui a hong pawtkhia hi.

²²TOUPA’N, mi thulimloute ading in muanna himhim a omkei, a chi.