Read Paite Chin ISAI 49 Bible Online

ISAI 49 - Paite Chin bible

ISAI 49

¹Tuikulh a te aw, ka thu ngaikhia unla, gamlapi a michih aw, ngaikhia un: TOUPA’N sul apan a honsap ka hi; ka nu gilsung apan in ka min a genta hi:

²Ka kam namsau hiam bang in a bawl a, a khut ah a honsel a; thal nawttet vilvel in honbawl a, a thalbawm ah a honkhum a:

³Ka kiang ah, Nang zaw ka sikha na hi; Israel pahtawi a ka omna ding, na hi, a chi a.

⁴Ken bel, a thawn in ka semgim a, bangmahlou ding leh huihkhua lel ding in ka thapai: himahleh pellou in ka tung a vaihawmna ding TOUPA kiang ah ahi a om, hon ditna ding leng ka Pathian kiang ah ahi a om, ka chi.

⁵Huan, tuin TOUPA, Jakobte a kiang a pi nawnna ding leh, Israelte a kiang a pikhawm a a omna ding un, a sikha a om ding a sul a kipan a hon bawlpan a gen, TOUPA mitmuh in mi zahtakhuai ka hi ngal a, ka Pathian ka hatna ahi behlap hi.

⁶Ahi, aman, Jakob namte tundingna ding leh Israelte lak a humbitte a omsak nawnna ding in, ka sikha a na omzaw, thil neuchik mahmah a hilai: Jentelte vaksakpa ding in k’on sep ding, kawlmong pha a hondampa dia na om theihna ding in, a chi a.

⁷TOUPA, Israelte tanpa leh a Mi Siangthou un, mite muhsitpa, namte kih tuntun, vaihawmmite sikha kiang ah hichi in a chi: Muanhuai TOUPA, Israelte Mi Siangthou, nang hontelpa ziak in Kumpipate’n a mu ding ua, a thou ding uh; mi liante’n amah a be ding uh, chi in.

⁸TOUPA’N hichi in a chi, Hun kipahhuai ah k’on dawng a, hotdamna ni ah k’on panpih hi; k’on hawi ding a, mipite thukhunna ding in k’on pe ding, lei ding kipsak a, gouluah nutsiatsa luahsak ding in;

⁹Suangkulh tangte kiang a, Pawt un, mial a omte kiang a, Hong kilang un, na chih theihna ding in. Lampite ah a ne zel ding ua, tangsang mai pengpong te ah a tatna mun uh a om ding hi.

¹⁰A gilkial un a dangtak kei ding ua; kholum a bawlgim in ni in leng a hai sam kei ding hi: amaute itpa in a pi ding a, tui naknei kiang ah a pi ding a,

¹¹Huchi in ka tang tengteng lampi din ka bawl ding a, ka lamliante leng sansak in a om ding uh.

¹²En in, hiaite gamlapi a kipan in a hongpai ding ua; en in hiaite mallam a kipante, tumlam a kipante in a hongpai ding uh; Sinim gam a kipan in a hongpai ding uhi.

¹³Vante aw, nuamtak in lasa un; lei aw, nuamsa in om in; tangte aw, lasa khe guih un: TOUPA’N lah a mite a lungmuan ngal a, a mi haksa thuakte leng a hehpih ding hi.

¹⁴Himahleh Zion in, Jehovah in a hon paisan a, TOUPA’N a hon mangngilhta, a chi.

¹⁵Numei in a tapa, a gilgah ngei, hehpih louhna ding in a nau nawinelai a mangngilh thei ahia! Thei e, huaite’n zaw a mangngilh uh ahi thei, himahleh ken zaw k’on mangngilh kei ding hi.

¹⁶En in, ka khutpek ah k’on gelh a; na kulhbangte ka ma ah a om gige hi.

¹⁷Na tate a kin ua, hon hihmang mite leh hon hihsemite’n a hon pawtsan ding uh.

¹⁸Dak inla, en vialvial inla, en in: hiai tengteng a kikhawm ua, na kiang ah a hongpai uhi. Ka hinna lou in, Nang pahtawina kisilh bang in hiaite na kisilh a, mou a kigak bang in hiaite in na kigak ngei ding, TOUPA’N a chi hi.

¹⁹Na mun sia leh nutsiatsate leh na gam hihmansa thu zaw tuin a omte ading in na neu lawta ngeingei ding a, nang honvalhte gamlapi ah a omta ding uhi.

²⁰Na ta mansak nung a na ta neih nawnte’n, Mun kei ading in a neu lua a: ka omna ding in mun honpia in, chi in, na bil ah a hon gen ding uh.

²¹Huchi in nang na lungsim in; Hiaite kuan hon suaksak ua eita? Ka tate ka mangsak a, keimah kia sal a, vialvak ka hi a: huchi in hiaite kuan a kem ua eita? Ngai in, keimah kia a nutsiat in ka om ngal a, hiaite koi a na om uh ahia? na chi ding, chi in.

²²TOUPA Pathian in hichi in a chi, Ngai in, namchih ading in khut ka zak in, mi chih ading in ka chiamtehna ka tak khe ding: huchi in na tapate angpom in na kiang ah a honpi ding ua, na tanute leng liangkawlou a suan a pi in a om ding uh.

²³Kumpipate na tate donpate ahi ding ua, kumpinute na tate donnu ahi ding uh: amau a mai ua leisi in a hon be ding ua, na khe a leivui a liak ding uh; huchi in kei TOUPA ka hi chih na thei mai ding, hon ngakmite zahlak in a omkei ding uh.

²⁴Gallakte mi hattak a kipan suh a om in, sal lauhuaite hotkhiak in a om ding uam?

²⁵Om nake, TOUPA’N hichi in a chi, Mi hattak salte suh in a om ding ua, mi lauhuai gallakte hotkhiak in a om ding: nang hondoute dou ding ka hi ngal a, na tate leng ka hondam ding hi.

²⁶Nang hon simmohte amau sa ka nesak ding; uain khum kham bang in amau sisan a kham ding uh: huchi in mi tengteng in, kei TOUPA nangmah Hondampa leh nangmah Tanpa, Jakob Mi Hat ka hi chih, a thei ding uh, chi in.