Read Paite Chin ISAI 5 Bible Online

ISAI 5 - Paite Chin bible

ISAI 5

¹Ka itluat thu, a grephuan tungtang thu, ka itluat ading in la in ka sata mai ding. Ka itluat in tang lei hoih mahmah ah grephuan a nei hi.

²A kimvel in lei a toukuaka, a suangte a tom sianga, grepgui hoihpen a suan a, a lai ah insang a lam a, huai ah grep sukna khuk leng a tou hi. huchi in, grep gah a gah ding in a lamen a, himahleh grep taklou a gah maimah hi.

³Tuin, Jerusalem a omte leh Judah mite aw, “Hehpih in kei leh ka grephuan kal thu hon ngaihtuah dihve ua.

⁴Tua grephuan ah ka hihsa a kan a val a tung ah hih nawn lailai ding bangbang om ahita mai a? Bangziak in ahia, grep gah a gah ding a ka lamet et toh, grep taklou a gah maimah?

⁵Tuin ngai un, ka grephuan tung ah ka hih ding k’on hilh ding: a ling dai ka lamang ding a, nekgaih in a om ding; a suangdai ka chimsak ding a, sikden in a om ding:

⁶Huan, ka hihse vek ding a; satnou in om ken chin, tohvui in leng omsam ken teh; loulingnei leh khau lingneite a pou zaw ding: meite leng a tung a vuah zusak lou ding in thu ka pe ding hi” a chi hi.

⁷Sepaihte TOUPA grephuan Israel inkuanpihte ahi a, Judah mite a kung deihhuai ahi uhi; vaihawmna diktat a lamen a; himahleh, ngai in, nuaisiahna a hongom zawta ahi: diktatna a lamen a, himahleh, ngai in, kikou husa a hongom zawta hi.

⁸Gam laizang a amau kia a om theihna ding ua mi om samna ding mun himhim omlou khop hial a inn leh inn kizomsak zel leh, lou leh lou kizomsakte tung a gik hi.

⁹Sepaihte TOUPA’N ka bil ah hichibang in a chi, “Innte tampi, lian pipite kilawm pipi, a teng ding omlou in a hawm vek ngeingei ding.

¹⁰Grep huan tin sawm mun ah bath khat kia suak ding in a kisa a, buh chi homer khat tuh in ephah khat kia suak ding in lah a kisa ngal a” chi in.

¹¹Zu delh ding a zingkhang pipi a thou a, uain in a khamgawp sak mateng zan sawtpi pi tan a om sakte a tung uh a gik hi.

¹²Tumging leh kaihgingte, khuangta leh tamngaite, uain toh a ankuangluina uahte a om sek a, himahleh TOUPA nasep a ngaisang kei ua, a khut thilhihte leng, a ngaihtuah ngeikei uhi.

¹³Huaiziak in ka mite zaw, theihna a neih louh ziak un, sal a pi in a omta ua: a mi zahtakhuaite uh a gil uh a kial a, a mipite uh dangtak in a dang uh a keu khinta hi.

¹⁴Huaiziak in Sheol in a gilkialna a na liansak a, a kam teh vuallouh khop in a kata a: huchi in a thupinate uh, a mipite uh, a thupi mahmahnate un, a lak ua kipaktak a omte toh a lutsuk ngoingoi uhi.

¹⁵Mi neute kunsak in a om ua, mi liante niamsak in a om ua, kisatheite sukniam in a omta uhi;

¹⁶Sepaihte TOUPA bel vaihawmna a tawisang in a om zawta, Pathian, Mi Siangthou, diktatna a hih siangthou in a omta hi.

¹⁷Huan, belamnoute a tatna mun ua a ta bang un a ta diamdiam ding ua, mi thau pipite mun sesa a thilte vakvaite’n a ne ding uhi.

¹⁸Zuautheihna khaute a thulimlouhna kai a, kangtalai khauzen a kaih bang a khelhna kaisek tung a gik hi!

¹⁹I muhna ding in hihmeng henla, a thilhih ding hihkin heh; i theihna ding in Israelte Mi Siangthou lemtheih hongnai in hongtung hen, chi gigete ngei.

²⁰Thil hoihlou thil hoih chi a, thil hoih lah thil hoihlou chi zel a, vak mial a ngai a, mial vak a ngaisek a, thil khum thil kha a ngai a, thil kha thil khum a ngaisekte a tung uh a gik hi.

²¹Amau pil a kingaihtuahte leh amau mit muh a teite a tung uh a gik hi!

²²Uain dawn lam a mi hattak, zu hel lam a thagui nei mite a tung uh a gik!

²³Golh nek ziak a migilou siamtangsak sek a, mi diktat diktatna laksak sekte ngei.

²⁴Huaiziak in meikuang in buhpawl a liak bei dundun sek bang in leh loupa keu meikuang a a puk zungzung sek bang in a zung uh a muatna bang in a om ding a, a pak uh leivui bang in a tungkah lunglung ding: Sepaihte TOUPA dan a deihkei ua, Israelte Mi Siangthou thu a ngaihneu ziak un.

²⁵Huaiziak in TOUPA a mite tung ah a heh mahmah a, a tung uah a khut a lik a, a vua a, huchi in tangte ah a ling vonvon ua, a luangte uh kongzing lak ah nin bulom bang in a om venvon hi. Huchitel a a hih in leng a hehna lah a dai kei a, a khut a lik lailai hi.

²⁶Namchih gamla tak a mite ading in chiamtehna a tak khe ding a, kawlmong a kipan sam ding in a singsit ding: huchi in, ngai in, amaute kintak in a hongpai pah ding uh:

²⁷Amau lak ah kuamah a gim kei ding ua, a kisui sam kei ding uh; kuamah a lusu kei ding ua, a ihmu sam kei ding uh; a kawnggak ulah phelkol in a omkei ding a, a khedap gakna leng a tansam kei ding hi.

²⁸A thalte uh a zum mahmah a, a thalpeu tengteng uh laisa in a om keukou a; a sakol chinte uh meisah suang a bang a, a kangtalai khete uh leng pingpei a bang hi.

²⁹A husa ging honhon uh humpinelkai humham bang mai ahi. Humpinelkai lunlai humham bang mai in a ging honhon hi: ahi, a ging honhon a, a samat ding uh a man ua, bittak in a paimangpih ua, kuamah in a honkhe theikei hi.

³⁰Huai ni’n tuipi ging hawhaw bang in a tung uah a ging hawhaw ding ua: Huchi in min gam a hon et uleh, ngai in, mial leh mangbatna ngen ahi a, vak lah huai a meite a hihmial in a om hi.