Read Paite Chin ISAI 50 Bible Online

ISAI 50 - Paite Chin bible

ISAI 50

¹TOUPA’N hichi in a chi, Na nu uh makna lai, ka makna, kaw om ahia? Ahihkeileh, ka leibatnate a kuapen kiang ah ahia k’on zuaktak? Ngai un, na thulimlouhnate uh ziak a na nu uh mak a om ahi.

²Bang ziak in ahia ka hongpai a mi himhim a omlouh uh? Bangziak in ahia ka sap a hon dawng ding omlouh uh? Ka khut tan theilou ding a tomsak in a om himhim ahia? Ahihkeileh, humbit ding in thilhihtheihna ka nei ka hia? Ngai un, ka salhna in tuipi ka kangsak a, luipite gamkeu in ka bawl hi: tui himhim a omlouh ziak in a ngasate a uih a, dangtak in a si uh.

³Van mial in ka thuam a, saiip puan a khuhna ding in ka bawl zel, chi in.

⁴Mi gimtak thu a ka tawldamsak siamna ding in sinsakte lei TOUPA Pathian in a honpia: aman zingsang teng a phawng in, sinsakte a theih bang ua thei ding in ka bil a phawng zel.

⁵TOUPA Pathian in ka bil a hon vangsak a, kei zaw ka hel kei, ka lehngat sam kei hi.

⁶Ka nungzang satmite ka doh a, ka biang mul botmite ka doh hi; zahlakna ah leh chilsiatna ah ka mai ka sel kei.

⁷TOUPA Pathian in a hon panpih ding a; huaiziak in ka zum kei a: huaiziak in meisahsuang bang in ka nga zel a, ka zahlak kei ding chih ka thei.

⁸Siam hon tangsakpa a nai hi; kuan ahia hondou ding? Ding khawm ni ung: hondou kua ahia? Honnaih heh.

⁹Ngai in, TOUPA Pathian in hon panpih ding; kuan ahia siamlouh hontang sak ding? Ngai in, huaite puansilh bang in a lui ding ua, kausi in a nese ding.

¹⁰Na lak ua, TOUPA kihta a, a sikha thumang, kua ahia? Mial a vak a, vakna himhim neilou in TOUPA min muang henla, a Pathian ah kinga hen.

¹¹Mei toh a, mei ekte a ki umte aw, ngai un: na mei kuang uah leh na mei ek halte u lak ah vak un. Hiai ka khut a kipan a na muh ding uh ahi hi: lungkham tak a na lupna ding uh.