Read Paite Chin ISAI 51 Bible Online

ISAI 51 - Paite Chin bible

ISAI 51

¹Diktatna delh mite, Nou, TOUPA zong mite aw, ka thu ngaikhia un: noute sekna suangpi lam leh noute tohkhiakna kawkhuk lam en un.

²Na pu uh Abraham lam leh noute hon suangnu Sarah lam en un: khat kia a hih lai in ka sam a, ka vualzawl a, mi tampi ding in ka bawlta hi.

³Na TOUPA’N Zion a luangmuanta ngal a: a mun sesate tengteng a lungmuan a, a gamdai Eden bang in a bawl a, a gamkeu leng TOUPA huan bang in a bawl hi; huai ah kipahna leh nopsaknate, kipahthugenna leh lasak husate a om ding hi.

⁴Ka mite aw, ka thu ngaikhia unla; ka namte aw, ka thu bil na doh un: kei apan in danthu a hongpawt ding a, michih vakna ding in ka vaihawmna ka kipsak ding.

⁵Ka diktatna a nai a, ka hotdamna a pawtta, ka bante’n michih vai a hawmsak ding, tuikulhgamte’n a hon ngak ding ua, ka ban a muang ding uh.

⁶Vanlam ah daktou unla, nuailam ah lei en un: van meikhu bang in a zammang ding a, lei puansilh bang in a lui ding, asung a omte huchi bang in a si ding uh: ka hotdamna bel tangtawn in a om ding, ka diktatna leng hihman in a omkei ding.

⁷Diktatna theimi, ka danthu lungtang a pai mite aw, ka thu ngaikhia un; mihing gensiatna lau kei unla, a hon tainate uh ziak in lunghimawh kei un.

⁸Sim in puansilh a negawp vek bang in, amau a negawp vek ding, nget in samul a ne bang in, amau a ne ding: ka diktatna tangtawn in a om ding a, ka hotdamna suan tengteng tan in a om ding.

⁹Na TOUPA ban aw, halh inla, hatna kisilh in; nidanglai a, tang a suante omlai a na halh bang in halh in. Nang Rahab satzanpa, dragon sunpa na hi ka hia?

¹⁰Nang tuipi, tui thuk zapi tui kangsakpa, tuipi taw tatte kanna lampi dia bawlsakpa na hi ka hia?

¹¹TOUPA tatsate a kiknawn ding ua, lasa kawm in Zion a tung ding ua; tangtawn a kipahna a lu tung uah a omta ding; kipahna leh nopsakna a mu ding ua, lungkhamna leh mauna a mangta ding.

¹²Kei, kei mahmah, nou lungmuanpa ka hi: si ding mihing kihta ding, loupa bang a bawl ding mihing tapa kihta ding nang kua na hi hiam;

¹³Na TOUPA nang hon Bawlpa, van kaipalh a lei kingaknate phumpa, mangngilh a, nuaisiahmi hihse ding a a ngimlai hehna ziak lel a nitum a lau? Nuaisiahmi hehna koi a om ahita a?

¹⁴Sal pimang kintak a khah in a om ding a, suangkul ah a si kei dia, an nekding a tasam kei ding hi.

¹⁵Kei na TOUPA na Pathian, tuipi kihot ging honhonte khen a tuipi tokletpa ka hi ngal a: ka min sepaihte TOUPA ahi.

¹⁶Van ka kaihpalh a, lei kingaknate ka phum theih a, Zionte kiang a, ka mite na hi uh, ka chih theihna ding in ka thute na kam ah ka koih a, ka khut in ka honhum hi.

¹⁷Jerusalem aw, Na TOUPA khut a kipan a hehna nou dawnnu, halh inla, thou in; nang hoihoina nou a nengte na dawn a, na dawn siang sipsip hi.

¹⁸A tapa suan tengteng lak a pi ding kuamah a omkei ua; a tapa vaklet teng lak ah a khut a len kuamah a omkei uh.

¹⁹Hiai thil nihte’n a honphat ahi; kuan a hon kahpih ding ua? Gamna, leh siatna leh kial, leh namsau: bangchi in k’on lungmuan diam aw?

²⁰Na tapate a bah ua, sathak len a awk bang in, kongzing lu lam ah a lum uhi; TOUPA hehna leh na Pathian salhna in a dim uhi.

²¹Huaiziak in, nang hihgentheih leh uain kham hilou a mi kham, hiai za in:

²²Na TOUPA Jehovah, na Pathian, a mite thu genpih pa’n, hichi in a chi, Ngai in, hoihoina nou, ka hehna nou belhbu ngei, na khut a kipan ka lakheta; na dawn nawnta kei ding;

²³Huchi in nang hon hihgentheite khut ah ka koih ding; amau na hinna kiang ah, K’on tot ding un khupboh un, a chi uh: huchi in a tawnmite kiang ah na nungzang lei leh kongzing bang in na doh, chi in.