Read Paite Chin ISAI 52 Bible Online

ISAI 52 - Paite Chin bible

ISAI 52

¹Zion aw, halh in, halh in, na hatna silh in; Jerusalem aw, khopi siangthou, na puansilh kilawmtakte silh in: tuban zeksumlouh leh mi nin na sung ah a lutta kei ding uh.

²Jerusalem aw, na tung a bang leivui sing in; thou inla, tu in: Zion tanu aw, sal a om, na ngawng gaknate phel in.

³TOUPA’N hichi in a chi ngal a: Bangmahlou a zuak na hi ua; huchi in dangka lou a tat na hita ding uh, chi in.

⁴TOUPA Pathian in hichi in a chi hi, Ka mite a tung in Aigupta gam a om ding in a paisuk ua: Assuria mite’n a thu a la bei in a nuaisiah uhi.

⁵Huchi in tuin, hiai ah bang ka hihdia? Ka mite bangmahlou a pimang in a om ua, TOUPA’N a chi. A tung ua vaihawmmite nuam in a awng ua, TOUPA’N a chi, ka min ni tumtum a gensiat in a om hi.

⁶Huaiziak in ka mite’n ka min a thei ding uh: huai ni’n a genpa ka hi chih a thei ding ua; ngai in, keimah ka hi, chi in.

⁷Tangte a tanchinhoih tun a, lemna thu tangkoupih a, thil hoih tanchinhoih tun a, hotdamna thu tangkoupih a, Zion kiang a, Na Pathian kumpi in a tu, chi mi khe a kilawm!

⁸Tua! na galvilmite aw! Aw a suah ua, nuamsatak in la a sa chiat uh; TOUPA Zion a a hong kiknawn chiang in kimatuah a mu ding ahi ngal ua.

⁹Jerusalem mun sesate aw, nuamsa kheguih unla, nuamsatak in la sa un: TOUPA’N a mite a lungmuanta a, Jerusalem a tanta hi.

¹⁰TOUPA’N nam chiteng mitmuh in a ban siangthou a lemta; huchi in kawlmong a mi tengteng in i Pathian hotdamna a mu ding uh.

¹¹Pawt un, pawt un, huai a kipan in pawt un, thil nin himhim lawng kei un; asung a kipan paikhia un; TOUPA belsuan tawite aw, siangthou tak in om un.

¹²Kintak in na paikhe kei ding ua, taikek in na pai sam kei ding uh: TOUPA’N na ma uh pi ding ahi ngal a; Israelte Pathian na nungdal uh ahi ding hi.

¹³Ngai in, ka sikha in piltak in a hih ding, pahtawi leh tawisang in a om ding a, sangpi in a om ding.

¹⁴Mi tampi’n lamdang honsak bang un, a mel mihing mel sang in a siatsak ahi a, a piandan lah mihing tate piandan sang mah a hihsiat in a om.

¹⁵Huchi in aman nam tampi tung ah sisan a theh ding; Kumpipate’n amah lak ah a kam uh a chih ding uh: a kiang ua gen ngeilouh a mu ding ua; bil a a zak ngeilouh uh a ngaisiam ding uhi.