Read Paite Chin ISAI 53 Bible Online

ISAI 53 - Paite Chin bible

ISAI 53

¹I thugen uh kuan a um a? TOUPA khut kua kiang ah ahia a kihil?

²A ma ah thilpou noutak bang in amah lah a dawnkhia, lei keu apan zung bang in a khangkhia hi: piandan hoihna leh mel kilawmna a neikei a; amah i muh un amah i deihna ding un kilawmna a omkei hi.

³Amah mihingte muhsit leh deihlouh in a om a; dahnate neimi leh natna theimi ahi a; amah lak a i mai uh sel bang i hi ua, muhsit in a om a, en lah amah i ngaisang tuankei uhi.

⁴Aman i natnate pua in, i dahnate a pua a: himahleh en bel dahna khu, Pathian vuak, hihgentheih in i bawl uhi.

⁵Himahleh i tatleknate ziak in amah liam in a om a, i thulimlouhnate ziak in vuak sidup in a om a: i lungmuanna ding in sawina a tung ah a kia a; a vuakna golhte a hihdam in i omta hi.

⁶I vek un belam bang in i vakmang ua; eimah lampi tuam chiat uah i pialta uh; TOUPA’N amah tung ah i vek ua thulimlouhna a nga ta hi!

⁷Amah nuaisiah in a om a, himahleh a kingainiam a, a kam a ka kei; belamnou goh ding a pi uh bang leh, belam a mulmetmite ma a a daidide bang mai in; ahi, a kam a ka kei hi.

⁸Nuaisiahna leh vaihawmna a lakmang in a om a; a dam tonpihte’n houh kua in ahia mihing gam a kipan hihman a a om ngaihtuah mahmah? Ka mite tatlekna ziak a dahna khu a hih.

⁹Huan, hiamgam a hih ngeikei a, a kam ah zekhemna om ngeikei mahleh, a han migiloute kiang ah a sehsak ua, a sih nung in mihausa kiang ah a om hi.

¹⁰TOUPA’N, amah vuak sidup a ut him ahi; a dahsakta ngei a: a hinna khelhna adia thillat dia na zat peuhpeuh chiang in, a chisuan a muta ding a, a damsung nite a sausak ding, TOUPA deihlam a khut ah lohching in a om ding hi.

¹¹A kha nauvei gim gah a mu ding a, A lungkimta ding: ka sikha diktattak in a theihna’n mi tampi’n siamtang ding a, a thulimlouhnate uh a puaksak ding.

¹²Huaiziak in miliante tantuan amah ka hawm ding a, gallak sumte aman mi hatte a hawm sam ding hi; a hinna pen si khop hial a A sun buak a, talekte lak a simtel a a om ziak in: himahleh mi tampi khelhna a pua a, talekte a thumsak hi.