Read Paite Chin ISAI 55 Bible Online

ISAI 55 - Paite Chin bible

ISAI 55

¹Ngai un, dangtak peuhmahte aw, tuite ah hongpai un, dangka neiloute; hongpai unla, lei unla ne un! Ahi, hongpai unla, uain leh nawitui dangka pe lou in, a man leng pe lou in lei un.

²An hiloupi a bang ding a dangka pai? Niang leh taina hilou a bang ding a na tha uh pai? Ka thu hoihtak in ngaikhia unla, thil hoih ne un, na hinna uh thil thau in nuamsa hen.

³Na bildoh unla, ka kiang ah hongpai un; za unla, huchi in na hinna uh a hing ding: na kiang uah tangtawn thu ka khung ding, David kiang a huai hehpihna chiamte.

⁴Ngai in, mi chih ading in amah palai in ka sep a, michih ading in pipa leh heutu in ka sep ahi.

⁵Ngai in, na theih ngeilouh na sam ding a, nang hon thei ngeilou nam na kiang ah hongtai ding uh, TOUPA na Pathian ziak leh Israelte Mi Siangthou ziak in; aman a hon pahtawi ngal a.

⁶Muh theih a a omlai in TOUPA zong unla, a nai lai in sam un:

⁷Migilou in a omdan tawpsan henla, mi diktatlou in a ngaihtuahnate tawpsan sam hen: TOUPA kiang ah kiknawn hen, huchi in aman a na hehpih ding; I Pathian kiang uah kiknawn hen, aman a ngaidam mahmah ding hi.

⁸Ka ngaihtuahte na ngaihtuahte ahi kei a, na omdante leng ka omdan ahi sam kei, TOUPA’N a chi.

⁹Van lei sang a a sangzaw bang in, ka omdante na omdan sang in a sangzaw hi, ka ngaihtuahte leng na ngaihtuahte uh sang in a sang lai hi.

¹⁰Vuah leh vuk van a kipan a zu a, huailam ah a kiktou ngeikei, lei a vak zaw hi, thil a pousak in a dawn sak a, buh chi thehmi kiang ah buh chi a pia a, nemi kiang ah nekding a pe zel.

¹¹Huchi mah bang in ka kam a kipan ka thupawt a om ding: bangmah hih neilou in ka kiang ah a kiknawn kei ding a, ka deih bang a hihzou zaw ding a, thilhih ding a ka sawlna ah leng a lohching ding.

¹²Nuamsa tak a pawt in, lungmuangtak a pikhiak a om ding na hi ngal ua: tangliante leh tang neute’n na ma uah la a sa khe guih ding uh, gamlak sing tengteng in leng a khut uh a beng ding uh.

¹³Loulingnei tang in meilah a pou zaw ding a, khaulingnei tang in muising a pou zaw ding: huai TOUPA min hoihna ding leh tangtawn chiamtehna hihman a omlou ding ahi ding hi.