Read Paite Chin ISAI 56 Bible Online

ISAI 56 - Paite Chin bible

ISAI 56

¹TOUPA’N hichi in a chi, Vaihawm zui unla, diktak in hih un: ka hotdamna a hong tungdek in, ka diktatna a hong tungdekta hi.

²Huchibang hihmi leh, huaitak pomgeih mihing tapa in nuam a sa hi; khawlni tanglou lou a, tangzel leh, hoihlou hihlou ding a khut venghoih zel mi.

³Huan gamdang mi, TOUPA toh kizommi in, TOUPA’N a mite lak ah hon hihtuam ding, chi kei leh: michilgeh in, En in, singkeu ka hi, chi sam kei leh.

⁴Ka khawlnite tang a, ka kipahpihlam thilte tel a, ka thukhun pomkip michilgehte tungtang thu ah TOUPA’N hichi in a chi ngal a:

⁵A kiang uah ka inn sung leh ka kulh sungte a tanu leh tapa neite sang mah in theihgigena hoihzaw leh min hoih zaw ka pe ding; a kiang uah tangtawn min, hihman nawn louh ding, ka pe ding, chi in.

⁶Gamdang mite leng, khawlni tanglou lou a, tang zel leh, ka thukhun pomkip peuhmah, TOUPA nasem ding leh, TOUPA min it ding leh, a sikhate a om ding a TOUPA toh kizom peuhmahte;

⁷Amaute mah ka tang siangthou ah ka pi ding a, ka thumna inn ah nuam ka sasak ding; haltum a a thillatte uleh a kithoihnate uh ka maitam a kipahpih in a om ding: ka inn mi chih ading a thumna inn chi ding uh ahi ngal a, chi in.

⁸TOUPA Pathian, delhkhiak Israelte pi khawmpa’n, Amah a pikhawm a omte lou leng namdangte a kiang ah ka pikhawm lai ding, a chi hi.

⁹Gamsa tengteng aw, ahi, gam nuai a sa om tengteng aw, ne ding in hongpai un.

¹⁰A galvilmite a mit uh a taw a, theihna neilou ngen ahi ua; ui aw neilou ngen ahi ua, a na theikei uh; mang nei a, lum gige a, lup hai mi ahi uh.

¹¹Ahi, amaute uite huaihamtak ahi ua; hunsak chih a nei ngeikei uh; theihsiamna neilou belampu ahi ua, amau lampi pi, amau punna lam chiat, a nga ua, avek pi un.

¹²Hongpai un, uain ka la ding a huchi in zu in i kithundim ding; zingchiang tuni bang ahi nawn ding a, ni thupi mahmah ahi ding, a chi chiat uhi.