Read Paite Chin ISAI 58 Bible Online

ISAI 58 - Paite Chin bible

ISAI 58

¹Ngaihtak in kikou in, kidam ken, pengkul bang in na aw suaksak loloih inla, ka mite kiang ah a tatlekna uh hilh inla, Jakob inkuanpihte kiang ah a khelhnate uh hilh in.

²Zon zaw niteng in a honzong zel ua, ka lampi thute theih a kilawp ua: diktat tak a hih leh a Pathian uh vaihawmna tawpsan ngeilou nam bang in ka kiang ah vaihawmna diktat a hon ngen ua, Pathian naih leng a kilawp uhi.

³Bangziak in ahia an ka ngawl ua, na muhlouh? Bangziak in ahia ka kihihgentheih ua, na theihlouh? a chi nak uhi. Ngai un, na anngawl ni un noumau nuamsakna na bawl ua, na nasemmite tengteng na nuaisiah uh.

⁴Ngai un, kihoutheihlouh leh kiselna ding leh, thulimlouhna khuttum a kitum ding in ahi, an na ngawl nak uh: na aw uh tunglam a zak ding in hiai ni’n an na ngawl ngeikei uhi.

⁵Huchibang anngawlna ka deihlam ahi hia? Mi a kihihgentheihna ni ding uh ahi maw? Sialluang bang a a lu kun ding leh, a nuai a saiip puan phah a vut buah ding hia? Huaite anngawlna TOUPA ading a ni kipahhuai na chi ding ua hia?

⁶Hiai anngawlna ka deih lam ahi kei maw? Thulimlouhna a gakna phelsak leh, hakkol khaute sutsak leh, nuaisiahte pawtsak leh, hakkol chiteng hihtan sak.

⁷Na an mi gilkialte kiang a hawm leh, genthei delhkhiakte na inn a pi ahi kei maw? Mi vuaktang muh a puan piak leh, nangmah tanaute a kipan a kisel louh ahi kei maw?

⁸Huai hun chiang in na vak zing nisuak bang in a hongsuak ding a, na damna ding a hong poukhe zok ding: na diktatna in na ma a kai ding a; TOUPA thupina na nungdal ahi ding.

⁹Huai hun chiang in na sam ding a, huchi in TOUPA’N a hon dawng ding; na kikou ding a, huchi in aman, “Hiai ah ka om,” a chi ding. Na lak ua kipan a hakkolte khutzung a mikawkte, mawkpaute na hihman a,

¹⁰Gilkialte kiang a na deihlam pia a, hihgentheih mi na taisak leh, na vak mial lak ah a vakkhe ding a, na mial bikbek sun bang ahita ding:

¹¹Huan, TOUPA’N a honpi gige ding a, mun keu ah leng a hon taisak ding a, na guhte leng a hatsak ding; tui a vak huan bang leh, tuinak nei kang ngeilou bang na hita ding hi.

¹²Huchi in nang a kipan a hongpawt dingte’n mun lui sesate a lem nawn ding ua: suan tampi suangphum ding in na lem tou nawn ding; huchi in nang bel, a selai bawl hoihpa, Mi omna ding a lampite bawl hoihpa, a honchi ding uh.

¹³Khawlni tanglou lou ding a, ka ni siangthou a na deihlam hihlou ding a na khepek na ngat kiksak a, khawlni ni kipahhuai leh TOUPA ni siangthou zahhuai na chih a, nangmah lampi tawnloua, nangmah nopsakna bawlloua, nangmah thu genloua, na pahtawi leh,

¹⁴TOUPA tung ah na kipak ding a, lei munsangte ah k’on tuangsak ding; na pu Jakob gouluah thil in ka honvak ding: TOUPA kam in huai a chita hi.