Read Paite Chin ISAI 59 Bible Online

ISAI 59 - Paite Chin bible

ISAI 59

¹Ngai un, TOUPA khut hondam theilou ding in tomsak in a omkei a; a bil leng za theilou ding in a ngong sam kei:

²Na thulimlouhnate uh noumau leh na Pathian kal ua kia in a honkhen ahi, bil a a zak nop louhna ding in na khelhnate un a mai a hon liahsak ahi.

³Na khutte ulah sisan a hihnit in a om a, na khutzungte ulah thulimlouhna a hihnit in a om hi; na mukte un zuau a gen a, na lei uh ginatlouhna thu gen in a phun nuanua hi.

⁴Kuamah in diktak in thukhawk a gen kei ua, kuamah in thutak in thu a genpih ngeikei uh: huihkhua lelte a muang ua, zuau a gen nak uhi; thilhihkhelhna a pai ua, thulimlouhna a suang zel uhi.

⁵Thangtom tuite a opkhum ua, maimom gil puan a gan uh: a tui nemite a si uhi, hihtap a om ah gul a hongpawt hi.

⁶A maimon gil puante uh puansilh ding in a hong omkei ding a, a thilhihte uh leng a silh sam kei ding uh: a thilhihte ulah thulimlouhna thilhihte ahi a, hiamgamtak a hihna a khut uah a om hi.

⁷A khete uh thil hoihlou lam ah a tai a, gensiat bei sisan suah ding in a kintat nilouh louh uh: a ngaihtuahte ulah thulimlouhna ngaihtuahnate ahi a; gamna leh siatna a lampi uahte a om zel hi.

⁸Lungmuanna lampi a theikei ua; a paina uah dikna himhim a om ngeikei: amau ading in lam kawi bang a bawl ua; huailai a pai peuhmah in lungmuanna a thei ngeikei uh.

⁹Huaiziak in vaihawmna ei a kipan a gamlapi ah a om naknak a, diktatna in a hon phazou ngeikei: vak i ngak ua, himahleh, ngai in, mial a honghi a; vakna i ngak ua, himahleh mial bikbek mah ah i pai uhi.

¹⁰Mittaw bang in bang i mai puampuam ua, ahi, mit neiloute bang in i mai puampuam uhi: khomialtung bang in sun in i kisui ua; mi hatte lak ah misi bang phet i hi uhi.

¹¹Vompite bang in i vek un i ham dupdup ua, vakhute bang in nakpitak in i thum ngutngut uh: vaihawmna i ngak ua, himahleh, a om hetkei hi; hotdamna i ngak ua, himahleh gamlapi ah a hon omsan hi.

¹²I tatleknate I ma uah a khangta a, i khelhnate’n a hon hek gige hi: i tatleknate lah i kiang uah a om gige ngal a, i thulimlouhnate i thei hi:

¹³I takleknate, TOUPA i theihmohbawlte, i Pathian i zuihlouh a i kiheisante, nuaisiah thu leh hel thu i gente, zuauthu i pai ua, lungtang a kipan i genkhiak zelte.

¹⁴Huchi in vaihawmna in nunglam a hong ngatsan a, diktatna in gamlapi ah a hondin santa: thutak lah kongzing ah a puk a, dikna a lut theikei hi.

¹⁵Ahi, thutak a omta kei a; thil hoihlou tawpsanmi gallak in a kibawl zel: Huchi in TOUPA’N huai a mu a, vaihawmna himhim omta lou in a lungkimsakta kei hi.

¹⁶Huan, mi himhim a omkei chih a thei a, ngetsakmi mawngmawng a omlouh uh lamdang a chi a: huaiziak in amah ban mahmah in hotdamna a kibawla; amah diktatna mah in a kilenkip hi.

¹⁷Diktatna lum in a nei a, hotdamna lukhu a khu a; puansilh in phulakna puansilhte a silh a, puanaktual ding in phatuamngaihna a silh hi.

¹⁸A thilhihte uh bang in, a thilhihte uh bang in a man a thuk ding, amah doumite hehna in, a melmate thukna in a thuk ding; tuikulhgamte thukna in a thuk ding.

¹⁹Huchi in Toupa min tumlam a kipan in a lau ding ua, a thupina leng ni suahna a kipan in a lau ding uh; amah lah tui khangguih, Toupa hu a mut luang zoizoi bang in a hongpai ding hi.

²⁰Zion ah Tanpa in a hongpai ding a, Jakobte lak a tatlekna tawpsanmite lak ah leng a hongpai ding, TOUPA’N a chi.

²¹Ken zaw, hiai ahi a kiang ua ka thukhun, TOUPA’N a chi: ka kha na tung a om leh, ka thu na kam a ka koihte’n, tuban tangtawn pha in na kam a pawtsan kei ding ua, na suante kam leng a pawtsan sam kei ding ua, na tusuan sawnte kam leng a pawtsan sam kei ding uh, TOUPA’N a chi hi.