Read Paite Chin ISAI 6 Bible Online

ISAI 6 - Paite Chin bible

ISAI 6

¹Kumpipa Uzziah a sih kum in TOUPA mangtutphah sangtak a tawisan a tu ka mu a, a puansilh mong tual in biakin a dimsak vek hi.

²A kiang ah serafte ading ua; kha guk chiat a nei ua, a kha nihte un a mai uh a khuh ua, nih in a khepekte uh a khuh ua, nih in a leng uhi.

³Huchi in, "Sepaihte TOUPA a siangthou hi, a siangthou hi, a siangthou hi, lei pumpi a thupina in a dim” chi in, a kikou tuah uhi.

⁴Huchi in a kikou husa in kongpi bul suangphum nasan in a lingsak dupdup a, inn meikhu in a dimta hi.

⁵Huaitak in, ken, “Muk ninpu mi ka hi a, muk ninpu mite lak a teng ka hih ziak in ka tung gik hina tele! Mangthang ka hita ve; ka mit in kumpipa, sepaihte TOUPA, a muta ngal a” ka chi hi.

⁶Huchi in, seraf khat, maitam a kipan taiteh a teh, mei am tawi in ka kiang ah a hongleng a, ka kam hongbi hi.

⁷“Ngai in, hiai in na muk a sukhata, huchi in na thulimlouhna lakmang ahita, na khelhna leng sawpsiang ahita” a chi hi.

⁸Huan, “Kua ka sawl dia, kou adia kua kuan ding ahia?” chi in, TOUPA aw ka za hi.

⁹Huchi in, ken, “Kei hiai ah ka om, honsawl ve” ka chi hi. Aman, “Kuan inla, hiai mite va hilh in, bil in zaw za unla, theihsiam bel theisiam kei un; muh zaw mu unla, theih bel theikei un, chi in.

¹⁰Hiai chite lungtang thausak inla, a na uh ngongsak inla, a mitte uh mitsi sak in; huchilou in zaw a mit un a mu ding ua, a bil un a za ding ua, a lungtang un a thei ding ua, a hong kihei nawn ding ua, damsak in a om kha ding uh” a chi hi.

¹¹Huan, ken, “TOUPA bang tan ahi dia?” ka chi a. Aman, hon dawng a, “Khopite a teng ding bei a suksiat a a om a, innte a mi bei a a om a, gam loih sipsip a a om a,

¹²TOUPA’N mite gamlapi ah a suan a, gamsung a mun paisansa tampi a om masiah.

¹³Huan, asung ah sawm lak ah khat leng omlai om leh nekkhit in a om behlap ding uhi: himahleh nahhi leh tosaw phukkhit nung a a bul a om nilouh bang in chi siangthou a bul om nilouh ahi” ka chi hi.