Read Paite Chin ISAI 60 Bible Online

ISAI 60 - Paite Chin bible

ISAI 60

¹Thou inla, vak in; na vak a hongtung a, TOUPA thupina na tung ah a hong suakta hi.

²Ngai in, mial in leitung a khuh ding a, mial bikbek in mite a khuh ding ahi; himahleh na tung ah TOUPA a hongsuak ding a, thupina na tung ah a hong kilang ding hi.

³Huchi in namchih na vak lam ah a hongpai ding ua, kumpipate leng n’ong suah vakna lam ah a hongpai ding uh.

⁴Dak inla, na mit in en vialvial in, en in, avek un a kikhawm ua, na kiang ah a hongpai uhi: na tapate gamlapi a kipan in a hongpai ding ua, na tanute a hong don ding uhi.

⁵Huai hun chiang in na mu ding a, na vakta ding a, na lungtang kipak in a ling ding, zat sak in a om ding; tuipi a hauhsakna in na kianglam a honnaih ding a, namte thahatna na kiang a hongtun ding ziak in.

⁶Sangawngsau tampi’n hontuam ding ua, Midian leh Ephah gam a sangawngsau tuaite’n; huaite tengteng Sheba gam a kipan in a hongpai ding uh: dangkaeng leh begaw a honpaw ding ua, TOUPA phatna thu a theisak ding uhi.

⁷Kedarte ganhon tengteng na kiang ah a omkhawm in a om ding ua, Nebajoth a belamtalte’n na nna a sem ding uh: ka maitam ah kipak in a paitou ding ua, ka thupina in ka pahtawi ding.

⁸Mei bang a leng leh, vakhu amau tohlet zuan a leng duamduam bang kuate ahi ua?

⁹Aman a hon pahtawi ziak in TOUPA na Pathian min ding leh Israelte Mi Siangthou ading in na tapate a dangka uleh dangkaeng toh gamlapi a kipan a pi din pellou in tuikulhgamte’n a honngak ding ua, Tarsish long liante’n masakpen a tuh ding.

¹⁰Huan, gamdang mite’n kulh bangte a lemtou nawn ding ua, a kumpipate un na nna a sem ding uh: ka heh in k’on sat a, himahleh ka hon deihsakna in k’on hehpih leuleu hi.

¹¹Na kongkhakte leng hon in a om gige ding ua; sun le zan in a khak kei ding uh; mite’n namchih sum na kiang a a hontawi ua, a kumpipate uh a honpi theih sam na ding un.

¹²Na nna sem nuamlou nam leh gam a mangthang ding uhi; ahi, huai namte zaw suksiat in a om ding uh.

¹³Ka Mun Siangthou zem ding in Lebanon thupina na kiang ah a hongpai ding, meilahte, phante, singgelh chi a hong paikhawm ding ua Ka khe sikna mun ka thupi bawl ding hi.

¹⁴Nang honhih gentheite tapate kun in na kiang ah a hongpai ding ua; nangmah musitmite na khepek nuai ah a kun ding ua, nang bel TOUPA khopi, Israelte Mi Siangthou Zion, a honchi ding uh.

¹⁵Kuamah veh ngeilouh khopi, paisan leh huat a na om sang in tangtawn suanpen, suan tampi kipahna ding in k’on bawl ding.

¹⁶Namchih nawitui na tep ding a, kumpipate nawi leng na tep ding: kei TOUPA zaw nang hon hondampa leh nang Tanpa, Jakob Mi Hat ka hi chih na honthei ding hi.

¹⁷Dal tang in dangkaeng k’on la ding a, sik tang in dangka k’on la ding, sing tang in leng sumbelsik, suang tang in sik: lungmuanna na heutu ding in ka sep lai ding a, diktatna nang hon phutmi ding in ka sep ding hi.

¹⁸Hiamgam a thilhih husa na gam ah zak ahita kei ding a, hiamgamna leh siatna husa leng na gamgi sung ah zak ahita kei ding; na kulh Hotdamna, na chi zaw ding a, na kongkhakte leng, Phatna, na chi ding hi.

¹⁹Sun a nang hontan ding ni a hi kei ding a; kha leng vakna ding in a hon vaksak sam kei ding: TOUPA bel nang ading in tangtawn vaksakpa ding in a om ding a, na Pathian leng na thupina ding ahi ding.

²⁰Na ni a tumta kei ding a, na kha leng a mangta kei ding hi: TOUPA tangtawn vaksakpa ahita ding a, na lusun nite a tawp ding hi.

²¹Na mite avek un mi diktat ahi ding ua, na gam a luah tawntung ding uh: pahtawi a ka om theihna ding a amau a zung selkhia ka suan, ka khut suak ahi ding uh.

²²Mi tawmpen sang khat ahi ding ua, mi neupen leng nam hatte ahi ding uhi, kei TOUPA’N a hunhun in ka tungsak pahpah ding.