Read Paite Chin ISAI 61 Bible Online

ISAI 61 - Paite Chin bible

ISAI 61

¹Liangvaite kiang a Tanchin hoih gen ding a TOUPA’N thau honnilh ziak in TOUPA Pathian kha ka tung ah a om; aman, lungtang khasiate tuam ding, salte kiang a pawtna thu leh saltangte kiang a tanin honna thu gen ding.

²TOUPA lungkim kum thu leh i Pathian phulak ni thugen ding bang, lungkhamte lungmuan ding bang,

³Vut tang a pakkhigui bang, lungkham tang a nuamna thau bang, nguina kha tang a phatna puansilh bang a kiang ua piak ding, Zion a lungkham a omte ading a seh ding bang in a honsawl ahi: Amah pahtawi a a omna ding in, diktatna sing TOUPA suante chih, a hih theihna ding un.

⁴Mun lui sesate a lem nawn ding ua, tuma a khua sesate a ding hoih saknawn ding ua, khopi sesa, suan tampi gamnate, a bawlhoih nawn ding uh.

⁵Gamdangmite’n na ganhonte uh ding in a vak ding ua, theihngeilouh mite na leiletmi ding un leh na grepgui uh kemmi ding in a om ding uh.

⁶Nou bel, TOUPA siampute, chih a loh in na om ding uh: mite’n i Pathian nasemmite a honchi ding uh; namchih sum na ne ding ua, a thupina uh na suang ding uh.

⁷Na zahlakna gun uh a lehnih na mu ding ua; na zum gun un na tantuan uah nuamsa in la na sa ding uh; huaiziak in na gam uah a zahnih na luah ding ua; tangtawn nopsakna nou a ahi ding.

⁸Kei TOUPA’N vaihawmna dik ka deih a, thulimlou tak a hiamgam zaw ka hua hi; huchi in amau ka thukna chihtak ngial in a kiang uah ka pe ding a, a kiang uah tangtawn thu leng ka khung ding.

⁹Huchi in a suante uh namchih lak a theih ahi ding ua, a tate uh michih lak a theih ahi ding uh: amau mute’n TOUPA vualzawl chi ahi uh chih a thei ding uhi.

¹⁰TOUPA ah nakpitak in nuam ka sa ding a, ka hinna Pathian ah kipaktak in a om ding; mouneipa ding pakkhigui a kizep bang leh, mou ding a kivatnate a a kivan zel bang in, ama’n hotdamna puansilhte a hon silhsak a, diktatna puanaktual in a hon tuamta hi.

¹¹Leitung in a thil dawn a pawtsak bang leh, huan in asung a thil chinte a dawnsak bang in, TOUPA Pathian in diktatna leh phatna nam chiteng ma ah a dawnkhe sak ding ahi.