Read Paite Chin ISAI 62 Bible Online

ISAI 62 - Paite Chin bible

ISAI 62

¹A diktatna uh vakna bang a suah a, amah hotdamna khawnvak kuang bang a a suah masiah, Zion ziak in ka dai nilouh kei ding a, Jerusalem ziak in ka om kinken kei ding.

²Huchi in na diktatna a mu ding ua, kumpipa tengteng in na thupina a mu ding uh: huan, min thak, TOUPA kam in a sak ding in, a honsam ding uh.

³TOUPA khut a kilawmna lallukhu leh i Pathian khut a thupina lukhu na hi ding.

⁴Lamdang, a honchi nawn kei ding uh; na gam leng, Hihsiat a chi n’on sam kei ding uh; Hephzibah, a hon chita ding ua, na gam leng Biulah, a chi ding uhi: TOUPA na tung ah a kipak ngal a, na gam in pasal a nei ding hi.

⁵Tangval in nungak zi a a neih bang in na tapate’n zi in a hon nei ding uh: mou neimi mou tung a a kipah bang in, na Pathian na tung ah a kipak ding hi.

⁶Jerusalem aw, na kulhtung ah galvilmi ka vilsak a; sun leh zan in chiklaimah in a dai kei ding: nou TOUPA theihpih ding a omte aw, om kinken hetkei un.

⁷Amah leng om kinken sak kei un, Jerusalem a hihkip a, lei a phathuai a a bawl masiah.

⁸TOUPA’N a khut taklam leh a banhat lou a a kichiam in, na buh nang hon doumite an ding in ka pe nawn kei ding a: gamdang mite’n na sepkhiak uain a dawn nawn kei ding uh.

⁹A buh late’n a ne zaw ding ua, TOUPA a phat ding ua a loumite’n ka Mun Siangthou huangsung intual ah a dawnta ding, chi in.

¹⁰Pawt unla, kulh kongpite ah pawt un; mite din lampi bawl unla; sungvum un, lamlian sungvum un; suangte tomsiang unla; mite ading in chiamtehna takkhia un.

¹¹Ngai un, kawlmong pha in huchi in a theisak ahi, Zion tanu kiang ah hichi in gen un, En in, nangmah hotdamna a hongtung ding; en in, a kipahman a kiang ah a om hi, a ditna leng a ma ah a om hi.

¹²Huchi in amau, Misiangthoute, TOUPA tatte, a chi ding uh; nang zaw Zonkhiak, Paisan louh khopi a honchi ding uh, chi in, a chi hi.