Read Paite Chin ISAI 63 Bible Online

ISAI 63 - Paite Chin bible

ISAI 63

¹Edom gam a kipan hongpai, Bozrah khua a kipan puansilh diahsan silh kua ahia? A puansilh a thupitak, a hatna a thupidan bang a hongpai? Kei TOUPA diktattak a thugen a, hotdam lam a mihat mahmah ka hi.

²Bangziak a na puansilh san a, na silhlehtente leng grep sukna khuk a chiltaimi silhlehten bang a om ahia?

³Keimah kia in grep sukna khuk ah ka chiltai a; michih lak a mi khat lel leng ka kiang ah a omkei uh; ahi, amau ka heh a ka chil a, ka heh a ka pal a: huchi in a hinna sisan uh ka puansilhte ah theh in a om a, ka puan tengteng ka hihninta hi.

⁴Phulak ni ka lungtang ah a om a, ka tatsa mite kum leng a hongtungta ahi.

⁵Huchi in ka en a, panpih ding mi a omkei ua; len ding mi a omlouh uh lamdang ka sa a: huaiziak in keimah ban mahmah in hotdamna honpuak a; ka hehna in a hon lenkip hi.

⁶Huchi in, michih ka heh in ka sikden a, ka heh in ka khamsak a, a hinna sisan uh lei ah ka bawta hi.

⁷TOUPA’N thil bangkim a honvuh bangzel in TOUPA chitdanthute leh toupa phatna thute ka gen ding a; a hehpihnate leh a chitna thupidante bangzel a Israel inkuanpihte lak a a hoihna thupi mahmah a a tung ua a vuh thu leng ka gen ding hi.

⁸Aman, Ka mite, hitaktak hi ua, zuautat lou ding tate ahi uh, a chi hi. Huchi in amaute hondampa din a hong omta hi.

⁹A mangbatna tengteng uah amah a mangbang a, angel, a ma a om in, amaute a humbit a: a itna leh a hehpihna in a tanta a; nidanglai ni tengteng ah amaute a pua in amaute a pom hi.

¹⁰Himahleh a hel un, a Kha Siangthou a lungkhamsak ua: huaiziak in amau dou ding in kilehheisak in a om a, amau a sualta hi.

¹¹Huailai in a mite’n Mosi nidanglai nite a theigige ua, hichi in a chi uh, Tuipi a kipan a a belamhon chingmite toh amaute pi TOUPA koi a om ahia? A Kha Siangthou a lak ua koihpa koi a om ahia?

¹²A ban thupitak Mosi taklam a paisakpa koi a om ahia? Tangtawn min kibawl nadia a ma ua tui kikhensakpa koi a om ahia?

¹³A kisuihlouhna ding ua tui thuktak a, gamdai a sakol pi bang a, amaute pikaipa koi a om ahia?

¹⁴Guam a gan paisukte bang in TOUPA Kha in amau a khawlsak a: huchibang in, min thupitak na kibawl na ding in, na mite na pi hi, chi in.

¹⁵TOUPA, Van a kipan in hon ensuk inla, na siangthouna leh na thupina omna a kipan in hon en in: na phatuamngaihna leh na thilhih thupitakte koi ah? Na lungtang a n’on ngaihna leh n’on hehpihna, kham a omta hia?

¹⁶Abraham in hon theilou in, Israel in leng hon limsak keimah leh, nang zaw ka Pa uh na hi a: nang zaw, aw TOUPA, ka Pa uh na hi a; na min tangtawn a kipan in kou Hontanpa na hi.

¹⁷TOUPA aw, nang bangziak in ahia na lampi a kipan a hon vakmangsak na hia? Na sikha, na gouluah namte ziak in hongkik nawn in.

¹⁸Na misiangthoute’n sawtlou chik kia a nei ua: hondoute’n lah na min siangthou a sikgawpta uh.

¹⁹A tung ua vai na hawm ngeilouhte, na min pu ngeiloute namte ka bangta uhi.