Read Paite Chin ISAI 64 Bible Online

ISAI 64 - Paite Chin bible

ISAI 64

¹Aw tangte na ma a a luankhiak zoizoina ding un, van botkek in hong kumsuk teitei lechin aw.

²Namchih na ma a a linna ding un nang hondoute kiang a na min theihsakna ding in, mei in sing nen a kuangsak a, mei in tui a sousak bang in!

³Ka lamet louh uh thil mulkimhuai na hihlai in na hongsuk a, tangte na ma ah a luangkhe zoizoi uhi.

⁴Nidanglai a kipan in mite’n, nangkia loungal, amaute ngak ding a, sepsak zelpa Pathian a thei ngeikei ua, bil in lah a za ngeikei ua, mit in leng a mu ngei sam kei uhi.

⁵Nang zaw, nuamtak a om a diktat tak a hih mi, na lampite a nang hon theigigete, na don a; ngai in, nang na heh a, kou thil ka hihkhial ua; huaite ah sawtpi ka omta ua, huchi in hotdam in ka om thei lai ding uam?

⁶Mi nin bang in ka na om vekta ngal ua, ka diktatna teng uh leng puansilh nin bang ahi: ka vek un nah bang in ka vuai ua; ka thulimlouhnate un huih bang in a hon mutmang zel hi.

⁷Huchi in na min lou a, nang honlen ding a kihihhalh kuamah a omkei uh: kou a kipan in na mai na selta ngal a, ka thulimlouhnate uh zang in n’on mangsakta hi.

⁸Tuin zaw, aw TOUPA, nang ka pa uh na hi; kou bellei ka hi ua; nang kou honvelpa na hi; huchi in ka vek un na khutsuak ka hi uh.

⁹TOUPA aw, heh kenla, thulimlouhnate leng tangtawn in theigige ken: ngai in hehpih in hon en inla, ka vek un nangmah mite ka hi uhi.

¹⁰Na khopi siangthoute gamdai a hongsuak ua, Zion gamdai a hongsuak a, Jerusalem mun nawtsiat a hong hita hi.

¹¹Ka inn siangthou uleh ka inn kilawm tak uh, ka pipute un nang a honphat zelna uh, mei a hal ahi; ka thil deihhuaite tengteng ulah hihsiat in a omvekta ngal a.

¹²TOUPA aw, huai thilte ah na kidek thei ding ahia? Na dai nilouh in n’on hihgenthei nilouh ding ahia?