Read Paite Chin ISAI 65 Bible Online

ISAI 65 - Paite Chin bible

ISAI 65

¹Kei hondeih ngeiloute zon in ka om; hon zong ngeiloute muhkhiak in ka om: ka min pulou nam kiang ah, “Hon en un, hon en un” ka chi hi.

²Mi helhatte ading in nitum in ka bante ka zak, huaite bel amau ngaihtuahnate bangzel a lampi hoihlou a paite ahi.

³Huante a kithoih a, teklei tungte a banghiam gimlim hal a, ka maitang mahmah a hon hihheh nakte.

⁴Han lak a te tu a, mundaite a giak zelte, voksa ne a, a belte ua thil kihhuai tuichik om zelte.

⁵Nang kia in ding in, hon naihken, nang sang in ka siangthou zaw hi, chite ahi uh: huaite bel ka nak a meikhu om, nitum a mei mitlou om gige nakte ahi uhi.

⁶Ngai in, ka ma ah gelh in a om: ka dai nilouh kei ding a, ka thuk ding, a angsung uah ka thuk ding.

⁷Noumau thulimlouhna leh na pute uh thulimlouhnate, TOUPA’N a chi, huaite’n lah tangliante tung ah gimlim a hal ua, tang tungte ah ka min a gensia uhi: huaiziak in a nasep uh a masapen in a angsung uah ka tehsak ding hi.

⁸TOUPA’N hichi in a chi, Grep bawm ah uain thak a mu ua, min, Hihse ken, huai ah lah vualzawlna a om ngal a, a chih bang un, ka sikhate ziak in ka hih sam ding, avek ua ka suksiatlouna ding in.

⁹Huan, Jakob a kipan in chi khat ka pawtsak ding a, Judah a kipan in ka tangte luah ding ka pawtsak ding: huchi in ka mitelte’n huai a luah ding ua, ka sikhate huai ah a om ding uhi.

¹⁰Huan, ka mi, kei hon zongte ading in, Sharon belamhonte huang ahi ding a, Akor guam bel bawnghon kualna mun ahi ding hi.

¹¹Himahleh nou TOUPA paisan a , ka tang siangthou mangngilh a, Vangphatna pathian ading a dohkan bawl a, Tanhun ngaihtuahsaknu ding a dawn thillat lante aw;

¹²K’on saplai in n’on dawng nuam kei ua, thu ka gen lai in na za utkei ua, ka mitmuh in thil gilou na hihzaw ua, ka kipahpih louh thil na telzawk ziak un namsau in na tanhun uh k’on ngaihtuahsak ding a, na vek un thahna ah na kunvek ding uh.

¹³Huaiziak in TOUPA Pathian in hichi in a chi a, Ngai un, ka sikhate’n a ne ding ua, nou bel gilkial in na om ding ua: Ngai un, ka sikhate’n a dawn ding ua, nou bel dangtak in na om ding uh: ngai un, ka sikhate’n nuam a sa ding ua, nou bel na zum ding uh:

¹⁴Ngai un, ka sikhate lungtang a kipah ziak un la a sa ding ua, nou bel lungtang a na lungkham ziak un na kap ding uh, kha a na vui ziak un na mau vungvung ding uh.

¹⁵Huan, na min uh kichiamna ding in ka mi telte kiang ah na nuse ding ua, TOUPA Pathian in a honthat ding hi; huan, a sikhate min dang in a samta ding hi.

¹⁶Huchi in, lei a amah ki vualzawl tawm mi bel thutak Pathian ah a ki vualzawl ding a; lei a a kichiammi in thutak Pathian lou in a kichiam ding; nidang a lungkhamnate mangngilh a a omtak ziak in leh ka mit a kipan a sel a a omtak ziak in.

¹⁷Ngai un, van thakte leh leithak ka siam ahi; nidanglai thilte zaw theihgige in a om nawn kei ding a, lungsim ah leng a lut nawn kei ding hi.

¹⁸Himahleh ka thilsiam ah tangtawn in kipak in nuamsa un; ngai un, Jerusalem nuamsakna ding in ka siam a, a mite kipahna din ka bawl hi.

¹⁹Jerusalem tung ah nuam ka sa ding a, ka mite tung ah leng ka kipak ding: asung ah kap husa zak ahi nawn kei ding a, mau husa leng zak ahi nawn kei ding hi.

²⁰Huai a kipan a pawtzaw naungek ni sawtlou chik dam a omkei ding ua, putek a damsung nite tangtun lou leng a omkei ding uh; naupang lah kum za a upa in a si ding ua, mikhial kum za lel dam zaw hamsethuak ahi ding uhi.

²¹Huan, innte a lam ding ua, huaite ah a om gige ding uh; grephuan a bawl ding ua, a gah leng a ne ding uh.

²²Midang omna ding in inn a lam nawn kei ding ua, midang nek ding in grephuan a bawl nawn kei ding uh; sing damsung nite bang in ka mite damsung nite lah om ding ahi ngal a, ka mi telte zaw sawtpi a sepkhiak tung uah a kipak ding uhi.

²³Bangmahlou in a semgim kei ding ua, vangtah lel ding in ta a neisam kei ding uh; TOUPA vualzawlmi suante ahi ngal ua, a tate uh a kiang uah a om nilouh ding uh.

²⁴Huan, hichi ahi ding a, amau honsap ma un ka dawng ding a; thu a gen sanlai un leng ka bil in ka za ding hi.

²⁵Ngia leh belamnou a gamta khawm ding ua, humpinelkai in bawngtal bang in buhpawl a ne ding; leivui gulpi an ahi ding. Ka tang siangthou ah a kihihna nawn kei ding ua, a kihihse nawn sam kei ding uh, TOUPA’N a chi.