Read Paite Chin ISAI 66 Bible Online

ISAI 66 - Paite Chin bible

ISAI 66

¹TOUPA’N hichi in a chi, “Van ka tutphah ahi a, lei ka khe ngakna ahi: inn bangchibang ahia n’on lamsak ding uh? Koilai ahia ka khawlna ding?

²Hiai thil bangkim lah ka khut a ka bawl ahi ngal ua, huchi in hiai thil bangkim a hong omta ahi, TOUPA’N a chi: himahleh hiai mi genthei tak a om, lungsim a kisik tuntun, ka thu a ling zelzaw ka en zaw ding.

³Bawngtal goumi zaw mi that bang ahi a; thilpiak lanmi zaw vok sisan lanmi bang ahi a; begaw halmi zaw milim vualzawlmi bang ahi: ahi, amau lampi a telta ua, a thilkihhuaite uah a lungsim uh a kipak zel.

⁴Ka saplai a kuamah in hon dawn kei ua, thu ka gen lai a bil a a zak louh ua, ka mitmuh a thil gilou a hih zawk ua, ka thil kipahpihlouh lam a tel ziak un ken leng amau khemna dingte ka telsak ding a, a kihtak lam uh a tung uah ka tungsak ding” chi in.

⁵A thu a lingte aw, TOUPA thu za un: na unau uh, nou hon hawpa leh ka min ziak a nou hon delhkhete’n, Na kipahman uh ka muhtheih na ding un, TOUPA hih thupi in om hen, a chi ua, himahleh a zum zawta ding uh.

⁶Tua! Khopi a lum vengvung husa! Biakin husa eive! a melmate thukpa Toupa husa eive!

⁷Aman vei manlou in nau a nei a; na manlou in pasal naupang a nei hi.

⁸Huchibang kuan a za ngei a? Huchibang kua ahia a mu ngei? Ni khat in gam a piangguih ding ahia? Thakhat in nam suan in a omguih ding ahia? Zion in nau a veitak in a tate a neipah hi.

⁹Pian hun tungsak ngal in ka neikei ding ahia? TOUPA’N a chi: kei neisak zelpa’n ta ka neisak phal kei ding ahia? Na Pathian in a chi.

¹⁰Jerusalem itte tengteng aw, Jerusalem nuamsakpih unla, kipahpih un: amah sunte tengteng aw, kipah ziak in nuamsak pih un.

¹¹Na tep ua, a lungmuanna nawite a na tai theihna ding un leh, na tep peng ua, a thupina tampi a na kipah theih na ding un, chih.

¹²TOUPA’N hichi in a chi ngal a, ngai un, lemna luipi bang mai in a kiang pha in ka luangsak ding a, namchih thupina luita a kuang a let zoizoi bang mai in a kiang pha in ka luangsak ding, huchi in huai na tep ding uh; hon angpom ding a, a pheipi tung ah a hon tawmsak ding hi.

¹³Mi, a nun a lungmuan bang in k’on lungmuan ding; huchi in Jerusalem ah lung muan in na om ding uhi.

¹⁴Huai na mu ding ua, na lungtang un nuam a sa ding a, na guhte uh leng loupa hing dipdip bang in a pha lihliah ding: huchi in TOUPA khut a sikhate lam ah a om chih a thei ding ua, a melmate tung ah a lungkim kei ding.

¹⁵Ngai un, a hehna thangpaihna a thuk ding leh, a salhna meikuang a thuk ding in TOUPA mei toh a hongpai ding hi, a kangtalaite pingpei bang mai ahi ding hi.

¹⁶Mei in ahi, TOUPA’N a ngaihtuah ding, a namsau in ahi mi tengteng a ngaihtuah ding: huchi in TOUPA hihlupte zaw tampi ahi ding uh.

¹⁷Huante ah a hoh ua, a lai a mi nung a om khepkhup ding a kihihsiangthou leh kisiangsak zelte, voksa leh thil kihhuai leh chikpi nete, a mangthang khawm ding uh, TOUPA’N a chi.

¹⁸A thilhihte uleh a ngaihtuahte uh lah ka thei ngal a: namchih leh pauchih ka pikhawm hun a hongtung sin; huchi in a hongpai ding ua, ka thupina a mu ding uh.

¹⁹Huan, a lak uah chiamtehna ka omsak ding a, huchi in a lak ua gawtna pelte peuhmah namchih kiang ah Tarsishte, Pulte, thangpeu laite Lud kiang ah, tuikulhgam gamlapi, ka minthanna za ngei nailou Tubal leh Javante kiang ah, ka thupina mungei nailoute kiangte ah ka sawl ding; huchi in namchih lak ah ka thupina thu a gen ding uh.

²⁰Huchi in, Israel telte’n a thillat uh belsuan siangthou tak a TOUPA inn a a honglutzel bang un, TOUPA kiang a thillat ding in namchih teng lak a kipan na unaute tengteng uh sakol tung, kangtalaite, zawnnate, sabiltung tungte, sangawngsau tungte ah, Jerusalem ka tang siangthou ah a honpi ding uh, TOUPA’N a chi.

²¹Huan huaite lak a kipan in siampu dingte leh Levimi dingte ka la ding, Toupa’n a chi.

²²Ka bawl ding van thakte leh lei thak ka ma ah om gige ding bang in, na suante uh leh na min uh leng a om gige ding ahi, TOUPA’N a chi.

²³Huan, hichi ahi ding a, kha thak a kipan a kha thak dang tan in, khawlni a kipan a khawlni dang tan in mi tengteng ka ma a hon be ding in a hongpai zungzung ding uh, TOUPA’N a chi.

²⁴A paikhe ding ua, ka tung a talekte luang a en ding uh: a thante uh a si kei ding a, a meite uh leng thah in a omsak kei ding hi; mitengteng ading in thil kihhuai mahmah ahi ding uhi.