Read Paite Chin ISAI 7 Bible Online

ISAI 7 - Paite Chin bible

ISAI 7

¹Huan, Uzziah tapa Jotham tapa Ahaz vaihawmlai in hichi ahi. Suria kumpipa Rezin leh Israel kumpipa Remaliah tapa Pekah Jerusalem sim ding in a kuantou ua; himahleh a zou kei uhi.

²Suria leh Ephraim a pangkhawmta uh, chi in David inkuanpihte a hilh ua, huchi in a lungtang leh a khua leh tuite lungtang, gamnuai singte huih in a mutling suausuau bang in, hihlin in a hong omta hi.

³Huchi in TOUPA’N Isai kiang ah, “Nang leh na tapa Shearjashub, dil saknung zaw pen tuilakna tawp ah, Puansawpmi gam lamlian ah, Ahaz dawn ding in kuan khia unla;

⁴A kiang ah, Pilvang inla om kinken in; meisel sum khu lel nih, Suria toh Rezin leh Remaliah tapa hehna thupitak kihta kenla, na lungtang taikek kei hen.

⁵Suria in, Ephraim leh Ramaliah tapa toh nangmah tung a gitlouh a sawmtak ziak in, chi in a chi.

⁶Judah dou ding in kuantou ni’n, vahihlau ni, eimah ading ngei in i vazou dia, a laitak ah Tabeel tapa kumpipa in i tusak ding” chi in.

⁷TOUPA’N hichibang in a chi: “A thusawm uh a piching kei ding a, a vuaksuak ding.

⁸Suria lutang Damaska ahi a, Damaska lutang Rezin lah ahi ngal a: kum sawmguk leh kum nga man ma in Ephraim chi chihtaklouh a om ding in suksiat vek in a om ding:

⁹Huan, Ephraim lutang Samaria ahi a, Samaria lutang Remaliah tapa lel a hih ziak in. Na up nopkei uleh hihkip in na omkei hial ding uh” chi in, a chi hi.

¹⁰TOUPA’N Ahaz a houpih nawn a,

¹¹“TOUPA na Pathian kiang ah chiamtehna ngen in; thukpi ah hiam, tunglam sangpi ah hiam ngen in” a chi hi.

¹²Ahaz in bel, “Ka ngen kei ding, TOUPA ka ze-et kei ding” a chi hi.

¹³Huan, aman, “David inkuanpihte aw, tuin ngaikhe dih ua; mihing hihgim thil neuchik din na sep uh maw, ka Pathian nangawn hihgim na ut zel uh?

¹⁴Huaiziak in TOUPA mahmah in chiamtehna nou a honpe ding; ngai un, nungak siangthou khat a gai ding a, tapa a nei ding a, a min ‘Immanuel’ a sa ding uh.

¹⁵Aman thil hoihlou lam deihlouhna dan a theih chiang in leh, thil hoih lam deihna dan a theih chiang in bawngnawi dat leh khuaizu a ne ding.

¹⁶Naupang thil hoihlou lam deihlouhna dan leh thil hoih lam deihna dan a theih ma in leng kumpipa nih na gam huatte taisan in a om ding hi” a chi hi.

¹⁷“Ephraim in Judah a nutsiat ni a kipan tung ngei nailou nite TOUPA’N na tung ah leh, na khua leh tuite tung ah leh, na pa inkuanpihte tung leh Assuria kumpipa mahmah tung ah a tungsak ding hi.

¹⁸“Huai ni chiang in hichi ahi ding a, TOUPA’N Aigupta luinak a thou om leh, Assuria gam a khuai om, sam ding in a singsit ding hi.

¹⁹Huchi in a hongpai ding ua, avek un guam leh kense lak ah, suangpi hawm ah, loulingnei tengteng leh gantatna mun tengteng ah a dim ding uhi.

²⁰“Huai ni chiang in TOUPA’N mulmettem khel in, Luipi khen gam a Assuria kumpipa om zang in, lutang leh khe mul a met siang ding a; khamul leng a metsiang vek ding hi.

²¹“Huchi in huai ni chiang in hichi ahi ding a, mi khat in bawngla khat leh belam nih kia a vul ding;

²²Himahleh hichi ahi ding a, nawitui tampi a neih ding ziak un nawitui dat a nesak ding: gamsung a omlai mi’n nawitui dat leh khuaizu a ne chiat ding ahi ngal ua.

²³“Huai ni chiang in hichi ahi ding a, munchih, grepgui sang, dangka sang man omna peuhmahte loulingnei leh khaulingnei omna lel ahita ding.

²⁴Gam pumpi loulingnei leh khaulingnei ngen a hong hihtak ziak in huai ah thaltang leh thalpeu tawi in a pai ding uhi.

²⁵Huchi in, tang, tupi a tohsa teng ah, loulingnei leh khaulingnei kihtak ziak in na hongpai kei ding a, bawngtalte tatsakna leh belam gamtatna mun ding lel ahita ding hi” a chi hi.