Read Paite Chin ISAI 8 Bible Online

ISAI 8 - Paite Chin bible

ISAI 8

¹TOUPA’N ka kiang ah, “Laigelhna pek lianpi la inla, mihing laigelhna in a tung ah Mahershalalhashbaz ading, chi in, gelh in.

²Huchi in theipih muanhuai, siampu Uriah leh Jaberekiah tapa Zekariah theihpihpa ding in ka bawl ding” a chi hi.

³Huan, zawlneinu kiang ah ka hoh a, huchi in aman nau a pai a, tapa a neita hi. Huchi in TOUPA’N ka kiang ah “A min in Mahershalalhashbaz sa in.

⁴Naupang in, Nu, Pa, chihna dan a theih ma in leng Damaska hauhsakna leh Samaria a gallak tengteng Assuria kumpipa ma ah paimangpih ding uh” a chi hi.

⁵TOUPA’N ka kiang ah a gen nawn a,

⁶“Hiai chite’n Siloah tui awl a luang diahdiah a deihlouh ziak un leh, Rezin leh Remaliah tapa tung a a kipah un,

⁷Ngai in, TOUPA’N luipi tui, khauh mahmah leh tam mahmah, Assuria kumpipa leh a thupina tengteng, a tung uah a luangsak ding: huchi in a piau tengteng a honglet zoizoi in, a gei tengteng ah leng a let zoizoi ding:

⁸Huchi in, Judah gam tuam in a luang ding a; ngawng tan a tumpha hial ding a; a kha zak in, Immanuel aw, na gam vailam tengteng a khak vek ding” a chi hi.

⁹Chichihte aw, buai vengvungta unla, kitamzak a om ding na hi uhi; gam gamlapi a mi tengteng aw, bildoh un; kigalthuam un, kitamzak a om ding na hi uhi; kigalthuam un, kitamzak a om ding na hi uhi.

¹⁰Thu kikum unla, bangmah hi peuh kenteh; thu gen unla, piching peuh kenteh: Pathian i kiang ah a om ngal a, chi in.

¹¹TOUPA’N khut hattak in huchi in ka kiang ah a gen, hiai chite lampi a ka pailouhna ding in hon thuzoh eive:

¹²Hiai chite’n, “Sawm a nei uh, a chih teng uh, Sawm a nei uh, chihpih kei un, a kihtak teng uzong nou zaw kihta kei unla, lau leng laupih sam kei un.

¹³Sepaihte TOUPA, amah mah na hihsiangthou ding uhi; amah na kihtak uh hi henla, amah na lau uh hi hen.

¹⁴Huan, amah Mun Siangthou ading ahi ding a; Israel inkuanpih nihte ading in bel pukna suang leh dalna suangpi ahizaw ding a, Jerusalem a omte ading in thang leh pial ahi lai ding hi.

¹⁵Huchi in mi tampi in huai a sui ding ua a puk ding uh, kitapsak in a om ding ua, a awk ding ua, mat in a om ding uh” chi in.

¹⁶Theihsakna thu zial gak inla, danthu ka sinsakte lak ah bilh in.

¹⁷Huan, ken Jakob inkuanpihte lak a a mai selpa TOUPA ka ngak ding a, amah ka en nilouh ding.

¹⁸Ngai in, kei leh TOUPA honpiak naupangte, Israelte lak ah sepaihte TOUPA Zion tang a om lak a chiamtehna a dingte leh thillamdang a dingte i hi uhi.

¹⁹Huan, min, “Dawi aisansiam zawl leh bumsiam ham tualtual leh phun nomnomte dong in, a honchih chiang un huchi in dawng un: Min a Pathian uh a dot zawk ding uh hilou hia? Mihingte ading in misi a dong ding ua hia?”

²⁰“Danthu leh theihsakna thu dot ding ahi” chi in. Huai thu bangbang a a gen kei uleh amau ading in khua himhim a vak zok kei ding hi.

²¹Lungkhamtak leh gilkial kawm in gam a tuansuak ding ua; hichi ahi ding a, a gil uh a kial chiang in a heh mahmah ding ua, a kumpipa uleh a Pathian uh a hamsiat ding ua, vanlam a nga ding uhi:

²²Huchi in, lei lam a en ding ua, ngai in, lungkhamna leh mialna, lunglauna nguina ahi ding; huchi in mial bikbek ah delhmang in a om ding uh.