Read Paite Chin ISAI 9 Bible Online

ISAI 9 - Paite Chin bible

ISAI 9

¹Himahleh lunglau a omkhinnu ading in nguina himhim a omta kei ding. Nidanglai in Zebulun gam leh Naphtali gam simmohhuai in a omsak a, himahleh hun nanung ah zaw thupitak in a omsakta, dil gei ah, Jordan gal ah, namchih Galili mah.

²Mi mial nuai a vakte’n vak thupitak a muta ua: sihna lim gam a omte tung mahmah ah vak a hongvakta hi.

³Nam na tamsakta a, a nopsakna uleng na khangsakta hi: buhlak lai a nuamsa bang in na ma ah nuam a sata ua, min gallak sum a hawm ua nuam a sak bang mai un.

⁴A puakgik puakna hakkol leh a liangzang a zawnna zawl, amah nuaisiahte khetbuk mah, Midiante zoh ni bang in na suktansakta ngal a.

⁵Chiak vengvung a mi galthuam a a kithuamna tengteng uleh puansilh sisan toh kidiah niaunuau tengteng, hal a, mei a khul ding phet ahi ngal a.

⁶Ei ding in naupang a hongpiang a, tapa piak in i omta; vaihawmna a liangzang ah a tuang ding a; a min "Lamdang," "Lemthei,: "Pathian Hat," "Tangtawn Pa," "Lemna Lal" a chi ding uhi.

⁷David tutphah tung ah leh a gam tung ah a vaihawmna khandan leh lemna in tawpni a neikei ding, hihkip ding leh tua kipan a tangtawn tan a leng vaihawmna leh diktatna tungding ding in, Sepaihte TOUPA phatuamngaihna in huaite a hih ding.

⁸TOUPA’N Jakobte gam ah thu a khak a, Israelte tung ah a keta.

⁹Huchi in mi tengteng, Ephraimte leh Samaria a om, kisatheitak leh lungsim a kiuangsak:

¹⁰Tekleite chim mahleh, suangtak sek in i lemna ding; theipi singte sattan in om mahleh, sidar singte in i kheng ding, chite’n a thei ding uh.

¹¹Huaiziak in TOUPA’N Rezin doumite amah dou ding in a tawisang ding a;

¹²A melma, suahlam a Suriate, tumlam a Philistiate, a tokthou ding; huchi in kam ka in Israelte a nekhin ding uh. Huchi hial a hih in leng a hehna a daikei a, a khut a lik lailai hi.

¹³Himahleh mite’n amaute vawpa lam a nga tuankei ua, Sepaihte TOUPA lah a zong tuankei uhi.

¹⁴Huaiziak in TOUPA’N Israelte a kipan in a lutang leh a mei, tum hiang leh pumpeng ni khat thu in a bantan ding.

¹⁵Upa leh mizahtakhuaite, a lutang ahi ua; zuauthu sinsak zawlneite, a mei ahi uh.

¹⁶Hiai mipite’n a pikhial nak uhi, a pite uh hih manthat in a om nak uhi.

¹⁷Huaiziak in TOUPA’N a tangvalte uh tung ah a kipak kei ding a, a tagahte uleh a meithaite uleng a hehpih sam kei ding; avek un Pathian zahlou mi leh thil hoihlou hihmite ahi chiat ua, a kam un thuginalou a gen uhi. Hichi a hihnung in leng, a hehna a dai kei a, a khut a lik lailai hi.

¹⁸Gitlouhna lah mei bang in a kuang luahluah a, lou lingnei leh khaulingneite a kangmang ahi, gammang nonglak a kang luahluah a, a khutou ngoingoi hi.

¹⁹Sepaihte TOUPA heh ziak in gam a kang sia a, mite leng mei a khul ding sing bang ahi ua; kuamah in amau unau leng a hawi kei uhi.

²⁰Huchi in min a taklam ua mi a suh ding ua, himahleh a tai tuankei ding uh; michih in amau bansa a ne chiat ding uh.

²¹Manassehte’n Ephraimte a ne ding ua, Ephraimte’n Manassehte a ne ding ua; a nih un Judahte a dou khawm ding uhi. Huchi lawmlawm a a hih in leng, a hehna lah a daikei a, a khut a lik lailai hi.