Read Paite Chin LEVITIKAS 10 Bible Online

LEVITIKAS 10 - Paite Chin bible

LEVITIKAS 10

¹Huan, Aron tapa Nadab leh Abihute’n a meilakna uh a la tuak ua, huai ah mei am a koih ua, gimlim a buak ua, TOUPA thupiak louhpi in A ma ah mei zatlouh chi a lan uhi.

²TOUPA ma apan mei a hong pawtkhia a, amau a kanglum a, TOUPA ma ah a sita uhi.

³Mosi in Aron kiang ah, “Kei honnaih mite ah ka siangthou ding a, mipi tengteng ma ah thupisak in ka om ding, chi a TOUPA’N a gentak hiai ahi” a chi a, Aron a daidide hi.

⁴Mosi in Aron pangak Usiel tapa, Misael leh Elzaphan a sam a, a kiang uah, “Mun siangthou mai apan giahphual pawlam ah na unaute uh pawkhia un” a chi hi.

⁵Amau a hong painai ua, a unaute uh a puanaktual un giahphual pawlam ah Mosi gen bang in a pawkhia uh.

⁶Mosi in Aron kiang ah leh a tapa Eleazar leh Ithamar kiang ah, Na sam uh khah kei unla, na puante uh leng botkek sam kei un, huchilou in zaw na si kha ding ua; mi tengteng tung ah TOUPA a thangpai kha ding. Himahleh na unaute uh leh Israel inkaw teng in ahihleh TOUPA’N mei a a hih manthatte a sunthei ding uhi.

⁷Kihoupihna puanin kongpi apan na pawt ding uh ahi kei. Huchilou in zaw na si ding uh. TOUPA sathau, nilhchi na tung uah a om ngal a, a chi hi. Huchi in Mosi thu bang in a hihta uhi.

⁸TOUPA’N Aron a houpih a,

⁹Nang hiam, na tapate hiam in leng, Kihoupihna puanin sung a na lut chiang un, zu leh dawn theih hat himhim dawn kei un, huchi lou in zaw na si ding uh. Hiai na suan zelte uh tan a tangtawn thuseh ding ahi.

¹⁰Huai bel a siangthou leh siangthou lou, a siang leh sianglou na khentheihna ding uleh;

¹¹TOUPA’N Mosi zang a a kiang ua a gen, thupiak tengteng Israel suante na sinsak theihna ding uh ahi, a chi hi.

¹²Mosi in Aron kiang ah leh a tapa damlai Eleazar leh Ithamar kiang ah, TOUPA adia mei a thillat a tangbuang thillat latbangte la unla, maitam bul ah silngou tellou in ne un; hiai thil siangthou pen ahi ngal a.

¹³TOUPA adia mei a thillat a nang a tuam leh na tapate a tuam a hih ziak in Mun Siangthou ah na ne ding uhi. Huchibang a thupiak a om ka hi.

¹⁴A awm vei leh a liang taklam vei pen mun siang ah na ne ding uh; nang leh na tapate leh na tanute toh. Israel suante lemna thillat kithoihna nang a tuam leh na tapate adia seh ahi ngal a.

¹⁵A liang vei leh a awm vei pen TOUPA ma a vei thillat dia vei ding in mei a thillat thau toh a hontawi ding uh ahi. Huai nang leh na tapate toh, tangtawn a nou a tuam ding ahi; TOUPA thupiak bang in, a chi hi.

¹⁶Mosi in khelh thoihna kel pen ngenteltak in a zong a, ngai dih, a na halkhin tham uh ahi a; huchi in, Aron tapa damlai, Eleazar leh Ithamar tung ah a hehta hi.

¹⁷“Bangdia khelh thoihna Mun Siangthou a nelou na hi ua? Thil siangthou, mipite thulimlouhna paw dia TOUPA ma a lemna bawlsakna dia nou a honpiak ahi ngal a.

¹⁸Ngai dih ua, a sisan pen Mun Siangthou ah laklut ahi kei a, thu k’on piak bang a Mun Siangthou a na nek ngeingei ding uh eive” a chi hi.

¹⁹Aron in Mosi kiang ah, “Ngai dih, tuni in TOUPA ma ah a khelh thoihna uh leh a haltum thillat uh a lan uhi. Hichibang thilte lah ka tung ah a hong omta ngal a; tuni in khelh thoihna a na neta leng, TOUPA mitmuh in pom in a om dia hia?” a chi hi.

²⁰Mosi in huai a zak in a lungkimta hi.