Read Paite Chin LEVITIKAS 11 Bible Online

LEVITIKAS 11 - Paite Chin bible

LEVITIKAS 11

¹Huan, TOUPA’N Mosi leh Aron a houpih a:

²Israel suante houpih unla, leitung a gamsa tengteng lak a na nekding uh gamsa hiaite ahi uh.

³Gamsa khechin nih a ka paisuak, eknel hai peuhmah na nethei ding uh.

⁴Himahleh eknel hai hiam, khechin nih a ka paisuak hiam lak ah hiaite zaw na ne ding uh ahi kei. Sangawngsau in eknel hai le leng, a chin a kat louh ziak in; nou ading in a sianglou ahi.

⁵Zupi, eknel a hai na a, himahleh a chin a katlouh ziak in nou ading in a sianglou ahi.

⁶Zusapi, eknel a hai na a, himahleh a chin a katlouh ziak in, nou ading in a sianglou ahi.

⁷Vok, a chin a ka paisuak na a, himahleh eknel a hailouh ziak in; nou a di’n a sianglou ahi.

⁸A sa uh na ne ding uh ahi kei, a luang uh leng na khoih ding uh ahi kei, nou ading in a sianglou ahi.

⁹Tui sung a tengte lak ah hiaite na ne thei ding uh: Tuipite leh luite a om kha leh lip nei photphot na nethei ding uhi.

¹⁰Tuisung a tengte leh tui a thilhing om tengteng lak ah tuipi a te, lui a te, kha leh lip neilou photphot nou ading in thil kihhuai ahi.

¹¹Nou ading in thil kihhuai ahi ding ua; a sa uh na ne ding uh ahi kei. A luangte uh thil kihhuai a na neih ding uh ahi.

¹²Tui a kha leh lip neilou photphot zaw nou ading in thil kihhuai ahi.

¹³Vasa lak ah hiaite thil kihhuai a na neih ding uh ahi a; nekding ahi kei. Thil kihhuai ahi uh: muvanlai, musane leh tuivapi.

¹⁴Muvompi leh musi chi himhimte.

¹⁵Va-ak leh a chi himhimte.

¹⁶Simbu, vabak, tuipi vasate leh mu chi himhimte.

¹⁷Simbutanglip, ngagal leh simbupi.

¹⁸Tuivapi, vabukngak leh musanepi,

¹⁹Intung va, dil vasa leh a chi himhim, huihtun leh bakte.

²⁰Kha nei khe li a pai chi peuhmah nou ading in thil kihhuai ahi.

²¹Himahleh a leng thei ganhing neu pawl khat na nektheih ding uh a om. Huaite ahihleh leilak a tomthei kheguh tang neite ahi uhi.

²²Hiaite lak a na nek theih dingte uh, Khaupe chi himhim, kelkum, khuangbai ahihkeileh khaukhup.

²³Himahleh kha nei, khelinei dangte peuhmah nou ading in kihhuai ahivek uhi.

²⁴Hiaite ziak in sianglou na suakthei uhi. Kuapeuh hiai ganhing sianglou sisa toh kisukha peuhmah nitaklam tan in a sianglou ahi ding.

²⁵Kuapeuh huai luang lami peuhmah in a puante uh a sawp ding uh ahi, nitaklam tan in a sianglou ahi ding uh.

²⁶Gamsa chin ka paisuak lou, eknel leng hailou chi tengteng nou ading in a sianglou ahi ua; kuapeuh huaite khoih sianglou ahi ding.

²⁷Bokvak a pai tengteng lak a khebom a pai peuh mahte nou ading in a sianglou ahi a; a luang uh khoih peuhmah nitaklam tan in a sianglou ahi ding.

²⁸A luang lami peuhmah in a puante a sawp ding ahi, nitaklam tan in a sianglou ahi ding a; nou ading in a sianglou ahi.

²⁹Lei a vakthoh chi lak a nou adia sianglou hiaite ahi: Bui, chikpi, thankikpi leh a chi himhim.

³⁰Inhik, tangteuh, thankik, dokdawn leh zusa.

³¹A vak thoh chi tengteng lak a nou adia sianglou hiaite ahi uh. Kuapeuh hiaite sisa a khoih uleh nitaklam tan in a sianglou ahi ding uhi.

³²A sih ua bang peuh a delhkhum uh, a sianglou ahi dia; vanzat photphot sing a bawl tuium-belsuan hiam, puan hiam, savun hiam, sai ip hiam leng tui a diah ding ahi a; nitaklam tan in a sianglou ahi ding. Huaikhit in a hong siang ding hi.

³³A kiakna peuh leibel chih na hihtam ding uh ahi, asung a om tengteng a sianglou ahi ding uh.

³⁴Huai bel a nekchi om tengteng leh huai a om tui a diahsa himhim sianglou ahi dia; dawn chi, dawntheih chi tengteng leng huai bel sung a om himhim sianglou ahi ding.

³⁵Thil bangpeuh a siluang a kahiang khatpeuh in a delhkhum phot sianglou ahi zel dia; tanghou kanna hiam, kan lumna bel hiam leng hihtap vek ding ahi, sianglou ahi khin a, nou ading in sianglou ahi ding.

³⁶Himahleh tuikhuk hiam, tuibem, tui tamtak omna sianglou chih a omkei a, himahleh a siluang in a sukkhak peuhmah a sianglou ahi ding.

³⁷Chin ding haichi himhim zaw siluang in banglai peuh in delhkhumta leh a sianglou kei hi.

³⁸Himahleh haichi, tui a diahsa siluang in koilai peuh a delh khak leh nou ading in sianglou ahi.

³⁹Gamsa na nektheih chi himhim u leng a sih leh a luang khoih mi peuhmah nitaklam tan in sianglou ahi ding.

⁴⁰A sa ne peuhmah in a puante uh a sawp ding uh ahi, nitaklam tan in sianglou ahi ding. A luang lami in leng a puante a sawp ding ahi, nitaklam tan in sianglou ahi ding.

⁴¹Ganhing leitung a bokvak chi tengteng thil kihhuai ahi ua, nekding ahi kei.

⁴²A kitholh chi leh khe li a pai chi hiam, khe tampi nei chi hiam, leitung a bokvak chi himhim na ne ding uh ahi kei, thil kihhuai ahi ngal ua.

⁴³A bokvak chi himhim in na kihihthanghuai ding uh ahi kei, hiaite in na kihihbuah ding uh ahi kei, huaite in sianglou in na kibawl ding uh ahi kei hi.

⁴⁴Kei TOUPA na Pathian uh ka hi ngal a; huaiziak in, kisiangsak unla, siangthou in om un; kei lah ka siangthou ngal a. Leitung a teng, a bok a vak, a bangchi mah in kihihbuah kei un.

⁴⁵Na Pathian uh hi ding a Aigupta gam a kipan nou hon pikhia TOUPA lah ka hi ngal a. Kei ka siangthou a, huaiziak in, nou leng na siangthou ding uh ahi.

⁴⁶Hiai pen gamsa leh vasate leh tui a teng chi thilhing chiteng leh lei a bokvak chitengte tungthu a dan ding ahi.

⁴⁷A siang leh sianglou khenna ding leh gamsa nektheih chi leh gamsa nek theihlouh chi khenna ding in, chi in, a chi hi.