Read Paite Chin LEVITIKAS 12 Bible Online

LEVITIKAS 12 - Paite Chin bible

LEVITIKAS 12

¹Huan, TOUPA’N Mosi a houpih a:

²Israel suante kiang ah: Numei in nau a pai a, tapa a neih leh ni sagih sung sianglou ahi dia; numei dan ngeina hunlaia a sianlouh bang in sianglou ahi ding hi.

³A ni giat ni’n a tapa zekmong vun a sum ding ahi.

⁴Sisan ziak a kisiangsak in ni sawmthum leh thum a omlai ding ahi. A kisiansak ni a kim mateng thilsiang himhim a khoih ding ahi kei a; Mun Siangthou ah leng a lut ding ahi sam kei hi.

⁵Nau numei a neih leh bel numei dan ngeina hunlaia a sianlouh bang in nipikal nih sung sianglou ahi dia, sisan ziak a kisiangsak in ni sawmguk leh guk a omlai ding ahi.

⁶Tapa hiam, tanu hiam ziak a kisiansak ni a kimchiang in haltum thillat ding in belamnou kum khat a upa leh khelh thoihna ding in vapal nou hiam, vakhu hiam Kihoupihna puanin kongpi bul ah siampu kiang ah a hontawi ding ahi:

⁷Aman TOUPA ma ah a lan ding a, kilemna a bawlsak dia, huchi in a sisan pawtna apan a siang ding. Hiai pen pasal hiam, numei hiam neinu adia dan ahi.

⁸A neih in belamnou a chin kei leh vakhu kopkhat hiam, vapal nou kopkhat hiam a tawi ding ahi: Khat haltum thillat ding in, a khat pen khelh thoihna ding in. Siampu in kilemna a bawlsak dia, huchi in a hong siangta ding, chi in gen in, a chi hi.