Read Paite Chin LEVITIKAS 13 Bible Online

LEVITIKAS 13 - Paite Chin bible

LEVITIKAS 13

²Mi vun a, a khem hiam, a bol hiam a, phak hileh kilawm a kimuh leh siampu Aron kiang ah hiam, a tapa siampute lak a kuapen hiam kiang a pi ding ahi.

³Siampu in a vun a hi pen a na en dia, a hi omna a mul a kan a, a hi pen a vun sang a thuk zaw a a kimuh leh phak ahi a, siampu in amah a na en ding a, mi sianglou in a phuang ding ahi.

⁴A vun a bolte a kan a, a vun sang a thukzaw a a kimuh kei leh, a mul a kan kei leh hi neimi pen siampu in ni sagih sung a khum tuam ding hi.

⁵Siampu in ni sagih ni’n amah a endia; ngai dih, a hi pen a ngeingei a a muh a, a hi pen a vun a a zamzak kei leh siampu in ni sagih mah a khumtuam nawn ding hi.

⁶Siampu in ni sagih ni’n a en nawn dia; ngai dih, hi pen a mial a, hi pen a vun a a zamzak kei leh siampu in a siang chih a phuang ding ahi. A khem lel ahi a, a puante a sawp dia, a hong siang ding hi.

⁷Himahleh a siansakna dia siampu a kietsak nung a a khempen a vun a a zamzak mahmah leh siampu a kiensak nawn ding ahi:

⁸Siampu in a en dia, ngai in, a khempen a vun a a zamzak leh siampu in sianglou chih a phuang dia, hiai phak ahi.

⁹Mi’n phak hi a vom leh siampu kiang a pi ding ahi;

¹⁰Siampu in a na en dia, ngai dih, a vun a a kang a omkhiak a, a mul a kansak a, a bawk dulh hethut leh,

¹¹A sa a phak kumlui om ahi a, siampu in a sianglou ahi chih a phuang dia, himahleh amah sianglou a hih ziak a khumtuam ding ahi kei hi.

¹²A phakpen a vuna a zamzak mahmah a, a hi veimi vun, a lu apan a khe tan a siampu theihchiang phak in a bop leh, siampu’n a en ding hi.

¹³Ngai dih, phak in a sa tengteng a bop suaksa ahihleh, hi veimi a siang chih a phuang dia, a kangkhinta a, a siangta hi.

¹⁴Himahleh a sa a dulh hethut leh, a sianglou ahi dia,

¹⁵Siampu in a sa dulh hethut a en dia, sianglou in a phuang ding hi. Sa dulh hethut pen sianglou ahi a, phak ahi.

¹⁶Himahleh sa dulh hethut pen a na lamdan nawn a, a na kan nawn leh siampu kiang ah a hoh ding hi.

¹⁷Siampu in a na en dia; ngai dih, a hi a kan leh siampu in hi veimi a sianglou kei chih a phuang ding hi. Amah a siangta hi.

¹⁸A sa leh a vun a om meimatum ahi a, a damta hi.

¹⁹A meimatum omna mun a na kan a na san hiam, kang sandeuh a na bol hiam ahihleh, siampu in a et ding ahi.

²⁰Siampu in a na en dia, ngai dih, a vun sang a thuka a kimuh a, a mul a kan leh siampu in sianglou in a phuang ding ahi: phak hi ahi a, meimatum a hong suakkhia ahi.

²¹Himahleh siampu in a na et a, ngai dih, mul kang a omlouh a, a mialsim phet ahihleh, siampu in ni sagih a khumtuam ding a:

²²A vun a a zamzak leh siampu in sianglou in a phuang ding hi.

²³Himahleh a bol ngou pen a omna ngei a om a, a zamzak kei leh meimatum pawn lel ahi a; siampu in a siangthou chih a phuang ding ahi.

²⁴Ahihkeileh a vun polna mun a sa a om a, a kang hiam, a san sim hiam ahihkeileh a ngou leh,

²⁵Siampu in a na endia, ngai dih, a polna laitak a mul pen a kan a, huchi a vun sang a thukzaw a a kimuh leh phak ahi a, meikat a hong omkhia phak ahi a, siampu in sianglou in a phuang ding ahi, hiai phak hi ahi.

²⁶Himahleh siampu in a na et a, ngai dih, a pol a mulkang omlou a, a vun sang a thuklou zaw a, mialdeuh lel ahihleh siampu in ni sagih a khum tuam ding hi.

²⁷Siampu in ni sagih ni’n amah a en dia, a vun a a zamzak mahmah leh siampu in a sianglou in a phuang ding hi, hiai phak hi ahi.

²⁸A polpen a omna ngei a a na omdet a, vun a a zamzak kei leh, mialdeuh lel ahihleh meikat bawklel ahi a, siampu in a siang chih a phuang ding ahi; meikang pawn lel ahi.

²⁹Numei hiam, pasal hiam in a lu ah hiam, a khamul lak ah hiam hi a vei leh

³⁰Siampu in hi pen a na en dia; ngai dih, a vun sang a thukzaw a a kimuh a, a mul eng ngattak om leh siampu in sianglou in a phuang ding ahi; meimasungtum ahi a, a lu hiam a khamul hiam phak ahi.

³¹Siampu in meimasungtum hipen a et a, ngai dih, a vun sang a thuklou zaw a a kimuh a, a mul vom a omkei leh siampu in meimasungtum hi veimi pen ni sagih a khumtuam ding hi.

³²Ni sagih ni’n siampu in hi a en dia, ngai dih, meimasungtum a zamzak louh a, mul eng a omkei leh, meimasungtum a vun sang a thukzaw a a kimuh kei leh,

³³met ding ahi a, meimasungtum laitak bel a met ding ahi kei; siampu in meimasungtum neimi ni sagih dang a khumtuam nawn ding ahi.

³⁴Ni sagih ni’n siampu in meimasungtum a en nawn dia; ngai dih, meimasungtum pen a vun a a zaklouh a, a vun sang a thukzaw a a kimuh kei leh, siampu in siang in a phuang ding ahi. Huchi in a puante a sawp dia, a hong siangta ding hi.

³⁵Himahleh meimasungtum pen a ki siansak nung a, a vun a a zamzak mahmah leh,

³⁶Siampu in amah a na endia, ngai dih, meimasungtum pen a vun a, a zamzak leh, siampu ading in mul eng zon a kiphamoh chitchiat kei ding; amah sianglou ahi.

³⁷Himahleh meimasungtum pen a ngeingei a a muh a, mul vom a pou leh, meimasungtum a damta ahi a, amah a siang a, siampu in a siang, chih a phuang ding hi.

³⁸Numei hiam, pasal hiam, a vun ah pol, pol ngou kilhkelh a na om leh,

³⁹Siampu in a en dia, ngai dih, a vun a pol pen mialngou simlel ahihleh pollel ahi a, vun a hongsuak ahi a, amah a siang hi.

⁴⁰A sam pulhsiangmi lugiau ahi; himahleh amah a siang hi.

⁴¹A sipsam a pulh siang leh talngalh ahi a, himahleh amah a siang hi.

⁴²Himahleh lugiau hiam, talngalh hiam ah, hi sansim a ngou a om leh, a lugiau hiam, a talngalh hiam phak ahi.

⁴³Huchi in siampu in a na en dia, ngai dih, a lugiau hiam, a talngalh hiam a hi hong bawkkhia pen a sansim leh ngousim hethut a, a vun a phak bang a kimuh leh,

⁴⁴Amah phak ahi a, sianglou ahi. siampu in sianglou a phuan ngeingei ding ahi, phakna a lu ah a om hi.

⁴⁵Phak hi veimi puante bohkek ahi dia, a samte khah ahi dia, a muk tunglam a tuam dia, sianglou, sianglou, chi in a kikou ding ahi.

⁴⁶Phak in a bop sungteng sianglou ahi dia; sianglou ahi a, a tengtuam dia; giahphual pua ah a teng ding hi.

⁴⁷Phak hi omna puansilh, samul puan hiam, khau zangngat puan hiam;

⁴⁸a gat thoh hiam, a phanthoh hiam; khau zangngat hiam, samul hiam, savun hiam, bangpeuh savun a bawl ah hiam; savun hiam, bangpeuh savun a bawl ah hiam, savun hiam,

⁴⁹Gat ah hiam, phan ah hiam, bangpeuh savun a bawl ah hiam a hingsim hiam a a dawkkhiak leh, phak hi ahi a, siampu in a en ding hi.

⁵⁰Siampu in hi a en dia, hi omna ni sagih a khumtuam ding hi.

⁵¹Ni sagih ni’n hi a en dia, hi pen puansilh, gat ah hiam, phan ah hiam, savun ah hiam, bang ding peuh a leng a zat uh savunte ah hiam, a zam leh hipen phakkip mahmah chi ahihleh sianglou ahi.

⁵²Puansilh, gat hiam, phan hiam, samul hiam, khau zangngat hiam, savun a bawl chi himhim hiam, phak omna peuhmah hal ding ahi, phakkip mahmah chi ahi ngal a, hal ngeingei ding ahi.

⁵³Siampu in a na et a, huchi a, ngai dih, puansilh, gat hiam, phan hiam, savun a bawl chi himhim ah leng hipen a zamkei leh

⁵⁴hi omna siampu in sawp ding thu a pedia, ni sagih dang a khumtuam nawn ding hi.

⁵⁵Hi omna sawp a hih khitnung in siampu in a na ennawn dia, ngai dih, huai hi latdan a kikhek kei leh hipen zamkei mahleh, a siang tuankei, mei a na hal ding ahi; a kip chi ahi, a sunglam hiam, a pawlam hiam a giau leh leng.

⁵⁶Siampu in a na et a, huchi a, ngai dih, sawpkhit nung a mial sim lel ahihleh puansilh apan hiam, savun apan hiam, gat apan hiam, phan apan hiam a botkhe ding ahi.

⁵⁷Puansilh pen, gat ah hiam, phan ah hiam, savun bawl ah hiam a latlai lai leh a hong pawtnawn ahi a; hi omna pen na hal ding ahi.

⁵⁸Puansilh, gat hiam, phan hiam, bangpeuh savun a bawl chi himhim hiam na sawp a, hi in a nutsiat leh sawpnawn ding ahi a, huchi in a hong siangta ding hi.

⁵⁹Hiai bel, puansilh samul hiam, khau zangngat hiam, gat hiam, phan hiam, savun a bawl chi himhim hiam a phak hi om a sian leh sianlouh phuanna dan ding ahi, chi in.