Read Paite Chin LEVITIKAS 15 Bible Online

LEVITIKAS 15 - Paite Chin bible

LEVITIKAS 15

¹Huan, TOUPA’N Mosi leh Aron a houpih a:

²Israel suante houpih unla, a kiang uah, Mi kuapeuh sa a thil a pawt leh a thilpawt ziak in sianglou ahi.

³A thilpawt sungteng sianglou ahi a, a sa ah a pawt gige hiam, a pawt a tawpta hiam leng hitaleh, amah sianglou himhim ahi.

⁴Thilpawt mi lupna peuhmah sianglou ahi dia; a tutna peuhmah leng sianglou ahilai ding hi.

⁵Kuapeuh a lupna khoih peuhmahte’n a puante uh a sawp ding ua, a kisil ding uh ahi, nitaklam tan in sianglou ahi ding uhi.

⁶Thilpawt mi tutna a tu peuhmahte’n a puante uh a sawp ding ua, a kisil ding uh ahi, nitaklam tan in sianglou ahi ding uh.

⁷Kuapeuh thilpawt mi sa khoih peuhmah in a puante uh a sawp ding ua, a kisil ding uh ahi, nitaklam tan in sianglou ahi ding uhi.

⁸Thilpawt mi in mi sianglou chil a siatkhum leh a puante a sawp dia, a kisil ding ahi, nitaklam tan in sianglou ahi ding.

⁹Tuanna bangpeuh a leng thilpawtmi a tuan leh sianglou ahi ding.

¹⁰Kuapeuh a kingaihnasa nung thilkhoih peuhmahte nitaklam tan in sianglou ahi ding ua; huai thil lasuan mi peuhmah in a puante uh a sawp ding ua; a kisil ding uh ahi. Nitaklam tan in sianglou ahi ding uhi.

¹¹Kuapeuh thilpawt mi in a khut sillou a a khoih peuhmah in a puante a sawp dia, a kisil ding ahi. Nitaklam tan in sianglou ahi ding.

¹²Thilpawt mi leibel khoihsa suktap ding ahi; a sing vanzat tengteng silsiang vek ding ahi.

¹³Thilpawtmi bel, a thilpawt hihsiang ahihleh, a ki siansakna ding in ni sagih a kipe dia, a puante a sawp dia; luitui ah a kisil dia; huchi in a hong siangta ding hi.

¹⁴A ni giat ni’n vakhu kopkhat hiam, vapal nou kopkhat hiam tawi in TOUPA ma ah Kihoupihna puanin kongpi bul ah a hoh dia, siampu a pe ding ahi.

¹⁵Siampu in khelh thoihna ding in khat, haltum thillat ding in a khat pen a lan ding hi. Siampu in a thilpawt thu ah TOUPA ma ah kilemna a bawlsak ding.

¹⁶Pasal kuapeuh kipolhna chi amah apan a pawt leh a pumpi in a kisil vek dia, nitaklam tan in sianglou ahi ding.

¹⁷Puansilh leh vun, kipolhna chitukna peuhmah sawpsiang vek ding ahi a, nitaklam tan in sianglou ahi ding.

¹⁸Numei a luppih leng a nih ua a kisil tuak ding uh ahi. Nitaklam tan in sianglou ahi ding uhi.

¹⁹Numei in thilpawt a neih a, a sa a thilpawt si ahihleh ni sagih sung sianglou ahi dia; kuapeuh amah khoihkha taphot nitaklam tan in sianglou ahi ding.

²⁰A sianlouh sung a, a lupna peuhmah sianglou ahi dia, a tutna peuhmah leng sianglou ahilai ding hi.

²¹A lupna khoih peuhmahte’n a puante uh a sawp ding ua, a kisil ding uh ahi. Nitaklam tan in sianglou ahi ding uh.

²²Kuapeuh a tutna khoih peuhmahte’n a puante uh a sawp ding ua, a kisil ding uh ahi. Nitaklam tan in sianglou ahi ding uhi.

²³A lupna a thil om hiam, a tutna a thil om hiam khoih peuhmah leng nitaklam tan in sianglou ahi ding uh.

²⁴Kuapeuh in a luppih a, a sineih luang in amah a sukkhak leh ni sagih sung sianglou ahi dia; a lupna peuhmah sianglou ahivek ding hi.

²⁵Numei a sineih ngeina hilou, ni sawtkuam tak a sipawt hiam, a nitdan ngeina sang a sawtzaw sipawt hiam ahihleh, a sianlouh dan ngeina sung a, a om zel bang in sipawtmi a nit sungteng sianglou in a om ding hi.

²⁶A sipawt sungteng a lupna taphot a sianglouh ngeina hunlai a, a lupna bang ahi dia; a tutna peuhmah a sianlouh ngeina hunlai a, a sianglouh bang in sianglou ahi ding.

²⁷Kuapeuh huai thil khoih peuhmah sianglou ahi dia, a puante a sawp dia, a kisil ding ahi. Nitaklam tan in sianglou ahi ding.

²⁸Himahleh a sipawt pen siansak ahihleh ni sagih aman a kisim dia, huchi in a hong siangta ding hi.

²⁹A ni giat ni’n vakhu kopkhat hiam, vapalnou kopkhat hiam a tawi dia, Kihoupihna puanin kongpi bul ah siampu a hong pe ding ahi.

³⁰Siampu in khelh thoihna ding in khat, haltum thillat ding in khat a lan ding ahi. Huchi in siampu in sipawt mi a sianlouhna thu ah TOUPA ma ah kilemna a bawlsak ding ahi.

³¹Hiai bang in Israel suante a sianlouhna ua pan na hihtuam ding uh ahi, a lak ua ka biakbuk a hihbuah khak chiang ua leng a sianglouhna ua a sihlouhna ding un.

³²Hiai dan pasal thilpawt neimi leh kipolhna apan chi pawtkhia a ninte leh

³³numei kha teng sineih sung ading, pasal hi in numei hitaleh sa apan thilpawt neimi ading leh sianglou a ngaih numei luppih pasal ading ahi, a chi hi.