Read Paite Chin LEVITIKAS 16 Bible Online

LEVITIKAS 16 - Paite Chin bible

LEVITIKAS 16

¹Huan, Aron tapa nihte’n TOUPA a va naih ua a sihloh nung un TOUPA’N Mosi a houpih a:

²TOUPA’N Mosi kiang ah: Na unau Aron houpih inla, puanzak sung Mun Siangthou ah, bawm tung a chitna tutphah ma ah chiklaipeuh in leng honglut hetkei heh, a si kha ding hi. Chitna tutphah tung a, meipi a hong kilang ding ka hih ziak in.

³Hichibang in Aron Mun Siangthou ah khelh thoihna ding in bawng tuai, haltum thillat ding in belampa toh a hoh ding ahi.

⁴Puanmalngat puanak siangthou a silh dia, a sa khuhna ding in puanmalngat pheitawm a bun ding, puanmalngat dial a khim ding ahi. Hiaite puansilh siangthou ahi a; a kisil masa dia, huchi in a silh phet ding ahi.

⁵Israel suan mipi hon apan khelh thoihna ding in kelpa nih leh haltum thillat ding in belampa khat a tawi ding ahi.

⁶Aron in amah a tuam, khelh thoihna bawngpa pen a lan dia, amah leh a inkawte ading in kilemna a bawl ding ahi.

⁷Kel nih a kai dia, Kihoupihna puanin kongpi bul ah TOUPA ma ah a koih ding hi.

⁸Aron in kel nih tungthu ah ai a san dia, khat Toupa a tuam ahi dia, a khat pen thuaksik thuak kel ahi ding.

⁹Aron in TOUPA a tuam dia puk kel pen a la dia, khelh thoihna ding in a lan ding hi.

¹⁰Thuaksik thuak kel dia puk pen kilemna bawlna dia khah ding in TOUPA ma ah a hing in a koih ding hi.

¹¹Aron in a ma a tuam khelhna bawngpa pen a la dia, amah leh a inkawte ading in kilemna a bawl dia, amah a tuam khelh thoihna bawngpa pen a gou ding hi.

¹²TOUPA ma a maitam apan meilakna dim in mei am a la dia, gimlim gawizan ngiingei pham khat toh puanzak sung ah a lutpih ding hi.

¹³Gimlim khu in thu theihpihna tung a chitna tutphah a bopna ding in TOUPA ma a mei ah gimlim a buak dia, sihna a tuahlouhna ding in.

¹⁴Bawngpa sisan bangzah hiam a la dia, a khutzung in chitna tutphah suahlam pang a theh dia, a khut in chitna tutphah bul sisan in sagihvei a theh ding ahi.

¹⁵Mipi a tuam khelhthoihna kel pen a gou dia, a sisan, bawngpa sisan a bawl bang in a bawl dia, chitna tutphah tung leh chitna tutphah ma ah a theh ding hi.

¹⁶Israel suante sianlouhnate leh a khelhnate ua a tatleknate uh ziak in Mun Siangthou ading in kilemna a bawl ding hi. Huai mah bang in, a sianlouhnate uh lak a om, Kihoupihna puanin ading in leng a bawlsam ding hi.

¹⁷Mun siangthou a kilemna bawl dia a lut lai in, amah leh a inkawte leh Israel mipite adia kilemna bawlkhin a a hongpawt khiak masiah kuamah puanin sung ah a om ding ahi kei.

¹⁸TOUPA ma a maitam lam ah a pawt dia, huai ading in kilemna a bawl dia, bawngpa sisan leh kel sisan bangzah hiam a la dia, maitam kite ah a kimvel in a tat ding ahi.

¹⁹A khut in huai sisan sagihvei a theh dia, a siangsak dia, Israel suante sianglouhna apan a hih siangthou ding hi.

²⁰Mun siangthou leh Kihoupihna puanin leh maitam adia kilemna a bawlkhit chiang in, kel hingpen a honkai ding hi.

²¹Aron in kel hing lu tung ah a khut langnih a koih dia, a tung ah Israel suante gitlouhna teng leh khiala a tatlekna teng uh a pulak dia; huaite kel lu tung ah a nga dia, mi khat a sehkholhsa un gamdai ah a pimang ding hi.

²²Huai kel in a gitlouhna tengteng uh luahlouh gam ah a paw mang dia, kel bel gamdai ah a khah ding hi.

²³Kihoupihna puanin ah Aron a lut dia, Mun Siangthou a, a lutlai a puanmalngat puansilh a suah dia, huai ah a nuse ding hi.

²⁴Mun siangthou ah a kisil dia, a puansilh a silh dia, a hong pawtkhe dia, amah a tuam haltum thillat leh mipi a tuam haltum thillat a lan dia, amah leh mipi ading in kilemna a bawl ding hi.

²⁵Khelh thoihna thau maitam ah a hal ding hi.

²⁶Thuaksik thuak kel khah mi kuapeuh in a puante a sawp dia, a kisil dia, huaikhit in a omna mun ah a pai nawn ding ahi.

²⁷Khelh thoihna bawngpa leh khelh thoihna kel sisan kilemna a bawlna dia Mun Siangthou a, a lutpih uh giahphual pua ah a paipih ding hi; a vun, a sa leh a ek a hal ding ahi.

²⁸A hal mi’n a puan a sawp dia, a kisil dia, huaikhit in a omna mun ah a pai nawn ding ahi.

²⁹Hiai na tangtawn dan ding uh ahi: A kha sagihna, huai kha ni sawm ni’n na lungsimte uh na gimsak ding ua, na gam ua mi himhim hiam, gamdangmi na lak ua teng hiam in bangmah a seplouh ding ahi.

³⁰Hiai ni’n noute hihsiangthou ding in noute ading in kilemna bawl ahi dia; huchi in TOUPA ma ah na khelhna tengteng lak ua pan na siang ding uhi.

³¹Nou adia Sabbath khawlni ahi a, na lungsimte uh na gimsak ding uh. Hiai tangtawn dan ding ahi.

³²Siampu, a pa sik a siampu hidia sathau nilh ding leh hihtuam mi hi ding in kilemna a bawl dia, puanmalngat puansilh siangthou a silh dia; Mun Siangthou ading in kilemna a bawl dia; Kihoupihna puanin leh maitam ading in leng kilemna a bawl sam ding hi.

³³Siampute leh mipi hon ading in kilemna a bawl nawnlai ding hi.

³⁴A khelhna tengteng uh ziak a kumchih a khatvei Israel suante adia kilemna bawl na tangtawn dan ding uh ahi, a chi hi. Huchi in TOUPA’N Mosi thu a piak bang in a hihta hi.