Read Paite Chin LEVITIKAS 17 Bible Online

LEVITIKAS 17 - Paite Chin bible

LEVITIKAS 17

¹Huan, TOUPA’N Mosi a houpih a:

²Aron leh a tapate leh Israel suan tengteng houpih inla, a kiang uah: Hiai TOUPA thupiak ahi:

³Israel inkawte lak a mi bawngpa hiam, belamnou hiam, kel hiam giahphual hiam, giahphual pawlam hiam a gou a,

⁴TOUPA biakbuk ma a TOUPA adia a thillat dia Kihoupihna puanin kongpi bul a hon tawilou peuhmah, huai mi sisan suah a ngaih ahi ding; sisan suah ngei ahi, huai mi a chipihte lak apan satkhiat ding ahi.

⁵Hiai pen Israel suante’n a kithoihnate uh, gamlak a kithoihnate uh a honlak ua, TOUPA ading ngei a Kihoupihna puanin kongpi bul a, siampu kiang a, a hontawi ua, TOUPA adia lemna thillat kithoihna a hih theihna ding ahi.

⁶siampu in Kihoupihna puanin kongpi bul a maitam sisan in a theh dia, a thau TOUPA ading in gimlimtakin a hal ding ahi.

⁷A angkawmna uh dawite kiang ah a kithoih nawn ding uh ahi kei. Hiai a suante uh tan a tangtawn a dia dan ahi.

⁸A kiang uah, Israel inn kaw mi himhim hiam, gamdangmi a lak ua tengte hiam in haltum thillat hiam, kithoihna hiam,

⁹TOUPA kiang a kithoihna dia Kihoupihna puanin kongpi bul a hon tawilou a om leh huai mi a chipihte lak apan satkhiat ding ahi.

¹⁰Kuapeuh Israel inn kaw lak a mi hiam, gamdangmi a lak ua teng hiam, bang sisan leng ne peuhmah, huai sisan nemi tung ah ka mai ka gumsak dia, a chipihte lak apan satkhiat ahi ding hi.

¹¹Sa hinna pen sisan a a om ziak in, Na hinna uh adia kilemna bawlna dia maitam tung a nou k’on piak ahi. Hinna dia kilemna bawlna pen sisan mahlah ahi ngal a.

¹²Huaiziak in, Israel suante kiang ah, Kuamah in sisan na ne ding uh ahi kei. Gamdangmi na lak ua teng in leng sisan a ne ding ahi kei, ka chi ahi.

¹³Israel suante lak a mi hiam, gamdangmi a lak ua teng hiam, gam vavak a, sa hiam, vasa hiam, nektheih chi a hontut leh a sisan a pawtsak dia, a sisan leivui in a vuk ding ahi.

¹⁴Sa tengteng hinna thu ah a sisan leh a hinna kibang geih ahi. Huaiziak in, Israel suante kiang ah, sa sisan mawngmawng na ne ding uh ahi kei, sa tengteng hinna a sisan ahi ngal a. Kuapeuh hiai na satkhiat ahi ding.

¹⁵Amah sih a si hiam, sa keih lup hiam ne mi, huai gam a mi hiam leng hi hen aw, a puan uh a sawp ding ua, a kisil ding uh ahi. Nitaklam tan in sianglou ahi ding uh. Huchi in nitaklam in a hong siangta ding uh.

¹⁶A sawpkei ua, a kisil kei uleh a thulimlouhna mawh a kipuak ding uh, a chi hi.