Read Paite Chin LEVITIKAS 18 Bible Online

LEVITIKAS 18 - Paite Chin bible

LEVITIKAS 18

¹Huan, TOUPA’N Mosi a houpih a:

²Israel suante houpih inla, a kiang uah, Kei TOUPA, na Pathian uh ka hi.

³Na omna masa uh Aigupta gam mite hihbang in hihkei unla, k’on pilutna ding Kanaan gam mite hihbang in leng hihkei un.

⁴Ka vaihawmte na zui ding ua, ka dante zui in na mang ding uh ahi. Kei TOUPA na Pathian uh ka hi.

⁵Huaiziak in, ka dan leh ka vaihawmte na mang ding uh ahi, huai mi’n ahihleh a hing ding hi. Kei TOUPA ka hi.

⁶Kuamah in na tanau nai numei, a vuaktanna lem ding in na zuan ding ahi kei. Kei TOUPA ka hi.

⁷Na pa vuaktanna ahihkeileh na nu vuaktanna na lem ding ahi kei. Na nu ahi a, a vuaktanna na lem ding ahi kei hi.

⁸Na pa zi vuaktanna na lem ding ahi kei, na pa vuaktanna ahi.

⁹Na sanggamnu, na pa tanu hiam na nu tanu hiam, na pianpih hiam, na pianpih louh hiam vuaktanna leng na lem ding ahi kei.

¹⁰Na tapa tanu hiam, na tanu, tanu hiam vuaktanna na lem ding ahi kei. A vuaktanna uh nang vuaktanna ahi ngal a.

¹¹Na pa zi tanu, na pa suan vuaktanna, na sanggamnu ahi, a vuaktanna na lem ding ahi kei.

¹²Na pa sanggamnu vuaktanna na lem ding ahi kei. Na pa tanaunu nai ahi.

¹³Na nu sanggamnu vuaktanna na lem ding ahi kei, na nu tanau nu nai ahi ngal a.

¹⁴Na pa sanggam vuaktanna na lem ding ahi kei, a zi na zuan ding ahi kei, na nu ahi.

¹⁵Na mounu vuaktanna na lem ding ahi kei. Na tapa zi ahi a, a vuaktanna na lem ding ahi kei.

¹⁶Na sanggampa zi vuaktanna na lem ding ahi kei. Na sanggampa vuaktanna ahi.

¹⁷Nutate vuaktanna na lem ding uh ahi kei. A vuaktanna lem ding in a tapa tanu hiam, a tanu-tanu hiam na la ding ahi kei. Na tanau naite ahi ua; gitlouhna lianpi ahi.

¹⁸Na zi a damlai teng, a sanggamnu, a vuaktanna lem ding in na zi in na nei ding ahi kei hi.

¹⁹Numei a nitdan ngeina a, a nit sung in a vuaktannna lem ding in na zuan ding ahi kei.

²⁰A lak a kihihnin ding in na invengpa zi na luppih ding ahi kei.

²¹Molech adia mei a lutsuak sak ding in na gil a gah himhim na pe ding ahi kei, na Pathian min na hihse ding ahi sam kei. Kei TOUPA ka hi.

²²Numei bang in pasal na luppih ding ahi kei. Thil kihhuai ahi.

²³Kihihnin ding in ganta himhim na luppih ding ahi kei. Luppih ding in ganta ma ah numei adin ding ahi kei. Gitlouhna tungtuan ahi.

²⁴Hiaite ah, a bangmah ah kihihnin kei un. Hiai thil tengteng ah na ma ua ka delhkhiak khitsa namte a na nin khinta uhi.

²⁵A gam leng a nin khinta hi. Huaiziak in, a thulimlouhnate uh ziak in amau ka gawt a, gam in asung a tengmite a lawkhe khin vek hi.

²⁶Huaiziak in, nou zaw ka dante, ka vaihawmte na zui ding uh ahi. Hiai thil kihhuaite na hih ding uh ahi kei, na gam ua mi himhim hiam, gamdangmi na lak ua tengte hiam in leng.

²⁷Hiai thil kihhuai tengteng na ma ua hiai gam a omte’n a na hih khin ua, gam mah leng a nin khinta hi.

²⁸Na ma ua om nam a lawkhia mah bang in na hihnit ua gam in a hon luakkhiat louhna ding in.

²⁹Kuapeuh hiai thilkihhuaite lak a khatpeuh hihmi a chipihte apan satkhiat ahi ding.

³⁰Huaiziak in, hiai thilkihhuai na ma ua omte’n a chin bang uh na chin samlouhna ding un leh huai a na ki hihnit louhna ding un ka thupiak na zui ding uh ahi. Kei TOUPA na Pathian uh ka hi, a chi hi.