Read Paite Chin LEVITIKAS 19 Bible Online

LEVITIKAS 19 - Paite Chin bible

LEVITIKAS 19

¹Huan, TOUPA’N Mosi a houpih a:

²Israel suan mipite tengteng houpih inla, a kiang uah: Na siangthou ding uh ahi, Kei, TOUPA na Pathian uh ka siangthou ngal a.

³Michih in na nu leh na pa na lau ding uh ahi. Ka khawlnite na tan ding uh ahi. Kei TOUPA Na Pathian uh ka hi.

⁴Milim lam ah kihei kei unla, sunthoh milim pathiante leng kibawltawm kei un. Kei TOUPA na Pathian uh ka hi.

⁵TOUPA adia kilemna thillat na lat chiang un noumau deihtelna a na lat ding uh ahi.

⁶Na lat ni mah uh ahihkeileh a zing a na nekding uh ahi. A ni thum ni tan a, a val a omlai leh mei a na hal ding uh ahi.

⁷Ni thum ni a kinek leh thilkihhuai ahi a; pomsak ahi kei ding hi.

⁸A ne kuapeuh in TOUPA thil siangthou a hihnit ziak in a thulimlouhna mawh a kipuak dia, huai mi a chipihte apan satkhiat ding ahi.

⁹Na lou ua buh na lak chiang un, lounawl zulte tan in na lavek ding uh ahi kei. A sang leng na zong ding uh ahi kei.

¹⁰Na grephuan uah a sang na zong ding uh ahi kei. Na grephuan ua a gah kia leng na tomkhawm ding uh ahi kei. Mi zawng leh gamdangmi ading in na hawisak ding uh ahi. Kei TOUPA na Pathian uh ka hi.

¹¹Na gu ding uh ahi kei. A taklou in thil na hih ding ahi kei. Zuau na kihilh tuah ding uh ahi kei.

¹²Na Pathian min hemsak ding in ka min in dikloutakin na kichiam ding uh ahi kei. Kei TOUPA ka hi.

¹³Na invengte na khem ding ahi kei. Na guk sak ding leng ahi kei. Kilohmi loh zankhua in a zingsang tan in na kem ding ahi kei.

¹⁴Nangong na hamsiat ding ahi kei. Mittaw ma ah a pukna ding na koih ding ahi kei. Na Pathian na lauh ding ahi. Kei TOUPA ka hi.

¹⁵Vaihawmna ah diktatlou tak in thu na khen ding ahi kei. Mi zawng na simmawh tuam ding ahi kei hi. Mi thilhihthei na zahtak tuam ding ahi kei. Himahleh diktattak in na invengte vai na hawm sak ding ahi.

¹⁶Na chipihte lak ah migensia in na vialvak ding ahi kei. Na invengte sisan thu ah a hilou lam in na pang ding ahi kei. TOUPA ka hi.

¹⁷Na lungtang in na unau na haw ding ahi kei. Na invengte na taihilh ngeingei ding ahi. Na huchih leh a gitlouhna ah na siang ding hi.

¹⁸Phu na la ding ahi kei. Na chipihte suante huatna na pai ding ahi kei. Nang na ki-it bang in na invengte na it ding ahi. Kei TOUPA ka hi.

¹⁹Ka thupiakte na zui ding uh ahi. Na ganta chi tuamtuam suangsak ken. Na lou ah haichi chi nih chingkhawm ken. Thil chituam nih gatpolh puan na silh ding ahi kei.

²⁰Kuapeuh sikhanu, a pasal ding khamsa nei, tat nailouh, khahkhiak nailouh numei toh lumkhawm peuhmah gawt ding ahi. Himahleh hihlup ding bel ahi kei, amah zalen ahihlouh ziak in.

²¹Kihoupihna puanin kongpi bul ah TOUPA kiang ah a tatlekna thoihna ding in belampa a honkaih ding ahi.

²²A thil hihkhelhsa, a khelhna ah TOUPA ma ah tatlek thoihna belampa in siampu in kilemna a bawlsak dia; huchi in a thil hihkhelhsa ngaihdam ahi ding.

²³Gam na valuah ua, nek dia theikung chichih na suan hun un a gah sianglou in na ngai ding uh. Nou ading in kum thum sianglou a ngaih ding ahi a, nek hetlouh ding ahi.

²⁴Himahleh, a kum lina ah a gah teng TOUPA phatna ding in amah adia sehtuam ahi ding hi.

²⁵A kum ngana ah nou adia a punzel theihna ding in a gah na ne ding uh ahi. Kei TOUPA na Pathian uh ka hi.

²⁶A sisan toh khat peuh na ne ding uh ahi kei. Bum ching in ai nasan ding uh ahi kei.

²⁷Na baknel apan a kimvel in na lu na met ding ahi kei. Na khamul langtuak leng na tan ding ahi sam kei.

²⁸Misi ziak in na sa uh na atkeh ding uh ahi kei. Na satung ua gelh in chiamtehna na gelh ding uh ahi kei. Kei, TOUPA ka hi.

²⁹Na tanu kizuak sak ken. Gam angkawmna gam a hongsuak kha dia, gitlouhna in a hong dim kha ding hi.

³⁰Ka Sabbathte na tan ding uh ahi. Ka Mun Siangthou na zahtak ding uh ahi. Kei, TOUPA ka hi.

³¹Dawi aisansiamte zuan kei unla, bumsiamte leng a hon nitsak louhna ding un zongkhe kei un. Kei, TOUPA ka hi.

³²Lu a kelsam poute ma ah ding in. Tek omna na zahtak in. Na Pathian lau in. Kei, TOUPA ka hi.

³³Gamdangmi, na gam ua a na tengsam a om leh na hihsiatlouh ding uh ahi.

³⁴Gamdangmi na lak ua tengte bel nou a din na gam ua mi bang ahi ding ua, nangmah na ki-it bang in amah na it ding ahi. Nou leng Aigupta gam ah gamdangmi na hi ngeita uhi. Kei TOUPA na Pathian uh ka hi.

³⁵Vaihawm thu ah, tehna chiang ah, gikdan ah leh saudan tehna ah diktatloupi in na hih ding uh ahi kei.

³⁶Bukna dik, gikdan dik, ephah dik, hindik na nei ding uh ahi. Kei TOUPA na Pathian uh Aigupta gam apan nou hon pikhepa ka hi.

³⁷Ka thupiak tengteng leh ka vaihawm tengteng na pom ding ua, na zuih ding uh ahi. Kei, TOUPA ka hi, a chi hi.