Read Paite Chin LEVITIKAS 2 Bible Online

LEVITIKAS 2 - Paite Chin bible

LEVITIKAS 2

¹Huan Kuapeuh in thillat, tangbuang thillat TOUPA kiang a lat chiang in, a thillat tangbuang nel dimdem ahi ding ahi. Sathau a buak dia, a tung ah begaw a koihlai ding ahi.

²Aron tapa siampute kiang ah a paipih dia; aman a pham khat in huai a tangbuang nel dimdem, a sathau toh, a begaw tengteng toh a lakhe ding a, siampu in maitam tung ah theihgigena, TOUPA adia gimlim tak, mei a thillat ding in a hal ding hi.

³Tangbuang thillat bangte Aron leh a tapate ading ahi ding. Huai TOUPA adia mei a thillatte a thil siangthou tak ahi.

⁴Tangbuang thillat, a kanna a kan thillat na lat leh, tangbuang nel dimdem, sathau a mek silngou sohlouh tanghou hiam, sathau a zut, silngou sohlouh tanghou pei hiam ahi ding ahi.

⁵Na thillat, kuang a kan tangbuang thillat ahihleh, silngou sohlouh, sathau a mek, tangbuang nel dimdem ahi ding hi.

⁶Na phelkhap ding a, sathau a na buah ding ahi. Huai tangbuang thillat ahi.

⁷Na thillat kan bel a kan, tangbuang thillat ahihleh tangbuang nel dim dem leh sathau a bawl ahi ding hi.

⁸Hiai thil a bawl tangbuang thillat TOUPA kiang ah na hontawi dia; siampu kiang a lat ahi dia, aman maitam ah a hon paipih ding hi.

⁹siampu in tangbuang thillat apan theihgigena pen a lakhe dia, maitam ah a hal ding. Hiai TOUPA adia gimlim tak, mei a thillat ahi.

¹⁰Tangbuang thillat lat bangte Aron leh a tapate a tuam ding ahi dia; hiai TOUPA adia mei a thillatte lak a siangthou pen ahi.

¹¹Tangbuang thillat himhim, TOUPA kiang a na lat ding uh silngou soh a bawl ding ahi kei. TOUPA adia mei a thillat ah silngou hiam, khuaizu himhim nahel ding uh ahi kei.

¹²Gah masapen thillat bang in TOUPA kiang ah na lan ding ua; gimlim dia maitam a koih ding ahi kei hi.

¹³Na tangbuang thillat ah na Pathian thukhun chi na maih ding ahi kei. Na thillat tengteng ah chi na lattel ding ahi.

¹⁴Gah masapen tangbuang thillat TOUPA kiang a na lat leh na buh thak masapente, tangbuang thillat ding in tanghou pek na lan ding ahi.

¹⁵Sathau na buak dia, a tung ah begaw na koih ding ahi,

¹⁶siampu in huai theihgigena, buh sukzan bangzah hiam toh begaw tengteng toh a hal ding ahi. Hiai TOUPA adia a mei a thillat ahi.