Read Paite Chin LEVITIKAS 20 Bible Online

LEVITIKAS 20 - Paite Chin bible

LEVITIKAS 20

¹Huan, TOUPA’N Mosi a houpih a:

²Israel suante kiang ah, Kuapeuh, Israel suante lak a mi hiam, Israel gam a teng gamdangmi hiam, a gil a gah Molech pe peuhmah hihlup ngeingei ding ahi. Hiai gam a miteng in suang in a denglum ding uhi.

³Ka Mun Siangthou leh ka min siangthou hihnin ding a, a gilgah khenkhat Molech kiang a a piak ziak in huai mi tung ah ka mai ka gumsak dia, a chipihte lak apan ka satkhe ding hi.

⁴Hiai gam a mite’n a gil a gah Molech kiang a piak a kitheihmohbawl ua, a hihlup kei uleh,

⁵amah leh a inkawte tung ah ka mai ka gumsak dia, Molech kiang a kei hon angkawm san peuhmahte toh a chipihte uh lak apan ka satkhe ding hi.

⁶A lak ua angkawm dia dawi aisansiamte leh bumsiamte zuan mi tung ah ka mai ka gumsak dia; a chipihte lak apan ka satkhe ding hi.

⁷Huaiziak in, kihihsiangthou unla, siangthou in om un. Kei TOUPA na Pathian uh ka hi ngal a.

⁸Ka thupiakte pom in na zui ding uh ahi. Kei TOUPA nou honhih siangthoupa ka hi.

⁹A nu hiam, a pa hiam hamsiat khum peuhmah hihlup ngeingei ding ahi. A nu hiam, a pa hiam hamsiat khum ahi a, a tung ah a sisan mawh a om ding ahi.

¹⁰Mi zi angkawm, a invengte zi angkawm zaw, a angkawmpa leh a angkawmnu, a nih ua hihlup ngeingei ding ahi.

¹¹A pa zi luppih in a pa vuaktanna lem ahi a; hihlup tuaktuak ding ahi. A sisan mawh a tung uah a om ding hi.

¹²Mi’n a mounu a luppih leh hihlup tuaktuak ding ahi. Tatsiatna tungtuan hih ahi ua, a sisan mawh a tung uah a om ding hi.

¹³Mi’n numei a luppih bang a pasal a luppih leh thil kihhuai mahmah hihtuak ahi ua, hihlup ngeingei ding ahi. A sisan mawh a tung uah a om ding hi.

¹⁴Mi’n nuta zi in nei leh gitlouhna ahi. Na lak ua thulimlouhna a omlouhna ding in amah leh nutate mei a hallup ding ahi.

¹⁵Mi’n ganta a luppih leh hihlup ngeingei ding ahi. Ganta leng hihlup ding ahi.

¹⁶Numei in ganta a va naih a, a kiluppih sakleh huai numei na hihlup ngeingei ding uh ahi. Ganta leng hihlup ngeingei ding ahi a; a sisan mawh a tung uah a om ding hi.

¹⁷Mi’n a sanggamnu, a pa tanu hiam, a nu tanu hiam a kitenpih a, a vuaktanna a muh a, aman leng a vuaktanna a muh leh thil gilou hih ahi ua, a mite mitmuh a satkhiat ding ahi uh. A sanggamnu vuaktanna lem ahi a, a tatlekna mawh a paw ding hi.

¹⁸Mi’n numei a kha teng sineih a neih lai a, a luppih a, a vuaktanna a lem leh a si pawtna lem ahi a, aman leng a si pawtna lem ahi a, a chipihte ua pan a nih ua satkhiat ding ahi.

¹⁹Na nu sanggamnu hiam, na pa sangnu hiam vuaktanna na lem ding ahi kei. A sanggam nai vuaktanna lem ahi a, a gitlouhna mawh a paw ding.

²⁰Mi’n a pangak zi a luppih leh a pangak vuaktanna lem ahi a; a khelh mawh uh a paw ding ua, suanlehpak bei in a si ding uh.

²¹Mi’n a unaupa zi a kitenpih leh thilnin ahi a, a unaupa vuaktanna lem ahi a, suanlehpak neilou in a om ding uh.

²²Huaiziak in ka thupiak tengteng, ka vaihawm tengteng na pom ding ua, na zui ding uh ahi. Huchi in tenna dia k’on pina gam in nou a hon lawkhe kei ding hi.

²³Na ma ua ka delhkhiaksa namdangte thilhihte na zui ding uh ahi kei. Hiai thil tengteng a hih ua, huaiziak in, amau ka kih hi.

²⁴Himahleh nou kiang ah, a gam uh, nawitui leh khuaizu luanna gam na luah ding un k’on pe ding, ka chi khinta hi. Kei TOUPA na Pathian uh, namdangte apan hon hihtuampa ka hi.

²⁵Huaiziak in, sa siang leh sianglou leh vasa siang leh sianglou na khen tuam ding ua; sa hiam, vasa hiam lei a vak thoh chi himhim hiam nou adia sianglou dia ka sehtuamte in na hinna uh na kihhuai sak ding uh ahi kei.

²⁶Kei ading in Mi Siangthou na hi ding uh ahi. Kei TOUPA lah ka siangthou ngal a. Kei a na hihna ding un namdangte lak apan nou k’on septuamta hi.

²⁷Pasal leng, numei leng dawi aisansiam zawl hiam, bumsiam hiam hihlup ngeingei ding ahi a; suang a denlup ding ahi uh. A sisan mawh uh a tung uah a om ding hi, a chi nawn lai hi.