Read Paite Chin LEVITIKAS 21 Bible Online

LEVITIKAS 21 - Paite Chin bible

LEVITIKAS 21

¹Huan, TOUPA’N Mosi kiang ah: Aron tapa siampute houpih inla, a kiang uah: a chipihte uh lak a misi ziak in kuamah a kihihnin ding ahi kei.

²A tanau nai, a nu uh, a pa uh, a tapa uh, a tanu uh, a unau,

³a sanggamnu, a ompih lai uh nungak, pasal nei nailoute ziak in ahihleh a ki hihnin thei ding uhi.

⁴Hiai bang ahihkei ngal leh, a chipihte uh lak a intekpen a hih ziak in a kihihnin ding ahi kei.

⁵A lu uh a metgiau ding uh ahi kei. A khamul siktuak uh leng a tan tom ding uh ahi kei. A sa uh leng a atkeh ding uh ahi kei hi.

⁶A Pathian uh ading in Mi Siangthou ahi ding ua, a Pathian min a hemsak ding ahi kei hi. TOUPA adia mei a thillat, a Pathian adia nekding ansiahte a lat ziak in a siangthou ding ahi.

⁷Numei kizuak hiam, min hem hiam, a pasal maksa hiam a kitenpih ding ahi kei, a Pathian ading in Mi Siangthou ahi ngal a.

⁸Huaiziak in, amah na siangthousak ding ahi; aman na Pathian tanghou a lat ziak in, nang ading in a siangthou ding hi. Kei, TOUPA, nou honhih siangthoupa lah ka siangthou ngal a.

⁹siampu kuapeuh tanu kizuak a, a kihih thanghuai leh a pa a hih thanghuai ahi a, mei a hal ding ahi.

¹⁰A unaute lak a siampu lianpen, a lu sathau nilhsa, puansilh dia sehtuamsa in a lukhuhna a lakhe ding ahi kei. A puante a botkek ding ahi kei.

¹¹Misi luang omna ah a lut ding ahi kei. A nu hiam, a pa hiam ziak in a kihihnin ding ahi sam kei hi.

¹²Mun siangthou apan a pawtkhe ding ahi kei. A Pathian Mun Siangthou a hih thanghuai ding ahi sam kei hi. A Pathian sathaunilhna lah a tung ah a om ngal a; Kei TOUPA ka hi.

¹³Zi ding in nungak siangthou a kitenpih ding ahi.

¹⁴Meithai hiam, maksa hiam, numei minhem hiam, kizuak hiam a kitenpih ding ahi kei. Amah chipih, nungak siangthou zi ding in a kitenpih ding ahi.

¹⁵A chipihte lak ah a suante a hihnin ding ahi kei. Kei TOUPA’N amah ka hihsiangta ngal a, chi in, a chi hi.

¹⁶TOUPA’N Mosi a houpih a:

¹⁷Aron kiang ah, a suante lak a na khang ua demna ding nei peuhmah in a Pathian adia ansiah lan ding in honzuan kei hen.

¹⁸Kuapeuh melhemna nei in a honnaih hetlouh ding ahi. Mittaw, khebai, nakpek ahihkeileh a kan a val a om peuhmah;

¹⁹Ahihkeileh khe kitan, khut kitan,

²⁰Ahihkeileh nungkul, mineu lua, mit sia, meima damthei lou nei ahihkeileh chiltang kitam,

²¹Siampu Aron suan gensiatna ding nei himhim in TOUPA adia mei a thillat lan ding in a honnaih ding ahi kei. Gensiatna ding nei ahi a, a Pathian adia sehtuam an lan dia a honnaih hetlouh ding ahi.

²²A Pathian adia an siangthou leh siangthou pen ahihleh a ne thei ding hi.

²³Himahleh gensiatna ding nei a hih ziak in puanzak sung ah hiam, maitam kiang nai ah hiam a hongpai theikei ding. Ka mun siangthoute a hihnin kha ding hi. Kei TOUPA amah hih siangthoupa ka hi ngal a, chi in, a chi hi.

²⁴Huchi in Mosi in Aron leh a tapate leh Israel suante tengteng kiang ah a genta hi.