Read Paite Chin LEVITIKAS 23 Bible Online

LEVITIKAS 23 - Paite Chin bible

LEVITIKAS 23

¹Huan, TOUPA’N Mosi a houpih a:

²Israel suante houpih inla, a kiang uah: TOUPA Ankuanglui hunbi hiaite ahi.

³Ni guk sung nna nasem ding ua, a ni sagih ni khawlna Sabbath ahi a, khawmpi siangthou ahi. Hiai ni’n nna nasem ding uh ahi kei. Na tenna teng uah hiai TOUPA Sabbath ahi.

⁴TOUPA Ankuanglui hunbi, khawmpi siangthou, a hun geihgeih a na phuan ding uh hiaite ahi.

⁵A kha khatna, ni sawmlehli nitaklam in TOUPA Paikan Ankuang a kipan ding hi.

⁶Huai kha mah ni sawmlehnga TOUPA adia silngou sohlouh tanghou Ankuang ahi a, ni sagih sung silngou sohlouh tanghou na ne ding uh ahi.

⁷A ni khat ni’n khawmpi siangthou na nei ding ua, nna himhim na sem ding uh ahi kei.

⁸Ni sagih sung mei a thillat TOUPA kiang ah na lan ding ua; a ni sagih ni pen khawmpi siangthou ahi a, nna himhim na sem ding uh ahi kei, chi’n, a chi hi.

⁹TOUPA’N Mosi a houpih a:

¹⁰Israel suante houpih inla, a kiang uah, K’on gam piak ding na vatun ua, huai a buh na lak chiang un, na buh thak masate uh phal khat siampu kiang a n’on tawi ding uh ahi.

¹¹Pomsak theih na hihna ding un, aman buhphal pen TOUPA ma ah a hon na veisak dia; khawlni zingchiang in siampu in a vei ding ahi.

¹²Buhphal na vei ni un belamnoupa, gensiatbei, kum khat a upa haltum thillat ding in TOUPA kiang ah na lan ding uh ahi.

¹³Tangbuang thillat bel tangbuang nel chi ephah mun sawm a khen, mun nih sathau a mek, TOUPA adia gimlim, mei a thillat ahi ding ahi. Dawn thillat ahihleh uain hin mun li a khen, mun khat ahi ding ahi.

¹⁴Na Pathian uh adia thillat na lat ma un, huai ma himhim in tanghou hiam, kan thoh hiam, an thak hitaleh na ne ding uh ahi kei. Hiai na tenna teng ua na suante zel uh tan a na tangtawn dan ding uh ahi.

¹⁵Sabbath zing chiang vei thillat buhphal n’on tawi ni ua pan in na sim ding ua, khawlni sagihvei a ching ding ahi.

¹⁶Khawlni sagihveina zingsang apan ni sawmnga na sim ding ua, TOUPA kiang a tangbuang thak thillat na lat ding uh ahi.

¹⁷Na tenna mun ua pan in ephah mun sawm a khen, mun nih a bawl, tanghou beu vei ding nih, tangbuang nel chi, silngou toh kan, TOUPA adia gah masa vei thillat a lat dia na hontawi ding uh ahi.

¹⁸Tanghou lat toh kituak in belamnou sagih gensiatbei, kum khat a upa leh bawngtuai leh belampa nih na lan ding uh ahi. Huaite a tangbuang thillat uh leh a dawn thillat u toh, TOUPA adia haltum thillat, TOUPA adia gimlim, mei a thillat ahi ding hi.

¹⁹Khelh thoihna ding in kelpa khat leh kilemna thillat kithoihna ding in belamnou a pa nih kum khat a upa na lat ding uh ahi.

²⁰Siampu in gah masa a bawl tanghou, belamnou nih toh TOUPA ma a vei thillat in a vei dia; siampu a tuam, TOUPA adia siangthou ahi ding.

²¹Huai ni mah na sep ding ua, nou ading in khawmpi siangthou ahi dia, nna himhim na sem ding uh ahi kei. Hiai na tenna teng uah na suante uh tan in tangtawn dan ding ahi.

²²Na lou ua buh na lak chiang un na lounawl zul uh lavek kei un. A sang leng na zong ding uh ahi kei. Mizawng leh gamdang mi adia na hawi sak ding uh ahi. Kei TOUPA na Pathian uh ka hi, chi in, a chi hi.

²³TOUPA’N Mosi a houpih a:

²⁴Israel suante houpih inla, a kiang uah, a kha sagihna huai kha ni khat ni nou ading in khawlna ni ahi dia; pengkul mut in theihgigena khawmpi siangthou ahi ding.

²⁵Nna himhim na sem ding uh ahi kei; TOUPA adia mei a thillat na lan ding uh, chi in, a chi hi.

²⁶TOUPA’N Mosi a houpih a:

²⁷A kha sagihna ni sawm ni Kilemna Ni ahi a; nou ading in khawmpi siangthou ahi ding. Na lungsimte uh zangsak unla, TOUPA ading in mei a thillat lan un.

²⁸Huai ni’n bang napeuh na sem ding uh ahi kei. TOUPA na Pathian uh ma a lemna bawlsak ding, Kilemna ni lah ahi ngal a.

²⁹Huai ni kizang saklou peuhmah, a mite apan satkhiat ahi ding.

³⁰Kuapeuh hi hen aw, huai ni a bang nna peuh sem, a chipihte uh lak apan ka satkhe ding hi.

³¹Bang nna himhim na sem ding uh ahi kei. Hiai bel na tenna peuh ua na suante zel uh tan a tangtawn dan ding ahi.

³²Nou ading in khawlna Sabbath ahi a; na kizang sak ding uh ahi. Huai kha ni kua ni nitaklam, huai kha nitaklam apan nitaklam nawn tan khawlni’n na zang ding uh ahi.

³³TOUPA’N Mosi a houpih a:

³⁴Israel suante houpih inla, a kiang uah, a kha sagihna ni sawmlehnga TOUPA ading in ni sagih sung Bawkta Ankuang ahi ding hi.

³⁵A ni khatna pen khawmpi siangthou ahi dia, nna himhim na sem ding uh ahi kei.

³⁶Ni sagih sung in mei a thillat TOUPA kiang ah na lan ding ua, a ni giat ni nou ading in khawmpi siangthou ahi ding. Mei a thillat TOUPA kiang ah na lan ding ua; khawmpi bei ni ahi a, nna himhim na sem ding uh ahi kei.

³⁷Hiaite ahi, TOUPA Ankuangluina hunbi, TOUPA adia mei a thillat, haltum thillat, tangbuang thillat, kithoihna, dawn thillat, a ni tuam chiat a lan dia khawmpi siangthou na zat dingte uh,

³⁸TOUPA khawlnite, na thilpiakte uh, na thuchiam tengteng uh, amah ut thu a thillat, TOUPA kiang a na thillat zelte uh ban ah.

³⁹A kha sagihna ni sawmlehnga ni a na lou ua thilpiangte na lak khit chiang un TOUPA Ankuangluina ni sagih na zang ding ua; a ni khatna ni khawl kinken na ni ahi dia, a ni giat ni leng khawl kinken na mah ahi ding hi.

⁴⁰A ni khat ni’n singkung hoihte gahte, tumsing hiangte, singbawkpha hiangte, lui a muisumte na tawi ding ua, TOUPA na Pathian uh ma ah ni sagih sung kipak in na om ding uhi.

⁴¹Hiai Ankuangluina bel TOUPA adia kum chih a ni sagih sung na zat ding uh ahi. Hiai na suante uh zel tan a tangtawn dan ding ahi. A kha sagihna a na zatzel ding uh ahi.

⁴²Sawlbuk ah ni sagih sung na teng ding ua, Israelmi a piang himhim sawlbuk ah na tenvek ding uh ahi.

⁴³Huchi in na suante un Israel suante Aigupta gam apan ka pikhiak lai in sawlbuk ah ka tengsak, chih a thei ding uh. Kei TOUPA na Pathian uh ka hi, chi in, a chi hi.

⁴⁴Huchi in Mosi in TOUPA Ankuangluina hunbite Israel suante kiang ah a phuangta hi.