Read Paite Chin LEVITIKAS 25 Bible Online

LEVITIKAS 25 - Paite Chin bible

LEVITIKAS 25

¹Huan TOUPA’N Sinai tang ah Mosi a houpih a:

²Israel suante houpih inla, a kiang uah, K’on gam piak ding na va tun chiang un, TOUPA min in a gam in leng Sabbath a tang ding ahi.

³Na lou uah kum guk sung thil na ching ding ua, na grephuan kum guk sung na satnou ding ua, a gahte na la ding uhi.

⁴A kum sagih kum in gam khawl kinken na, TOUPA min a Sabbath ahi dia: na lou a buh leh bal na chin ding uh ahi kei, na grephuan na satnou ding ahi sam kei.

⁵Na buhpou na la ding ahi kei, na keplouh grep na lou ding ahi kei. Gam khawl kinken na kum ahi ding ahi.

⁶Gam khawl kum a te na nektawm ding uh ahi dia; nang, na sikha leh na sikhanu, na kilohmi, na kiang a teng gamdangmi ading ahi.

⁷Na bawnghon, na gam a ganta adia nektawm ding ahi.

⁸Khawl kum, kum sagih na sim dia, kum sagih mun sagih ahi ding a; khawl kum, kum sagih sung kum sawmli leh kua ahi ding hi.

⁹Huaikhit kha sagihna, ni sawm ni’n pengkul ngaihtak in na vialmut sak dia; Kilemna Ni in na gam tengteng uah pengkul na vialmut sak ding uhi.

¹⁰Kum sawmngana na kipahpih ding ua, gamsung tengteng ah, huai a tengtengte kiang ah noplenna thu na phuang ding uhi. Nou ading in Jubili ahi dia; michih in noumau a chiat na neinawn ding uh. Michih amah inkuan ah a tengnawn ding ahi.

¹¹Huai kum sawmngana pen nou ading in Jubili ahi dia; bangmah na ching kei ding ua, a pou leng na lakei ding ua, keplouh grep gah leng na lou ding uh ahi kei.

¹²Jubili a hih ziak in nou ading in siangthou ahi dia, na lou ua thil gahte na ne ding uhi.

¹³Hiai Jubili kum in michih kiang ah amah a mah na pe kiknawn ding uh ahi.

¹⁴Na invengte kiang a banghiam na khot a, na invengte kiang a banghiam na lei in leng kikhem in kinekna lemtang in na zang ding uh ahi kei.

¹⁵Jubili khit a kum zah bangzel in na invengte thil na lei dia, buh leh bal tun kum tamdan dungzui in na kiang ah a zuak ding ahi.

¹⁶A kum tam dan dungzui zel in aman na khangsak dia, a kum tawm dan dungzui in aman na kiamsak ding ahi. Buhlehbal tunkum tam dungzui a na kiang ah zuak lah ahi ngal a.

¹⁷Na kikhem ding uh ahi kei. Na Pathian na lau ding uh ahi. Kei TOUPA na Pathian uh ka hi ngal a.

¹⁸Huaiziak in, ka thusehte zui in ka vaihawmte na pom ding uh ahi. Huchi in huai gam ah bittak in na teng ding uhi.

¹⁹Gam in gah a suah dia, niang leh tai a ne in na ta ding ua, bittak in na vateng ding uhi.

²⁰Ahihleh, a kum sagih kum in bang ka neta ding ua? Ngai dih, bangmah lah ka ching kei ua, ka thil tungte uh lah ka la sam kei ua, na chih uleh,

²¹A kum guk kum in ka vualzawlna na tung ua tung ding in thu ka pedia, kum thum sung ading gah a suah ding hi.

²²A kum giat kum in buh na ching ding ua, haichi na pawi sung un buh luite na ne ding ua, kum kua kum tan, a hongthak nawn matan in a luite na ne ding uhi.

²³Tangtawn a dia gam pen khotden ding ahi kei, gam lah kei a ahi ngal a. Noute mikhual, a khohloh lel na hi uh.

²⁴Na gamluah tengteng uh, tatkik na phal ding uh ahi.

²⁵Na unau a hong gentheih a, a gam khenkhat a zuak leh a tanau naipen a hong kuan dia, a unau gam zuaksa a tan ding ahi.

²⁶Mi’n tatsak ding mi neikei mahleh a hong navaka tatna khop a neih leh,

²⁷a zuak kum sut henla, a zuaknapa kiang ah a val pe nawn hen; huchi in a gam a luahnawn ding.

²⁸Amah adia a tatkiktheih nawn kei leh, a khotsa pen Jubili kum tan in a leipa khut ah om hen. Jubili kum in a pawt nawn dia, aman a gam a luah nawn ding hi.

²⁹Mi’n kulhnei khua a tenna inn a zuak leh a zuak apan kum khat sung in a tatnawn theihna hamphatna a nei ding hi. Kum khat sung in a tanthei nawn ding hi.

³⁰Kum khat sung a a tattheihkei leh, kulhnei khua a a inn pen tangtawn in a suante zel tan in leng a leimi a ahi den ding ahi, Jubili chiang in leng a pawt tuankei ding hi.

³¹Kulh neilou khua a innte singtang gam bang a ngaih ahi dia, tattheih ahi dia, Jubili chiang in a pawt ding.

³²Himahleh Levimite khua, a tantuam khua ua innte Levimite’n chiklaipeuh in leng a tanthei ding uhi.

³³Levi chite lak a mi’n a tat kei leh zuaksa inn leh a tantuan khua pen Jubili chiang in a pawt ding. Levi chite khua a innte Israel suante lak a a tantuan uh ahi.

³⁴A khokim ua loute zuaktheih ahi kei ding, tangtawn a tantuan uh ahi.

³⁵Na unau a hong gentheih a, nang a hong belh leh na kep ding ahi. Mikhual ahihkeileh khualzin bang himahleh amah na kiang ah na tengsak ding ahi.

³⁶Amah apan dangka hiam, thil hiam, a pung laken, himahleh, Pathian lau in, na unau na kiang a a ten theihna ding in.

³⁷A pung delh in na sum na leitawi sak ding ahi kei.

³⁸Kei TOUPA na Pathian uh, Kanan gam hon pepa leh na Pathian uh hidia Aigupta gam apan hon pikhepa ka hi.

³⁹Na unau a hong gentheih a, na kiang a a hong puklut leh sikha bang a na zat ding ahi kei.

⁴⁰Kilohmi bang leh na kiang a tengsam bang in na kiang ah a teng dia, Jubili kum tan in nangmah na a sem ding ahi.

⁴¹Huaikhit in na kiang apan a pawt dia, amah leh a tate, amau inkuan ngei ah a lutnawn ding uh, a pi leh pute in leh lou a luahnawn ding uhi.

⁴²Aigupta gam apan ka pikhiak, ka sikhate ahi ngal ua, sikha dia zuakkhiak ding ahi kei uh.

⁴³Huhamtakin a tung uah gamta kenla; na Pathian lau zaw in.

⁴⁴Sikhanu leh sikhapa na neih dingte na kim ua nam lak a mi, sikhanu leh sikhapa dia na lei dingte ahi ding uhi.

⁴⁵Na lak ua teng gamdangmi leh na gam ua piang a inkawte uh lak a mite leng na lei theisam ding ua; amau na thilneih a suak ding uh.

⁴⁶Na nung ua na tate uh gouluah ding in, a thilneih ding un na bawl ding uhi. Huai lak a mite na tangtawn sikha ding in na nei ding uh. Himahleh na unau Israel suante lak ah huham tak in na gamtang ding uh ahi kei.

⁴⁷Gamdangmi hiam, na kiang ua teng kuahiam hong hau a, a kiang a na unaupa a hong gentheih a, na kiang a gamdangmi hiam, na kiang a teng kiang hiam kiang a amah leh amah a kizuak khiak leh,

⁴⁸khotsa ahihnungin leng a kitankik thei ding hi; a unaute lak a khat in amah a tan thei ding hi.

⁴⁹A pangak in hiam, a pangak tapa in hiam a tan thei ding; a chipihte lak a a tanau nai in hiam a tan thei ding hi. Amah leng a hong hauh nawn leh a kitanthei ding hi.

⁵⁰A puklutnapa toh a puklut apan Jubili kum nawn ding sutkhawm uhenla, a puklut man, a kum omdan in ahi dia; kiloh sikha dia goih sut bangzel a sut sak ahi ding hi.

⁵¹Kum tampi a omlai leh a tatna man pen a belh sung hu toh kituak a piak kiknawn ding ahi.

⁵²Jubili kum tunna ding kum tawmchik kia omlai ahihleh sut khawm uhenla; a om kum tam dan dungzui in a tatman a pekik ding ahi.

⁵³Kum khat bizel a goih kilohmi bang in a bel ding hi. A belhpa a tung a huhamtak a na gamtat saklouh ding ahi.

⁵⁴Hiai kumte a tat ahihkeileh, Jubili kum in a pawt ding, amah leh a tate teng toh.

⁵⁵Israel suante lah ka sikhate ahi ngal ua, Aigupta gam apan ka pikhiak, ka sikhate ahi uh. Kei TOUPA na Pathian uh ka hi.