Read Paite Chin LEVITIKAS 26 Bible Online

LEVITIKAS 26 - Paite Chin bible

LEVITIKAS 26

¹Milimte na kibawl ding uh ahi kei. Milim bawltawm suangphuh na dingsak ding uh ahi kei. Biak ding in na gam uah suang milim na phut ding uh ahi sam kei. Kei TOUPA na Pathian uh ka hi ngal a.

²Ka Sabbathte na tang ding ua, ka Mun Siangthou na zahtak ding uh ahi. Kei TOUPA ka hi.

³Ka thusehte na mang ding ua, ka thupiakte pom a na man uleh vuahtui a hunhun in k’on zusak ding hi.

⁴Lei in thil a hon piangsak dia, gam a singte’n gah a suang ding uhi.

⁵Na phual ua buh in grep loh hun a banpha dia, na grep loh hun un thilchin hun a ban pha ding hi. Na tanghou uh niang leh tai in na ne ding ua, na gam uah bittak in na teng ding uh.

⁶Hiai gam ah muanna ka omsak dia, na lum ding ua, kuamah in a hon lausak kei ding. Gamsa hoihloute hiai gam apan ka hawlmang dia, namsau in na gam uh a tuansuak sam kei ding hi.

⁷Na melmate uh na delh ding ua, na ma uah namsau a thah in a om ding uh.

⁸Mi nga in za khat na delh ding ua, za khat in sing khat na delh ding uh. Na melmate uh na ma uah namsau a thah in a om ding uhi.

⁹K’on deihsak dia, chi tampi k’on suangsak ding hi. Na lak uah ka thukhun ka hihkip ding.

¹⁰Sawtpi na kepsa, a luite na ne ding ua, a thak koihna ding in a luite na lakhe ding uh.

¹¹Na lak uah ka biakbuk ka omsak dia; ka hinna in noute a hon kih kei ding.

¹²Na lak uah ka teng dia, na Pathian uh ka hidia, nou leng ka mite na hi ding uh.

¹³Kei TOUPA na Pathian uh, a sikha uh na hihlouhna ding ua Aigupta gam apan noute hon pikhepa ka hi. Na hakkolte uh ka hihtanta a, ding tang in k’on paisakta hi.

¹⁴Himahleh ka thu pom lou a, hiai thupiak tengteng na zuih kei ua, ka thusehte na deihkei ua,

¹⁵na hinna un ka vaihawmte a huat a, ka thupiak tengteng zui lou a, ka thukhun na bohsiat uleh ken leng na tung uah hiai ka hih ding.

¹⁶Na tung uah thil lauhuai, na hinna uh netum leh na mit uh hihsia kumzawnna leh khodam ka lengsak ding hi. Na haichite uh bangmahlou dia ching na hi ding ua, na melmate un a ne zel ding uh.

¹⁷Na tung uah ka mai ka gumsak dia, na melmate uh ma ah na vuallel ding uh. Nou hon hawte’n na tung uah vai a hawm ding ua, kuamah delhlouh in na tai ding uhi.

¹⁸Huchi pipi a leng ka thu na pom kei lai uleh na khelhnate uh ziak in sagihvei k’on gawt lai ding hi.

¹⁹Na thilhihtheihna kiotsakna uh ka hihse dia, na tung ua van sik bang in leh na nuai ua lei sumsan bang in ka bawl ding.

²⁰Na tha uh na sengthawn lel ding ua; na gam un thil a piangsak kei dia, gam a singte’n gah a suang sam kei ding uh.

²¹Kei kalh lam a na om ua, ka thu na pom kei uleh na khelhna uh dungzui in a mun sagih in na tung uah gawtna ka tungsak ding.

²²Na lak uah gamsate k’on sawl dia, huaite’n na tate uh a hon laksak ding ua, na gantate uh a hih mangthang ding ua, na hong tawm mahmah ding ua, na lampite uh nutsiat in a om ding hi.

²³Hiaite tawn a k’on bawlhoihna na pom tuankei ua, kei kalh a na omlai lai uleh,

²⁴Ken leng nou k’on kalh dia, kei mahmah in na khelhnate uh ziak in sagihvei k’on gawt ding hi.

²⁵Huchi in na tung uah namsau ka lengsak dia, huai in ka thukhun na palsat uh phu a la ding hi. Noumau khosung chiat a na kibawm khawm chiang un, na lak uah hi ka lengsak dia, melma khut a piak na hi ding uhi.

²⁶Na muan pen uh tanghou ka beisak chiang in, numei sawm in thuk khat ah na tanghou uh a emkhawm ding ua, na tanghou uh buk chitchiat in a honpe ding ua; na ne ding ua, na kham tuankei ding uhi.

²⁷Huchi tengteng a leng ka thu na pom kei ua, kei kalh a na om lailai uleh hehtak in noute k’on kalh ding hi.

²⁸Na khelhnate uh ziak in sagihvei, kei mahmah in k’on gawt ding hi.

²⁹Na tapate uh sa na ne ding ua, na tanute uh sa na ne nalai ding uhi.

³⁰Na mun sangte uh ka chimsak dia, na milimte uh ka puksak dia, na luang uh na milimte uh luang tung ah ka pai ding. Ka hinna in nou a hon kih ding hi.

³¹Na khuate uh ka gamsak dia, na mun siangthoute uh ka hawmsak dia, na gimlimte uh ka dik kei ding hi.

³²Gam ka hihse ding a; huai a om na melmate un lamdang a sa ding uh.

³³Namdangte lak ah k’on dalhsak dia, nou hon delhzui ding in namsau ka phawi ding. Huchi in na gam uh a hawm dia, na khuate uh a gam ding.

³⁴A hawm sungteng leh na melmate uh gam a na om sungteng uh gam in a khawlnite a tang dia, a khawlnite ah nuam a sa ding uhi.

³⁵A hawm sungteng in a khawl ding; asung a na tenlai ua a khawllouh ziak un.

³⁶Na lak ua mi omsunte, a melmate uh gam ah a lungtang sung uah bahna ka omsak ding hi. Nahthel ging in leng a delh dia, namsau apan taikek bang in a taikek ding ua, kuamah delhlouh in a puk ding uh.

³⁷Kuamah delhlouh in namsau ma a taikek bang in a kipal puk lem lum ding ua; na melmate uh dal ding in hatna himhim na neikei ding uh.

³⁸Namdangte lak ah na mangthang ding ua, na melmate gam in nou a hon negai ding.

³⁹Na lak ua omsunte na melmate uh gam ah a thulimlouhna ziak un, a muih hiaihiai ding ua; a pi leh pute un a thulimlouhnate uh ziak a a muih loh bang un amau leng a muihloh sam ding uhi.

⁴⁰Ka tung a a khelh ziak leh a thulimlouhna uh leh a pi leh pute thulimlouhna leh kei kalh a a om ziak un,

⁴¹Ken leng amau ka kalh a, a melmate uh gam a ka omsak dante a kitheihmohbawl kei ding ua; a sumlouh lungtang ua a kiniamkhiak ua, a thulimlouhna uh ziak a ka gawtna a pom uh leh, Jakob kiang a ka thukhun ka theigige ding hi.

⁴²Isak leh Abraham kiang a ka thukhunte ka theigige ding hi.

⁴³A gam mah leng ka theigige ding hi. Gam in leng a kihep mangsan dia, amau omlou in a hawmsung in a khawlnite ah nuam a sa ding. Ka vaihawmte a deihlouh ziak uh leh a hinna un ka thusehte a muh noplouh nak ziak in, a thulimlouhna uh gawtna a pom ding uhi.

⁴⁴Huchi pipi in leng, a melmate uh gam a a om un amaute ka paimang kei dia, amaute hih mangthang ding leh ka thukhun bohse ding in amaute ka kih kei ding. Kei TOUPA a Pathian uh lah ka hi ngal a.

⁴⁵A Pathian uh ka hih theihna dia namchih mitmuh a Aigupta gam apan ka pikhiak, a pipute uh thukhun amaute ziak in ka theigige zaw ding hi. Kei TOUPA ka hi, chi’n, a chi hi.

⁴⁶Hiaite Sinai tang a Mosi zang a amah leh Israel suante kal a TOUPA’N a bawl thupiakte, vaihawmte leh dante ahi.