Read Paite Chin LEVITIKAS 27 Bible Online

LEVITIKAS 27 - Paite Chin bible

LEVITIKAS 27

¹Huan, TOUPA’N Mosi a houpih a:

²Israel suante houpih inla, a kiang uah, Mi khat in midangte TOUPA a tuam dia septuam a lan dia thuchiam a bawl leh,

³Pasal ahihleh na sehdan ding kum sawmnih leh kum sawmguk kikal a upa, Mun Siangthou a sekel buk dungzui in dangka sekel sawmnga hu ahi ding ahi.

⁴Numei ahihleh na sehdan ding sekel sawmthum ahi ding ahi.

⁵Kum nga leh kum sawmnih kikal a upa ahihleh, na sehdan ding pasal, sekel sawmnih, numei, sekel sawm ahi ding ahi.

⁶Kha khat leh kum nga kikal a upa ahihleh, na sehdan ding pasal, dangka sekel nga, numei, sekel thum ahi ding.

⁷Kum sawmguk a kipan a tunglam ahihleh, na sehdan ding pasal, sekel sawmlehnga, numei, sekel sawm ahi ding.

⁸Himahleh na sehzah pe zoulou khop a mizawng ahihleh siampu kiang ah a vapai dia, siampu in a nasep ding; thuchiam mi zoh hun bangbang a na sep ding ahi.

⁹Thillat, TOUPA kiang a a lat ding uh gan ahihleh kuapeuh in TOUPA adia huchibang a piak peuh uh thil siangthou ahi ding hi.

¹⁰A hih lamdang ding ahi kei, a hoihpen, a sia in, a siapen a hoih in a kheng ding ahi sam kei. Gan pen gan mah a a khen teitei leh a nih in a siangthou ding uhi.

¹¹Gan sianglou, TOUPA kiang a lat ngeilouh chi ahihleh, gan pen siampu ma a koih ding ahi.

¹²Siampu in a hoih dan bang in a man hun a na sep ding. Siampu in a seh bangbang ahi zel ding hi.

¹³Himahleh a tat nawn taktak ding leh na sehzah mun nga a khen, mun khat a behlap ding ahi.

¹⁴Mi’n a inn TOUPA a tuam dia a lat ding leh a hoih leh hoih louh dungzui in siampu in a sep dia; siampu seh bang ahi ding.

¹⁵A lan mi in a inn pen a tatnawn ding leh aman ding a na seh zah mun nga a khen, mun khat a behlap ding hi. Huchi in amah a ahi nawn ding hi.

¹⁶Mi’n a gam a lou a khen TOUPA a tuam dia a lat ding leh na seh dan ding a chi tuh dungzui zel in ahi ding. Barli buh homer khat mun, dangka sekel sawmnga man ahi ding.

¹⁷A lou pen Jubili kum apan lat ahihleh na seh bang ahi toupek ding.

¹⁸Jubili kum nung a lat ahihleh bel siampu in Jubili tun nawnna ding kum dungzui zel in aman a sep dia, na seh dan apan a kiam hun bawl ahi ding.

¹⁹A lan mi in a tatnawn taktak ding leh aman na sehzah mun nga a khen, mun khat a behlap dia, amah a ahi nawn ding hi.

²⁰Lou pen a tat noplouh hiam, midang kiang a khot hiam ahihleh tatnawn theih ahi kei ding.

²¹Jubili kum a a pawtnawn hun in loupen TOUPA adia siangthou, amah a tuam siangthou ahi dia siampu a ahi ding hi.

²²Amah lou him hilou, a leisa lou, mi’n TOUPA kiang a a lat leh,

²³Jubili kum tan in na seh dan bang in siampu in a man a seh sak dia, na seh bang in TOUPA adia siangthou hi ding in huai ni’n a pe ding hi.

²⁴Jubili kum in a leinapa, a gamneipa mah in a tang nawn ding.

²⁵Na sehdan tengteng Mun Siangthou sekel bangzel ahi dia, gerah sawmnih sekel khat ahi ding.

²⁶Ganta lak a piang masapen, a pian masak pen ziak a TOUPA a tuam dia sehsa peuhmah kuamah in a lan ding ahi kei. Bawngtal leng belam leng hitaleh, TOUPA a tuam ahi.

²⁷Gan sianglou ahihleh na seh dan bang a tat ding ahi dia, a mun nga a khen, mun khat a behlap ding hi. Tat ahihkeileh, na seh dan bang a khot ding ahi.

²⁸Mi’n a neih lak a bangpeuh, mihing hi in, ganta hiam, a neihsa lou hitaleh, TOUPA kiang a a piaksa zuak ding ahi kei a, tat ding leng ahi kei. Huai thil chih TOUPA adia siangthou pen ahi.

²⁹Kuapeuh si dia vaihawmsak, mihing lak apan manthatsak ding, tat ding ahi kei, amah sihsak ngeingei ding ahi.

³⁰Gam sung a sawm a khat peuhmah, gamsung a haichi hitaleh, sing gah hitaleh, TOUPA a ahi. TOUPA adia thil siangthou ahi.

³¹Mi’n a sawm a khat a tat nop leh, mun nga a khen, mun khat a behlap ding ahi.

³²Bawng leh belam sawm a khat thu ah, ganvulmi chiang a chiamtehsa nangawn leng, a sawmna zel TOUPA adia siangthou ahi ding.

³³Huai gan hoih hia, hoihlou, a enchian ding ahi kei, a khek ding leng ahi sam kei. A khek leh, a khek pen leh a khekna pen leng a nih un siangthou ahi ding ua; tat ding ahi kei hi.

³⁴Hiaite Israel suante adia TOUPA’N Sinai tang a Mosi kiang a thupiakte ahi uhi.